Сүхбаатар дүүргийн нэгдүгээр хорооны нутагт үйл ажиллагаа явуулдаг “Рапха” эмнэлгийн эмч БНАСАУ-ын иргэн Юн Жин нь Монгол Улсын иргэн М-ийн эрүүл мэндэд хохирол учруулсан хэрэгт гарсан байна.

Тодруулбал, хохирогчид зүү тавих эмчилгээ хийж байх үедээ эмнэлгийн тусламж үйлчилгээг зохих ёсоор биелүүлээгүйгээс болж уушги, цээжийг нь гэмтээжээ. Хохирогч цагдаагийн байгууллагад хандсны дагуу хэрэг бүртгэлийн хэрэг нээж шалган, улмаар шүүхэд шилжүүлжээ.

Сүхбаатар дүүргийн Эрүүгийн Анхан шатны шүүхээс “Рапха” эмнэлгийн ажилтан, БНАСАУ-ын иргэн Юн Жинийг Эрүүгийн хуулийн 15.1-2 дахь хэсэгт заасан “ Эмнэлгийн мэргэжилтэн эмнэлгийн тусламж, үйлчилгээ үзүүлэх үүргээ зохих ёсоор биелүүлээгүйгээс хохирогчийн эрүүл мэндэд хүнд хохирол учруулсан” гэм буруутайд тооцож, эмчлэх эрхийг хоёр жил хасаж, 2.8 сая төгрөгөөр торгох ял шийтгэсэн байна.