Сэлэнгэ аймгийн Сайхан сум дахь сум дундын прокурорын газраас бага насны хүүхэд хүчирхийлсэн М болон Г нарт холбогдох эрүүгийн хэргийг энэ сарын 1, 9-ний өдрүүдэд хянан хэлэлцэж шийдвэрлэжээ.

Тэдэнд тус сумын прокурорын газраас Эрүүгийн хуулийн 12.1 дүгээр зүйлийн 4, Эрүүгийн хуулийн 12.1 дүгээр зүйлийн 2.1 дэх хэсэгт зааснаар яллах дүгнэлт үйлдсэн байна.

Тодруулбал, 24 настай эрэгтэй М нь 2016 оны наймдугаар сард бага насны буюу 6 нас 10 сартай хүүхдийг хүчирхийлжээ. Мөн 20 настай эрэгтэй Г нь 2018 оны дөрөвдүгээр сард 14 настай хүүхдийг хүчирхийлсэн аж.

Уг хэрэгт холбогдуулан Сэлэнгэ аймгийн Сайхан сум дахь сум дундын шүүхээс М-ийг Эрүүгийн хуулийн 12.1 дүгээр зүйлийн 4 дэх хэсэгт зааснаар 18 жилийн хугацаагаар хорих ялыг хаалттай хорих байгууллагад, шүүгчдэгч Г-г Эрүүгийн хуулийн 12.1 дүгээр зүйлийн 2 дахь хэсгийн 2.1-т зааснаар хоёр жилийн хугацаагаар хорих ялыг нээлттэй хорих байгууллагад эдлүүлэхээр тус тус шийдвэрлэсэн байна.

Гэмт хэрэг гарсан шалтгаан нөхцлийг тодруулбал эцэг, эхчүүд насанд хүрээгүй хүүхдүүддээ тавих хараа хяналт сул, бага насны хүүхдээ зуны улиралд хамаатан садан, найз нөхдийндөө хөдөө орон нутагт амраах нэрийдлээр явуулж байгаагаас дээрх гэмт хэрэг гарах шалтгаан болсон байна. Иймд эцэг, эх, асран хамгаалагч нар бага насны болон насанд хүрээгүй хүүхдүүддээ тавих хараа хяналтаа сайжруулахыг прокурорын газраас анхааруулж байна.

Б.Лхам