Шүүхийн шинэтгэлийн хүрээнд ҮАБЗ-өөс хүргүүлсэн зөвлөмжийн дагуу шүүгчийн бүрэн эрхийг түдгэлзүүлдэг шинэ тогтолцоотой болсон билээ. Энэ хүрээнд Ерөнхийлөгч Х.Баттулгын зарлигаар нэр бүхий долоон шүүгчийг бүрэн эрхээс нь түдгэлзүүлсэн юм. Тэгвэл дахин найман шүүгчийг бүрэн эрхээс нь түдгэлзүүлэх ёстой гэсэн саналыг ҮАБЗ-д хүргүүлсэн УИХ-ын нэр бүхий гишүүдийн санал дэмжигдсэн тухай мэдээлэл цацагдсан. Тодруулбал, Ж.Батзандан, Т.Аюурсайхан,  Х.Нямбаатар, Л.Болд болон ЗГХЭГ-ын дарга Л.Оюун-Эрдэнэ нар энэ оны зургадугаар сарын 28-нд нэр бүхий шүүгчдийн бүрэн эрхийг түдгэлзүүлэх санал хүргээд байсан юм. Тэгвэл уг мэдээллийг шүүхийн толгой байгууллага болох Шүүхийн ерөнхий зөвлөлөөс үгүйсгэсэн байна.
 

Хэрвээ зээ ҮАБЗ-өөс нэр бүхий гишүүдийн саналыг хэлэлцээд дэмжвэл дахин таван шүүгчийн бүрэн эрхийг түдгэлзүүлэх нь цаг хугацааны асуудал болж таарна. УИХ-ын нэр бүхий гишүүдийн цоллосноор хонгилын шүүгч нар гэсэн гуншин зүүсэн хар жагсаалтад Дээд шүүхийн Эрүүгийн хэргийн танхимын тэргүүн Б.Цогт, Дээд шүүхийн Захиргааны хэргийн танхимын тэргүүн М.Батсуурь, Дээд шүүхийн шүүгч Ц.Зориг, Нийслэлийн Эрүүгийн хэргийн давж заалдах шатны шүүхийн шүүгч М.Алдар, Сүхбаатар дүүргийн Эрүүгийн анхан шатны шүүхийн шүүгч Х.Идэр нар багтсан тухай мэдээлэл бий.

Дээрх шүүгч нарыг товчхон танилцуулбал,

1. Дээд шүүхийн Эрүүгийн танхимын тэргүүн Б.Цогт нь Улаанбаатар хотод төрсөн. Эрх зүйч, улс төр судлаач, төрийн удирдлагын магистр зэрэгтэй. Монгол Улсын шүүхийн шүүгчийн “Дөтгөөр түшээ” зэрэг дэвтэй.

• 2002-2005 онд Улсын Дээд шүүхэд ерөнхий шүүгчийн туслах, ахлах зааварлагч;
• 2005-2007 онд Улсын Дээд шүүхийн Тамгын газарт шүүгчийн туслах-шинжээч;
• 2007-2012 онд Нийслэлийн Чингэлтэй дүүргийн шүүхийн шүүгч;
• 2012-2013 онд Нийслэлийн Баянгол дүүргийн шүүхийн Ерөнхий шүүгч;
• 2013-2017 онд Улсын Дээд шүүхийн шүүгч;
• 2017 оны 12 дугаар сарын 12-ны өдрөөс Улсын Дээд шүүхийн Эрүүгийн хэргийн танхимын тэргүүнээр ажиллаж байна.

2. Дээд шүүхийн Захиргааны хэргийн танхимын тэргүүн М.Батсуурь нь Булган аймгийн Булган суманд төрсөн. “Шихихутаг” Хууль зүйн дээд сургууль, МУИС-ийн Хууль зүйн сургууль, Удирдлагын академи тус тус төгссөн. Эрх зүйч, бизнесийн удирдлагын менежер, хууль зүйн ухааны магистр зэрэгтэй.

Монгол Улсын шүүхийн шүүгчийн “Дөтгөөр түшээ” зэрэг дэвтэй.

• 1999-2001 онд “М and P” ХХК-д хуулийн зөвлөх;
• 2001-2003 онд Монгол Улсын Их сургуулийн Хууль зүйн сургуульд захирлын туслах;
• 2003-2009 онд Монгол Улсын Их сургуулийн Хууль зүйн сургуульд багш;
• 2009-2011 онд Худалдаа, хөгжлийн банканд Хуулийн газрын захирал;
• 2011-2013 онд Захиргааны хэргийн давж заалдах шатны шүүхийн шүүгч;
• 2013-2014 онд Улсын Дээд шүүхийн шүүгч
• 2014 оны 03 дугаар сарын 21-ний өдрөөс Улсын Дээд шүүхийн Захиргааны хэргийн танхимын тэргүүнээр ажиллаж байна.

М.Батсуурь шүүгчийн хувьд цөөнгүй дууилантай хэргүүд дээр ажиллаж байсан. Тэдгээрийн дунд Салхитын мөнгөний ордтой хэргийн шийдвэрлэлт ч бас хамаатай байдаг. Энэ утгаараа хонгилын гэх нэр зүүгээд буй юм.

3. Дээд шүүхийн шүүгч Ц.Зориг нь

• 1982-1990 онд Сэлэнгэ аймаг, Улсын Дээд шүүх, Хууль зүй, арбитрын яаманд арбитрч,
• 1990-1992 онд Октябрийн районы ардын шүүхэд шүүгч,
• 1992-1993 онд Улаанбаатар хотын шүүхийн гишүүн, 1993-2006 онд Нийслэлийн шүүхийн шүүгч,
• 2006-2010 онд Нийслэлийн шүүхийн Ерөнхий шүүгч,
• 2010 онд Улсын Дээд шүүхийн шүүгч,
• 2010-2013 онд Шүүхийн Ерөнхий Зөвлөлийн дарга,
• 2010 оны 11 дүгээр сарын 05-ны өдрөөс 2019 оны гуравдугаар сар хүртэл Улсын Дээд шүүхийн Ерөнхий шүүгчээр ажилласан.

Түүнийг Дээд шүүхийн Ерөнхий шүүгчээр томилогдсон цагаас хонгилын гэх нэр дагах болсон. Учир нь нэр бүхий томчуудын хэргийг шийдвэрлэсэн байдлаасаа мөн экс Ерөнхийлөгч Ц.Элбэгдоржтой ойрын хүн гэдгээрээ ийн цоллуулахад хүргэсэн юм. Тэрбээр энэ оны гуравдугаар сард Ерөнхийлөгч Х.Баттулгын зарлигаар Ерөнхий шүүгчийн үүрэгт ажлаа хүлээлгэж өгсөн. 

4. Сүхбаатар дүүргийн Эрүүгийн анхан шатны шүүхийн шүүгч Х.Идэрийн хувьд хар тамхины хэргээр ял эдэлж буй прокурор асан Х.Тамирын дүү гэдгээрээ олонд танигдсан. 

Тодруулбал, түүний аав нь УИХ-ын гишүүн асан Д.Хувьтөгөлдөрвм. Шүүгч Х.Идэр нь хуулийн салбартаа багагүй нэр хүндтэй, олон ч удаа шагнал хүртэж байсан. 2014 оны долдугаар сард Дүүргийн Эрүүгийн хэргийн анхан шатны I шүүх буюу нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн шүүгчээр томилогдсон. 

Түүний аав Д.Хувьтөгөлдөр 1996-2000 онд АН-аас УИХ-ын сонгуульд өрсөлдөж, сонгогдсон. АН-ын Хяналтын хорооны дэргэдэх Ёс зүйн хороог даргалж явсан, ахмад гишүүн. Харин түүний дүү Х.Тамир нь Тээврийн прокурорын газрын хяналтын прокуророор ажиллаж байхдаа хар тамхи хууль бусаар олж авсан, тээвэрлэсэн, худалдан борлуулахаар завдсан хэргээр ял авсан нэгэн. Эх сурвалжийн өгүүлснээр хар тамхинд донтсон бөгөөд гэр бүлийнхнийхээ чихийг халууцуулдаг нөхөр юм байна. 

 Г.Алимаа​​​​​