Өнгөрсөн наймдугаар сарын 31-ны өдөр “Гарден сити-2” хотхоны блокийн барилгын ажилд ашиглахаар угсарсан цамхагт краны угсралтын цилиндрийн бэхэлгээний боолтууд тасарч, оройн хэсэг цөмөрч унасны улмаас ажилтан Э бэртэж, эмнэлэгт хүргэгджээ.
“Гарден сити-2” хотхон нь Хан-Уул дүүргийн дөрөвдүгээр хороонд баригдаж буй. Нийслэлийн Мэргэжлийн хяналтын газраас ослын шалтгааныг шалгахад Хөдөлмөрийн аюулгүй байдал, эрүүл ахуйн тухай хууль, ачаа өргөх краныг төхөөрөмжлөх, аюулгүй ашиглах дүрмийн заалтуудыг тус тус зөрчсөн болох нь илэрсэн байна.
Тиймээс уг хэргийг Хан-Уул дүүргийн Цагдаагийн хоёрдугаар хэлтэст эрүүгийн хэрэг үүсгэн шалгаж эхэлсэн байна.
“Гарден сити-2” хотхоны захиалагч нь “Мэжик инвест” ХХК бол гүйцэтгэгч компаниар “Конкрет харш” ХХК ажиллаж байсан аж. Харин нурсан кран нь "Ди Ди Эн” ХХК-ийн эзэмшил юм байна. Тус краныг 1402 дугаар блокийн барилгын ажилд ашиглахаар угсарсан "Zoomlion" үйлдвэрийн ТС 7525-16D маркийн цамхагт кран юм.
