Байгаль орчин, аялал жуучлалын сайдын тушаалаар зөвшөөрөгдсөн бүсээс өөр нутаг дэвсгэрээс самар түүж, боловсруулахыг хориглосон билээ. Тэгвэл хориглосон бүс буюу Хөвсгөл аймгийн нутаг дэвсгэрээс хуш модны самар түүж, улмаар нийслэл рүү оруулахыг завдсан хэрэг гарчээ.

Тодруулбал, Чингэлтэй дүүрэг дэх Мэргэжлийн хяналтын хэлтсийн Байгаль орчин хамгаалах улсын ахлах байцаагч Г.Цэцэгдэлгэр нь Эмээлт товчоонд 24 цагийн үүрэг гүйцэтгэх хугацаанд 239 тээврийн хэрэгсэлд үзлэг шалгалт хийсэн байна. Энэ үеэр Хөвсгөл аймгаас зөвшөөрөлгүй тээвэрлэсэн 6 шуудай буюу 200 кг орчим самрыг илрүүлжээ. Хэргийн мөрөөр хяналт шалгалт хийж, шийдвэрлэх ажиллагаа хийгдэж байна.