Өнгөрсөн наймдугаар сард Тагнуулын ерөнхий газрын дарга асан Б.Хурц, Улсын ерөнхий прокурорын орлогч асан, С.Зоригийг хөнөөсөн хэргийг мөрдөн шалгах ажлын хэсгийн ахлагч Г.Эрдэнэбат нарын есөн хүний гэм буруутай эсэхийг шийдвэрлэх шүүх болсон билээ. Зургаан өдрийн турш үргэлжилсэн уг шүүх хурлаас хэргийг нэмэлт мөрдөн байцаалтад буцаах шийдвэр гаргасан юм. Шүүхийн уг шийдвэрт прокурор эсэргүүцэл бичиж, өнгөрсөн есдүгээр сарын 16-нд Төв аймгийн Эрүүгийн хэргийн давж заалдах шатны шүүхэд хүргүүлсэн.

Өөрөөр хэлбэл, прокуророос хэргийг нэмэлт мөрдөн байцаалтад буцаах шаардлагагүй гэж үзсэн бололтой юм.

Тэгвэл хуулийн дагуу прокурорын бичсэн уг эсэргүүцлийг шүүхээс 30 хоногийн дотор хэлэлцэж шийдвэрлэсэн байх ёстой. Тодруулбал, энэ сарын 16-наас өмнө Төв аймгийн Эрүүгийн хэргийн анхан шатны шатны шүүхээс хэргийг нэмэлт мөрдөн байцаалтад буцаасан шийдвэрийг хүлээж авах эсвэл шүүхэд шилжүүлэх гэсэн хоёр сонголтын аль нэгийг давж заалдах шатны шүүхээс гаргах ёстой. Хэрвээ прокурорын эсэргүүцлийг шүүх хүлээж авч хэргийг шүүхэд шилжүүлбэл ТЕГ-ын дарга асан, хошууч генерал Б.Хурц нарын есөн иргэний гэм буруутай эсэхийг тогтоох шүүх хурлын тов тодорхой болох юм.

Г.Эрдэнэ