Манай улсад уул уурхайн салбар тэр дундаа алт олборлогч компаниудын үйл ажиллагаа эрчимжиж цар хүрээ тэлэхийн хэрээр улсын хилээр хууль бусаар мөнгөн ус оруулж ирэх, худалдан борлуулах гэсэн үйлдэл гарах нь олширох болсон.
Тэгвэл хууль бусаар 10 кг мөнгөн ус зарж борлуулах гэж байсан хэргийг цагдаагийн алба хаагчид илрүүлсэн байна. Тодруулбал, Мөрдөн байцаах албаны Хүрээлэн буй орчны эсрэг гэмт хэрэг мөрдөн шалгах хэлтсийн алба хаагчид Баянзүрх дүүргийн 2 дугаар хороонд хяналт, шалгалтыг энэ сарын 6-ны өдөр хийжээ. Шалгалтын үеэр иргэн Ө, Т нар 10 килограмм 320 грамм мөнгөн усыг зарж борлуулахаар хадгалж байсан нь илэрчээ.
Ташрамд дурдахад, 2018 оны наймдугаар сард Онцгой байдлын ерөнхий газрын харьяа харуул хамгаалалт өндөртэй тусгай ангиас их хэмжээний буюу 60 кг мөнгөн ус алдагдсан гэх хэрэг гарч байсан юм.
Тэгвэл эх сурважлийн хэлснээр дээрх мөнгөн усыг энэ хэргийн зангилаа байж болзошгүй гэдгийг хэллээ.
Дээрх хэргийг нэхэн сануулбал, Онцгой байдлын ерөнхий газрын харьяа харуул хамгаалалт өндөртэй тусгай ангиас их хэмжээний мөнгөн ус алдсныг тухайн үед харуул нар нь мэдээгүй байсан гэдэг.
Хэрэг гарснаас хойш 2-3 хоногийн дараа мэдэхдээ зөвхөн лац хөндөгдсөн байсныг нэг нь мэдсэн, нөгөө хоёр нь огч мэдээгүй гэж хамгаалагчид мэдүүлэг өгч байсан гэдэг.
БОАЖЯ-ны харьяанд байсан, одоогоос гурван жилийн өмнө ОБЕГ-т шилжүүлсэн, тус газрын Аврах тусгай ангийн хашаанд байрлах агуулахад уг нь 120 гаруй кг мөнгөн ус хадгалагдаж байдгийн тал нь алга болсон гэдгийг Сонгинохайрхан дүүргийн цагдаа, прокурорын байгууллагаас шалгаж буй.
Тухайн үед эх сурвалжийн хэлснээр “Тухайн үед хаалга үүд нь бүрэн бүтэн, цоож нь ч гэмтээгүй байсан. Ганцхан өөрчлөгдсөн зүйл нь лацны дугаар, тэмдэглэгээ байсан. Тэнд байсан мөнгөн усны ихэнхийг цагдаагийн байгууллагад шалгаж буй эрүүгийн хэргийн эд мөрийн баримтаар хураан авсан” гэдгийг хэлж байсан юм.
Монгол Улсын Засгийн газрын 2007 оны 04 дүгээр сарын 11-ний өдрийн 95 дугаар тогтоолоор “Монгол Улсад ашиглахыг хязгаарласан химийн хорт болон аюултай бодисын жагсаалт”-д орсон мөнгөн усыг хууль бусаар олж авч, хадгалан бусдад зарж, борлуулах гэж байх үед саатуулан, хойшлуулшгүй ажиллагааны хүрээнд хураан авч мөрдөн шалгах ажиллагаа явуулж байна.
Мөнгөн ус болон түүний нэгдэл агуулсан бодис нь хүрээлэн байгаа орчныг ноцтой бохирдуулж, хүн, мал, амьтны биед амьсгалын зам, арьс болон хоол хүнс, идэш тэжээлээр дамжин нэвчин орж, амьсгалын тогтолцоо, нүд, арьс, салтыг хордуулж, төв мэдрэлийн системийг гэмтээж, удмын санд нөлөөлж удаан хугацааны туршид хордуулдаг онцгой хортой бодис юм.
Энэ төрлийн гэмт хэргийг үйлдэн гэм буруутай нь тогтоогдвол Эрүүгийн хуулийн 24.3 дугаар зүйл.Химийн хорт, аюултай бодисыг хууль бус эргэлтэд оруулах
1.Химийн хорт, аюултай бодисыг хууль бусаар улсын хилээр нэвтрүүлсэн, үйлдвэрлэсэн, хадгалсан, худалдсан, авсан, тээвэрлэсэн, бусдад дамжуулсан, зориулалтын бусаар ашигласан бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.
2.Энэ гэмт хэргийн улмаас:
2.1.хүний эрүүл мэндэд хүнд хохирол учирсан, хүний амь нас хохирсон;
2.2.их хэмжээний хохирол учирсан бол арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл хоёр жилээс найман жил хүртэл хугацаагаар хорих ял шийтгэнэ.
3.Энэ зүйлийн 1 дэх хэсэгт заасан гэмт хэргийг хуулийн этгээдийн нэрийн өмнөөс, хуулийн этгээдийн ашиг сонирхлын төлөө үйлдсэн бол хуулийн этгээдийг тодорхой төрлийн үйл ажиллагаа явуулах эрх хасаж хорин мянган нэгжээс нэг зуун хорин мянган нэгжтэй тэнцэх хэмжээний төгрөгөөр торгох ял шийтгэнэ.
4.Энэ зүйлийн 2 дахь хэсэгт заасан гэмт хэргийг хуулийн этгээдийн нэрийн өмнөөс, хуулийн этгээдийн ашиг сонирхлын төлөө үйлдсэн бол хуулийн этгээдийг тодорхой төрлийн үйл ажиллагаа явуулах эрх хасаж дөчин мянган нэгжээс хоёр зуун мянган нэгжтэй тэнцэх хэмжээний төгрөгөөр торгох ял шийтгэнэ гэж заасан байдаг.