Дэлхийн улсуудын хамгийн чухал хийгээд өргөн хүрээнд тэмдэглэн өнгөрүүлдэг томоохон баярын нэг нь Улс тунхагласны баяр байдаг. Энэ хүрээнд Хилийн цэргийн дуу бүжгийн хамт олон 80 жилийн ойгоо угтан “Дархан хилийн мөнхийн аялгуу” хэмээх уран бүтээлийн тоглолтоо үзэгч түмэндээ барихад бэлэн болжээ. Ингээд тоглолтын талаар Хилийн цэргийн дуу бүжгийн орлогч дарга, МУСТА, хошууч Б.Болдбаатараас тодрууллаа.

-Таныг ихэнх хүмүүс нийтийн дуу дуулдагаар нь мэднэ. Магадгүй нийтийн дуугаар хоногшин үлдсэн байх. Хэзээнээс хилийн цэрэгт дуулж эхэлсэн юм бэ?

-Хилийн цэргийн дуу бүжигт ажиллаад гурав гаруй жил болж байна. Орлогч даргаар ажилладаг. Хошууч цолтой.

-Хилийн цэрэгт орсноос хойш шинэ уран бүтээл хийв үү?

-Хилчдийн тухай нэг уран бүтээл хийсэн. Ер нь эх орон гэдэг хоёрхон үгэнд багтаж байгаа мэт боловч асар өргөн утгатай зүйл байдгийг хилийн цэргийн алба хаагч болоод мэдэрсэн юм. Улс, эх орныхоо төлөө дархан хилээ хамгаалж өдөр шөнө, нойр хоолыг умартан зүтгэж байгаа хилчид дээрээ очих, онгон дагшин байгаль нутгаа хараад омогшихгүй байхын аргагүй. Хилчин нэрээр овоглож байгаадаа маш их бахархаж байгаа.

-Яагаад хилийн цэргийг сонгох болов. Таны багын мөрөөдөл байв уу?

-Тийм. Мөрдэс зүүх бол миний багын мөрөөдөл байсан юм. Мөрдэс зүүсэн ах нарыг хараад ийм л болох юмсан гэж их бодож, омогшдог байсан. Мөн өмнө нь олон цэргийн тоглолт хийж байсан нь дуртай зүйл рүү минь хөтөлж өгсөн байх.

-Улс тунхагласны баярын ойд зориулсан тоглолт учраас томоохон хэмжээний тоглолт болох байх. Тоглолтын бэлтгэл ажил хэр хангагдаж байна вэ?

-Тийм. Бэлтгэл ажил дуусч байна. Уг тоглолт анх удаа тоглогдож байгаагаас гадна 80, 90  орчим уран бүтээлчид оролцсон их өргөн хүрээтэй тоглолт болно. Энэ жил Хилийн цэргийн дуу бүжгийн чуулга үүсч хөгжсөний 80 жилийн ой мөн тохиож байна. Тоглолтод Хилийн цэргийн дуу бүжгийн чуулгын үе үеийн хилчдийн төлөөлөл оролцох юм. Тухайлбал, гитарчин Өөжгий, хөгжмийн зохиолч Т.Сэр-Од, МУГЖ Э.Бүрнээбаяр, МУГЖ Б.Сийлэгмаа, МУСТА Л.Оюунчимэг, МУГЖ Н.Отгон зэрэг уран бүтээлчид оролцох юм. 

-Таны хувьд ямар уран бүтээлээр үзэгчидтэйгээ уулзах вэ?

-Чуулганы даргаар ажиллаж буй хурандаа Ганхуягийн аялгуу, шүлэг СГЗ С.Оюуны бичсэн “Эх орны хилээс” дууг дуулна.

-Танай хамт олны хувьд энэ жил ямар онцлогтой байв?

-Хилийн цэргийн дуу бүжиг дархан хилээ хамгаалж байгаа хилчдэд урлаг соёлоор үйлчлэх үндсэн үүрэгтэй. Хамгийн гол нь хилчдийн сэтгэлзүйн бэлтгэлийг хангахын тулд оршдог юм. Энэ онд Зууны манлай, хөгжмийн зохиолч Л.Мөрдоржийн 100 жилийн ойд зориулсан тоглолтыг амжилттай зохион байгуулсан. Мөн Халх голын 80 жилийн ойн тоглолт болон хилийн отряд ангиудад урлаг соёлоор үйлчилсэн зэрэг нийт 200 гаруй тоглолт хийлээ. Чуулганы хувьд хилийн цэргийн урлаг соёлоор жил бүр 70 хувьд нь үйлчилдэг юм.

-Тоглолт хэзээ, хаана болох вэ?

-Тоглолт энэ сарын 25-нд UB palace-н концертын их танхимд ганцхан удаа тоглогдоно. Ийм томоохон хэмжээний тоглолт анх удаа болж байгаагаараа онцлог учраас үзэгч түмнийгээ урьж байна. Тасалбарын үнэ 20 мянган төгрөгөөр худалдаалагдаж байна.

Б.Лхам