Салхитын мөнгөний ордын хэрэгтэй холбогдуулан нэр бүхий 17 шүүгчийн бүрэн эрхийг Монгол Улсын Ерөнхийлөгч Х.Баттулга түдгэлзүүлээд байсан. Тэгвэл уг хэргийн хүрээнд зургаан шүүгчид холбогдох хэргийн мөрдөн байцаалт дуусаж, АТГ-аас прокурорцын байгууллагад шүүхэд шилжүүлэх саналтайгаар хүргүүлээд байгаа. 

Тодруулбал, Улсын дээд шүүхийн шүүгч Д.Цолмон, Г.Цагаанцоож, Ц.Амарсайхан, Захиргааны хэргийн давж заалдах шатны шүүхийн шүүгч Э.Халиунбаяр, Сонгинохайрхан дүүргийн Иргэний хэргийн анхан шатны шүүхийн шүүгч, Ерөнхий шүүгч Б.Цолмонбаатар, Баянзүрх дүүргийн Иргэний хэргийн анхан шатны шүүхийн шүүгч Т.Энхжаргал нарт холбогдох хэрэгт яллах дүгнэлт үйлдэн прокурорт шилжүүлээд байсан юм. 

Хэрэг прокурорт хянагдаж байх энэ цаг үед Улсын дээд шүүхийн шүүгч Ц.Амарсайханыг хил давсан гэх мэдээллийг зарим хэвлэл мэдээллийн хэрэгслээр дамжуулах боллоо. Албан бус мэдээллээр Ц.Амарсайхан нь гадаадад эмчилгээ хийлгэх шаардлагатай болсон учир Чингэлтэй дүүргийн Эрүүгийн хэргийн анхан шатны шүүхэд хүсэлт гаргасан байна. Яллагдагчийн гаргасан уг хүсэлтийг шүүх хүлээж авсан учир тэрбээр ийнхүү БНСУ-ыг зорьсон бололтой юм аж.