"Мотив" хамтлагийн дуучин Жижигээ буюу Г.Эрдэнэбаяр мөс хэрэглэн мансуурсан байхад нь ЦЕГ-ын Хар тамхитай тэмцэх газраас энэ сарын 17-нд баривчилж, таслан сэргийлэх арга хэмжээ авсан билээ. Гэвч прокуророос хилийн хориг тавьж, гадуур байцаах саналыг шүүхэд хүргүүлсний дагуу шүүхээс хүсэлтийг хангаад байсан. Шүүхийн эл шийдвэр нь олны дургүйцлийг ихээхэн төрүүлээд байсан юм.
Тэгвэл нийслэлийн Прокурорын газраас Б.Эрдэнэбаярт Эрүүгийн хуулийн тусгай ангийн 20.7 дугаар зүйлийн 1 дэх хэсэгт зааснаар “мөс” гэх нэршилтэй мансууруулах сэтгэцэд нөлөөт бодисыг худалдаалах зорилгогүйгээр хууль бусаар хадгалсан үйлдэлд эрүүгийн хэрэг үүсгэсэн байна. Тодруулбал, 2019 оны 12 дугаар сарын 17-ны өдөр прокуророос яллагдагчид цагдан хорих таслан сэргийлэх арга хэмжээ авахуулах саналыг шүүхэд ирүүлсэн. Гэтэл яллагдагч нь цагдан хорих таслан сэргийлэх арга хэмжээний саналыг хэлэлцэх шүүхийн хэлэлцүүлэгт оролцохоор ирсэн байхдаа шүүхээс оргон зайлсан аж. Үүний улмаас цагдан хорих таслан сэргийлэх арга хэмжээ авах боломжгүй болсон тул Монгол Улсын хилээр гарахыг хязгаарлах таслан сэргийлэх арга хэмжээ авах саналыг шүүхэд гаргасан аж.
Үүний дагуу Баянгол дүүргийн Эрүүгийн хэргийн анхан шатны шүүхээс Б.Эрдэнэбаярт 2019 оны 12 дугаар сарын 17-ны өдөр Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авсан нь энэ юм байна.
Улмаар өнөөдөр буюу арванхоёрдугаар сарын 18-нд Б.Эрдэнэбаярыг олж тогтоон саатуулан 2019 оны 12 дугаар сарын 17-ны өдрийн шүүх хуралдаанаар Монгол Улсын хилээр гарахыг хязгаарлах “Хязгаарлалт тогтоох” таслан сэргийлэх арга хэмжээг хүчингүй болгож, яллагдагчид 2019 оны 12 дугаар сарын 18-ны өдрөөс 1 (нэг) сарын хугацаагаар цагдан хорих таслан сэргийлэх арга хэмжээг авч шийдвэрлэсэн байна.
