Зам, тээвэр, хөгжлийн яамны эрх бүхий албан тушаалтнууд ажлын байран дээрээ архидан согтуурсан үедээ нэгнийхээ амь насыг бүрэлгэсэн хэргийн цусны мөр хатаагүй байхад төрийн албан хаагчид архидан согтуурсан үедээ нэгнийгээ гэмтээж бэртээсэн хэрэг дахиад гарчээ. Энэ сарын 21-ий орой Төрийн тусгай хамгаалалтын газрын дарга П.Батаа нь тасгийнхаа нэг алба хаагчтай архи уусан үедээ муудалцаж, улмаар П.Батаа нь гэмтэл авсан байна. Төрийн ордонд хүйтэн мэс атгасан этгээд нэвтэрч, Их хурлын гишүүн амь насаа алдаж,  төрийн яаманд алба хаагчид нэгнийгээ бүрэлгэж байхад Төрийн тусгай хамгаалалтын газрын даргын ёс суртахуун ийм л байна. Иргэн хүн чөлөөтэй цагаараа лаагаа иднэ үү, луувангаа иднэ үү, хэнд ч хамаагүй.

Харин бүхэл бүтэн Төрийн тусгай хамгаалалтын газрын дарга хүн гэдэг бол тэс өөр статустай байх ёстой.

П.Батаа дарга уг нь Төрийн ордныг хамгаалах санаатай ажил хийсэн юм билээ. Тэр нь Сүхбаатарын талбай дээрх иргэдээ хамгаалах нэрийдлээр 152 сая төгрөгийн үнэ бүхий 396 ширхэг боржин чулуу тойруулах замаар. Яаж ч харсан өнгө ч үгүй, зүс ч үгүй эдгээр чулуугаа тэрбээр энэ сарын 23-нд шөнийн цагаар олны нүднээс нууцлан авч явсан. Өнөөдөр аль компанийн мэдлийн хашаанд овоолсон нь тодорхойгүй. 

152 сая төгрөгийн үнэтэй боржин чулууны хувьд нийслэлийн харъяа байгууллагууд танаж, тэсэж болох зардлыг бүгдийг нь танахыг хотын дарга лүндэн буулгасан. Үүнийх нь ч дагуу хэмнэлтийн эрх чөлөөнд шилжээд багагүй хугацаа өнгөрч байгаа юм билээ. Гэтэл П.Батаа дарга бараг л дур мэдээд шахуу дээрх 152 сая төгрөгийг салхинд хийсгэчихсэн гэх. Өөрөөр хэлбэл, Төрийн тусгай хамгаалалтын газраас санаачлаад, хотын дарга үүнийг нь дэмжиж хамжаад гүйцэтгэсэн юмдаг уу даа.  Түүгээр зогсохгүй бас нэгэн төрийн байгууллагын үүд хавийг иймэрхүү байдлаар хамгаалахаар болсон, хөрөнгө мөнгө нь шийдэгдсэн гэх мэдээ чих дэлсэв.

Ийм хуумгай хэрэгтэй нэр холбогдоод байгаа П.Батаа хурандаагийн талаар багагүй таагүй мэдээ байдаг юм байна. Тухайлбал, “Их тэнгэр” цогцолборт зөөгчөөс хурандаа цолонд хүрсэн түүх Тагнуулын ерөнхий газрын дарга асан, хошууч генерал Б.Хурцтай холбогддог гэх. Төрийн тусгай хамгаалалтын газрын дарга болоход нь ч Б.Хурц генералын нөлөө багагүй гэх юм билээ.

Автомашины хураамжийг нэмэх замаар нийслэлийн төсвийн алдагдлыг буурахаар шийдсэн хотын удирдлагууд төрийн тусгайгийхантай нийлж, нэгдээд 152 сая төгрөгийг салхинд хийсгэвчихэв. Бүр ингэхдээ ямар ч тендер зарлалгүйгээр дээрх чулуу шахсан гэх мэдээлэл хүртэл хэвлэлээр цацагдах болов. Хэрэв зээ, энэ нь үнэн бол төрийн тусгай овьектийг хамгаалах ёстой эрх бүхий албан тушаалтан нь "хууль бус" тендертэй нэг сэжимээр холбоотой байж таарах гээд байна.

Тиймээс л АТГ-ынхан шалгаад, нягтлаад үзчихэд нэг их буруудахгүй болов уу.

Их төсөвтэй байгууллагыг удирддаг хүмүүст 152 сая гэдэг нэг их тоо биш л байх. Гэвч хөдөлмөрийн хөлсний доод хэмжээ 320 мянган төгрөг гээд тооцвол 500 орчим айлын сарын төсөв гэхээр бага биш нь харагдах байх. Боржин чулууны хэрэг олны масс хамарч, шүүмжлэл дагуулахтай зэрэгцэн П.Батаа дарга асуудлыг өөрөөсөө холдуулахыг хичээсэн. Гэвч гүйцэтгэгч компанийнх нь захирал хэргийг илчилснээр улайсан байдаг. Тиймээс л төрийн нэр барьсан энэ мэт эрх мэдэлтнүүдийг шалгаад, сэгсрээд үзчихэд гэмгүй л байх. Тэр дундаа танхимдаа шударга үнэнийг тогтоохоо тунхаглаад буй У.Хүрэлсүх сайд өөрөө энэ бүхнийг түүчээлбэл ядаж л гоё харагдах биз ээ.

Г.Алимаа