Цагдаагийн байгууллагаас өгсөн мэдээллээр шинэ жилийн баярын өдрүүдэд эрүүлжүүлэгдсэн хүний тоо буурч, гэр бүлийн хүчирхийллийн дуудлага мэдээлэл ихэсчээ. Тодруулбал, 2019 оны арванхоёрдугаар сарын 31-ээс 2020 оны нэгдүгээр сарын 1-ий хооронд нийт 189 хүн эрүүлжүүлэгдэж, гэр бүлийн хүчирхийллийн 168 дуудлага иржээ. Түүнчлэн баяр ёслолын үеэр согтууруулах ундаа хэтрүүлэн хэрэглэсэн залуус олноор эрүүлжүүлэгддэг байсан бол сүүлийн гурван жилийн хугацаанд согтуу эмэгтэйчүүд олширсон байна. Эмэгтэйчүүдийг эрүүлжүүлэх байранд байлгах боломж хязгаарлагдмал учир ар гэрийнхэнд нь хүлээлгэж өгөх зэргээр арга хэмжээ авдаг талаар цагдаагийн алба хаагчид хэллээ. 

Нийслэлийн цагдаагийн удирдах газарт  нийт 1203 дуудлага мэдээлэл бүртгэгдсэн нь энгийн өдрүүдээс буурсан үзүүлэлт аж. Үүнээс согтуугийн 484, гэмт хэргийн 63 дуудлага тус тус бүртгэгджээ.

Цагдаагийн байгууллагаас ийм мэдээлэл өгсөн бол Гэмтэл согог судлалын үндэсний төвд 2019 оны арванхоёрдугаар сарын 31-ээс 2020 оны нэгдүгээр сарын 1-ий хооронд 215 хүн ханджээ. Энэ нь энгийн үеийн бодвол хоёр дахин их хандсан тохиолдол юм байна. Үйлчлүүлэгчдийн олонх нь согтууруулах ундаа хэтрүүлэн хэрэглэсэн үедээ бусадтай маргалдаж, биедээ гэмтэл авсан тохиолдол бүртгэгдсэн байна. Мөн зургаан сартай жирэмсэн эмэгтэй согтууруулах ундаа хэрэглэсэн үедээ бусадтай маргалдаж, зодоон хийсэн аж.  Түүнчлэн ГССҮТ-д согтуугаар биедээ гэмтэл авсан иргэдийн 40 орчим хувь нь эмэгтэйчүүд гэдгийг мөн онцоллоо.

Г.Алимаа