Хотын дарга асан Э.Бат-Үүл "Ерөнхийлөгчийн шинэ томилгооны учир тодорч байна" гэсэн гарчигтай нийтлэлээ өнгөрсөн 2019 оны зургадугаар сард бичиж, олон нийтийн сүлжээнд байршуулсаныг Ерөнхийлөгч Х.Баттулга болон Ерөнхийлөгчийн Тамгын газрын дарга З.Энхболд нар бусдыг гүтгэсэн гэж үзэж, хуулийн байгууллагад хандсан юм. Гомдлыг Сүхбаатар дүүргийн цагдаагаас газраас хүлээж аваад шалгасны эцэст бусдыг гүтгэсэн байна гэж үзэж, Э.Бат-Үүлийг Зөрчлийн хуулийн 6.21-т зааснаар хариуцлага тооцохоор болсон.

Гэвч Э.Бат-Үүл уг шийдвэрийг үндэслэлгүй хэмээн үзэж, торгуулийг хүчингүй болгуулах өргөдлөө Сүхбаатар дүүргийн Эрүүгийн хэргийн анхан шатны шүүхэд гаргасан бөгөөд уг хэргийн шүүх хурал өнөөдөр товлогдсон боловч хойшиллоо. Энэ талаар хотын дарга Э:Бат-Үүл "Хариуцагч талаас Ерөнхийлөгчийн Тамгын газрын дарга З.Энхболд шүүх хуралд өөрийн биеэр оролцох хүсэлт гаргаж, түүнийг ирэх хүртэл хурлыг хойшлуулах хүсэлтийг гаргасан. Тиймээс шүүх хурлыг энэ сарын 14-ны өдөр хүртэл хойшлуулсан" гэжээ.