УИХ-ын 2020 оны ээлжит сонгууль болох гэж буйтай холбогдуулан Сонгуулийн ерөнхий хороо болон бусад холбогдох байгууллагаас мэдээлэл хийлээ.
СЕХ-ны дарга Ц.Содномцэрэн “УИХ-ын сонгуулийн тухай хуульд зардлын хяналтыг чангаруулж, ил тод байдлыг хангахад чиглэсэн нарийвчилсан заалтуудыг тусгасан. Уг хуулиар сонгуульд оролцохоос татгалзахыг, сонгуулийн хууль тогтоомж зөрчихийг уриалсан агуулга бүхий аливаа сурталчилгааг явуулахыг хориглосон. Хэрвээ хууль зөрчвөл хуулийн дагуу арга хэмжээ оногдуулна. Өмнөх хуульд нэр дэвшигч үнэмлэхээ авснаас хойш сурталчилгаагаа эхлэлгүй дөрөв хоног хүлээдэг байсан. Тэгвэл шинэ хуулиар үнэмлэх гардсан өдрөөсөө сурталчилгаагаа эхлүүлэх зохицуулалтыг тусгасан.
Өмнөх сунгуулиудын үеэр зөрчил нэлээд гарч байсан учир энэ удаагийн хуульд зөрчил, маргаанд хяналт тавих төрийн байгууллагуудын чиг үүргийг ч тодорхой болгож, 80 гаруй зөрчлийг хуулчилсан.
Ирэх хоёрдугаар сарын 1-нээс өмнө сонгуулийг товлон зарлаж, тойрог мандатын тоог тогтоосны дараа буюу хоёрдугаар сард багтаан иргэдийн шилжилт хөдөлгөөнийг зогсооно. Сонгуулийн санал авах өдөр тодорхой болсны дараа сонгуулийн графикийг гаргана.
Тойрог, мандатыг УИХ өөрөө тогтооно. Энэ бол хуулиар олгогдсон эрх нь.
Олон мандаттай тойргоор сонгууль явуулах заалттай болсон учир нэг мандаттай байсан аймгууд хоёр болон түүнээс дээш мандаттай болно. Дөрөвдүгээр сард нам, эвсэл сонгуульд оролцохоо илэрхийлж СЕХ-нд материалаа ирүүлэх ёстой. Энэ удаагийн сонгуулиар гадаадад байгаа иргэдийн саналыг хураахгүй. Учир нь мажоритар системээр сонгууль явуулж байгаа үед гадаадад байгаа иргэдийн саналыг авах хүндрэлтэй" гэлээ.
Үүний дараа сэтгүүлчид УИХ-ын гишүүд, нэр дэвшигчид сар шинийн баяраар сонгогчдод гарын бэлэг тараадаг. Үүнийг хэрхэн зохицуулах бэ? гэдгийг тодруулахад
ЦЕГ:-Зөрчлийн тухай хуулийн 41 дүгээр зүйлд зааснаар сонгууль товлон зарсласнаас хойш мөнгө, эд зүйл тараахыг хориглосон. Энэ нь бүх этгээдэд хамаатай. Гэхдээ бүрэн эрх нь хэвээр мөрдөгдөж байгаа УИХ-ын гишүүд ажлын тайлангаа тавих эрх нь нээлттэй.
СЕХ: УИХ-ын гишүүн бэлэг тарааж болохгүй. Зөвхөн ажлын тайлангаа тойргийн сонгогчдодоо тавьж болно. Нэр дэвшигчийн бүртгэхээс татгалзах хоёр үндэслэлийг хуульд оруулсан тусгасан. Үүнд, хориглосон зүйлийг зөрчсөн нь хуулийн байгууллагаар тогтоогдсон бол. Түүнчлэн сонгуулийн сурталчилгааны явцад бусдыг гүтгэх зэргээр хууль тогтоомж зөрчсөн нь тогтоогдсон бол нэр дэвшигчээр бүртгэхээс татгалзах үндэслэл болно.
Харилцаа холбооны зохицуулах хороо: Сонгуулийн сурталчилгааг цахим орчин гурван хэлбэлээр явуулж болохоор хуульчилсан. Нэгдүгээрт, нэр дэвшигч, нам, эвсэл өөрийн вэб хуудсаар, хоёрдугаарт, олон нийтийн сүлжээн дэх өөрийн цахим хуудсаар, гуравдугаарт бусад цахим хэрэгслээр. Ингэхдээ сонгуулийн хороонд заавал бүртгүүлсэн байх ёстой.
Хуурамч хаягнаас хуурамч мэдээлэл тараавал хариуцлага ногдуулж, уг хаягийг хаана. "Фэйсбүүк" компанитай хамтран ажиллаж байгаа учир сонгуулийн сурталчилгааны хугацаанд тус компаниас Монголд түр хугацаагаар нэгж нээнэ" гэлээ.