МҮБХ-ны дэд тэргүүн, улсын заан Ц.Магалжавтай ярилцлаа.

-Э.Оюунболд аваргын барилдах эрхийг сэргээх асуудал яригдаж байна. Энэ үнэн үү?

-Үндэсний их баяр наадмын комиссоос Э.Оюунболд аваргын барилдах эрхийг хоёр жилээр хассан тогтоолоо өнгөрсөн оны арванхоёрдугаар сард Үндэсний бөхийн холбоонд хүргүүлсэн. Мөн биднийг энэ шийдвэрийг хэрэгжүүл гэсэн. Бөхчүүд допингийн шинжилгээг сольдог, зарим бөхчүүдээс допинг илэрсэн гэж хүчээр цуу яриа гаргаж байгаа асуудал байна. Үндэсний бөхийн холбооны зүгээс Үндэсний их баяр наадмын комиссын гаргасан тогтоолыг л дагана. Нөгөөтээгүүр, комисс шийдвэрээ цуцлавал Э.Оюунболдыг барилдуулж болно.

-Э.Оюунболд аварга Хэнтийн бөхчүүдтэйгээ хамт Цагаан сарын барилдааны бэлтгэлд гарсан гэсэн яриа бий?

-Тийм зүйл байх ёсгүй.

-Та нийгмийн сүлжээнд гараад байгаа зарим асуудлын талаар түүнээс тодруулж үзсэн үү?

-Үгүй.

-Бөхчүүд биш дуучид “Бөхийн өргөө”-г дүүргэж байна гэх иргэдийн шүүмжлэл байдаг. Бөхийн өндөр цолтнуудыг бөхийн барилдаанд оролцуулах талаар ямар ажил хийж байна вэ?

-Бөхийн барилдаан үзэгч цөөтэй боллоо гэдэг шүүмжлэлийг хүлээн зөвшөөрч байна. Энэ нь хэд хэдэн шалтгаантай. Мэдээж иргэд өндөр цолтой бүх бөхчүүдийг ирж барилдаасай гэж хүсдэг ч бүгдээрээ ажил, амьдралтай. Хүчээр барилдуулъя гэхээр шинэ журам гаргачихсан учраас журмаа мөрдөхгүй бол болдоггүй. Нөгөөтээгүүр, залуучуудын бэлтгэл эрчимтэй сайн болсон гэдгийг үзэгчид ойлгох хэрэгтэй. Ер нь спортоор амжилт гаргахын тулд аль нэг зүйлээ золиосолдог. Цаана нь хүний амьдрал яригдаж байгаа учраас шахаад байж чаддаггүй.

-Улсын баяр наадмаас бусад барилдаанд ч гэсэн допингийн шинжилгээ авч байсан. Энэ онд ч ийм зарчмаар явах уу?

-Уг асуудлаар БСШУСЯ-нд хүсэлт гаргаж өгөх ёстой. Зарим холбогдох байгууллагын зүгээс шинжилгээ авах хамгийн тохиромжтой үе нь долдугаар сар байдаг гэж ярьдаг. Мөн шинжилгээ эрүүл мэндийн салбарын хөрөнгөөр хийгддэг учраас аль болох гурав, дөрөвдүгээр сард шинжилгээ авахуулахгүй байхыг зорьж ажиллаж байна.

-Шөвгөрсөн бөхчүүдээс допингийн шинжилгээ авдаг процесс хэрхэн явагддаг вэ. Мөн таныг барилдаж байх үед шинжилгээг яаж авдаг байсан юм бол?

-Шинжилгээ авдаг мэргэжилтэн тэдгээрийн гэр бүлийн хүмүүс нэр бүхий бөхчүүдийг ивээн тэтгэдэг компаниудын эзэмшлийн үл хөдлөх болон хөдлөх хөрөнгийг шилжүүлж авсан асуудал АТГ дээр яригдаж байгаа. Ийм л мэдээлэлтэй байна. Сүүлийн 10 жил шинжилгээний хариуг энэ мэтээр гаргасан гэж бодохоор энэ хугацаанд хэдэн бөх хохирсон байх вэ. Тиймээс уг асуудлыг үндсээр нь гаргаж, цэгцлэхээс өөр аргагүй.

-Бөхийн холбооны хувьд цаашид энэ чиглэлээр хэрхэн ажиллахаар төлөвлөж байна вэ?

-Улс, аймаг, сумын цолтой нийт 1000 гаруй бөх байдаг. Эдгээр бөхчүүдийн гол ярьдаг асуудал нь допингтой хатуу тэмцэх тухай байдаг.  Үндэсний бөхийн холбоо цаашид допингийн асуудлыг чангатгах, хэрэв хэрэглэвэл шийтгэлтэй байхаар ярьж байна. Гэхдээ энэ нь зөвхөн Үндэсний бөхийн холбооны асуудал биш. Үндэсний баяр наадмыг зохион байгуулах хороо гэж бий. Мөн цол хураах эсэх асуудал нь Ерөнхийлөгчийн бүрэн эрхийн асуудал байдаг юм.

-Бөхийн барилдааны тоо цөөрсөн талаар иргэд шүүмжлэлтэй ханддаг. Сүүлийн үед залуу бөхчүүдийн ёсзүйн асуудалд хатуу шаардлага тавьж байх шиг харагддаг?

-Нийгмийн хөгжлөө дагаад бөхчүүдийн ёсзүйн шаардлагыг өндөр тавьдаг болсон. Тиймээс ёсзүйн алдаа гаргасан бөхчүүдийн барилдах эрхийг зургаан сараар хасах шийдвэр удахгүй гарна.

-Бөхийн маргаантай барилдааныг бичлэгээр шийдвэрлэдэг. Цаашид энэ асуудлыг илүү боловсронгуй болгох талаар ямар арга хэмжээ авч байна вэ?

-Үндэсний бөхийн холбооны Цэцдийн зөвлөлөөр ярилцах асуудал. Гол асуудал нь давж байгаа бөх барьц сонголцоод хаяахаар түрүүлээд тохой нь хүрдэг асуудал байдаг учраас бөхийн барилдааныг камераар шүүнэ. Шүүхдээ тодорхой нөхцөлөөр шүүдэг.

-Допинг хэрэглэсэн таван бөхөөс гурвыг нь алаг үзлээ гэж ярьж байна. Наадмаас өмнө хэчнээн бөхийн барилдах эрх сэргэх вэ?

-Алаг үзсэн асуудал байхгүй. Учир нь олон улсын журамд тамирчдын эрх А сорьцоо өгсөн өдрөөс нь сэргэдэг. А сорьцын шинжилгээг хүлээн зөвшөөрдөг гэсэн үг.

Б.Жаргал