МАН-аас Сонгинохайрхан дүүргийн 26 дугаар тойрогт нэр дэвшигч, Хөрөнгө оруулалтын банкны Төлөөлөн удирдах зөвлөлийн дарга  Д.Сумъяабазарыг бусдыг залилан, их хэмжээний хохирол учруулсан хэргээр Сүхбаатар дүүргийн цагдаагийн хэлтсээс шалгаж эхэлсэн талаар мэдээлэл цацагдсан. Энэ талаар Д.Сумьяабазартай ярилцлаа.
    МАН-аас Сонгинохайрхан дүүргийн 26 дугаар тойрогт нэр дэвшигч, Хөрөнгө оруулалтын банкны Төлөөлөн удирдах зөвлөлийн дарга  Д.Сумъяабазарыг бусдыг залилан, их хэмжээний хохирол учруулсан хэргээр Сүхбаатар дүүргийн цагдаагийн хэлтсээс шалгаж эхэлсэн талаар мэдээлэл цацагдсан. Энэ талаар Д.Сумьяабазартай ярилцлаа.

-Таныг залилангийн хэргээр шалгаж эхэлсэн гэх мэдээлэл гараад байна?

-Намайг залилангийн хэргээр шалгагдаж байгаа гэсэн ташаа мэдээлэл хэвлэл мэдээллийн хэрэгслээр цацагдаж байна. Энэ бол миний мөн байгууллагын нэр хүндэд цэвэр халдаж байгаа хэрэг. Хэвлэлээр цацагдаад байгаа мэдээлэл гүтгэлгийн шинжтэй. Ямар ч баримтанд тулгуурлаагүй мэдээлэл байна билээ. Ийм мэдээлэл гарсанд үнэхээр харамсч байна. Би дахин сонгууль хүлээгээд л байж байна. Цацагдаад байгаа мэдээлэл иргэн Д.Сумьяабазар гэдэг утгаараа бус Үндэсний хөрөнгө оруулалтын банкны төлөөлөн удирдах зөвлөлийн даргын албыг хашиж байгаа, цаашлаад гадаад дотоодын бизнесийн хамтрагч, дэлхийн хэмжээний санхүүгийн байгууллагуудтай хамтарч ажилладаг байгууллагын нэр хүндэд халдаж байна. Хувь хүн талаасаа аливаа зүйл дээр нэлээн хүлээцтэй, монгол хүний, монгол бөхийн, аварга хүний ёс зүй зааж, элдэв шуугианыг тоохгүй байх байлаа. Гэвч энэ байгууллагын нэр хүндтэй шууд холбоотой.

-Тэгээд яагаад ийм мэдээлэл цацагдах болов?

-2007 онд залилуулсан гээд байгаа Н.Баттулгын компанитай хөрөнгө оруулалтын чиглэлээр хамтарч ажиллахаар бизнесийн төсөл хэрэгжүүлж эхэлсэн. Тэгээд би хөрөнгө оруулалт хийсэн. Гэтэл тухайн үед ажиллаж байсан Батмөнх, Баатар гэх иргэд голоос нь 350 мянган ам.долларыг аваад одоо хүртэл өгөөгүй байна. Үүнийг л хуулийн байгууллага шалгаж байгаа. Тиймээс уг хэрэгт би гэрчээр оролцсон. Гэтэл залилангийн хэрэг хийсэн гэх мэдээлэл цацагдсан байх юм. Тухайлбал, хэвлэлээр СХД-ийн дахин сонгуульд Ц.Элбэгдоржийн зөвлөхтэй өрсөлдөх Д.Сумьяабазар залилангийн хэргээр шалгагдаж байна гэсэн мэдээлэл гарсан байгаа. Энэ юу гэсэн мэдээлэл вэ? МУ-ын Ерөнхийлөгч гэдэг ард түмний эв нэгдэл, бэлэг тэмдэг байх ёстой. Гэтэл ийм мэдээлэлд нэр нь оролцоод явах нь хэр зүйтэй юм бол.

-Ерөнхийлөгч бол энэ мэдээллийг тоохгүй. Тэгэхээр танд хардах өнгө аяс харагдаж байна л даа?

-Би хардаагүй. Энэ мэдээлэлд Ерөнхийлөгчийн нэр хүндийг битгий ашиглаач ээ. Энэ хүн монголын ард түмний эв нэгдэл, бэлэг тэмдэг шүү дээ гэж хэлж байна.

-Тэгэхээр цаана нь улстөрийн зорилго байна гэж хэлэх гээд байна уу?

-Намайг СХД-ийн МАН-ын хорооны дарга болсноос хойш ташаа мэдээлэл их гарах болсон. Тэгэхээр улс төрийн өнгө аяс яаж явагдаж байгаа нь харагдаж байна.

-Ер нь та энэ мэдээллийг гаргасан хэвлэлийнхэнтэй уулзсан юм уу?

-Гүтгэлгийн шинжтэй мэдээлэл гаргасан хэвлэлүүдтэй бие төлөөлөгч, өмгөөлөгчөөрөө дамжуулан шүүхийн байгууллагад хандана. Ялангуяа Сонгуулийн тухай хуулийн 35.25, 35.31 дүгээр заалтыг бариад шүүхийн байгууллагад хандахаа мэдэгдэж байна. Юм чинь хэмжээтэй, учиртай байх ёстой шүү дээ.

-Мөн саяхан таныг Д.Дагвадоржийг аваргыг батлан даалтад гаргасан гэх мэдээлэл цацагдсан?

-Тийм мэдээлэл гарсан байсныг олж харсан. Сэтгүүлч зодсон Д.Дагвадоржийг Д.Сумьяабазар батлан даалтад гаргажээ гэж байгаа юм. Үүнийг хэн гэдэг сэтгүүлч ямар баримт тулгуурлан бичив. Хэрвээ би батлан даалтад авсан бол бүртгэл дээр нь миний гарын үсэг байх ёстой. Тэгэхээр тийм зүйл байхгүй.

-Д.Дагвадорж МҮОНТ-ын захирал М.Наранбаатарыг таныг сонгуульд дэмжээгүй учраас зодсон гээд байгаа?

-Тийм асуудал яригдаад байна лээ. Би М.Наранбаатарыг ийм болоогүй зүйлийг яриагүй байх гэж бодож байгаа. Сонгууль эхлэх үеэр буюу өнгөрсөн зургадугаар сарын эхээр М.Наранбаатар намайг “Цаг үе, үзэл бодол” нэвтрүүлэгт оролцооч ээ гэсэн санал тавьсан. Тэр саналыг би бодож үзсэн. Тэгээд олон нийтийн радио телевиз сонгуулийн сурталчилгаанд оролцоод байх нь хэр зохистой вэ, хууль эрхзүйд хэр нийцэх вэ гэж бодсон. Тиймээс М.Наранбаатарт “Энэ удаад нэвтрүүлэгт чинь орохоос татгалзаж байна. Хууль хяналтаа хүндэтгэх ёстой” гээд хариулт өгсөн. Түүнээс биш бидний хооронд өөр зүйл болоогүй. Өвөрхангай аймагт зодолдсон гээд байгаа. Тэгэхэд л хоёр халамцуу эр хүн хоорондоо муудалцсан байх. Би сайн мэдэхгүй. Тэрийг ялгаж салгаж тайлбарлах хэрэгтэй. М.Наранбаатар бол манай нутгийн залуу. Би дэмжиж явдаг.