Коронавирусын халдвараас урьдчилан сэргийлэх үүднээс Цагаан сарын баярын энэ өдрүүдэд Улаанбаатар хот руу орж, гарах бүхий л хөдөлгөөнийг хаагаад буй. Яг энэ цаг үед хулгайн замаар Улаанбаатар руу нэвтрэх гэсэн иргэд олширсоор байгаа талаар мэдээлэл манай сайтад ирсэн юм.
Уг асуудлаар Сонгинохайрхан дүүргийн Замын цагдаагийн хэлтсийн алба хаагчдаас тодруулахад "Төв зам дагуу постуудад цагдаагийн байгууллагаас хүч нэмэгдүүлэн ажиллаж байна. Одоогоор нууцаар нэвтрэх гэсэн, эсвэл пост руу хүчээр дайрч орох гэсэн тохиолдол гараагүй. Иргэд харьцангуй ухамсартай, хүлээцтэй хандаж байна" гэсэн юм.
Нийслэл рүү нэвтрэх боломжтой "хулгайн" гэх замуудад зөвхөн Тээврийн цагдаагийн алба бус нийслэл, дүүргийн цагдаагийн алба хаагчдаас гадна мэргэжлийн хяналт, онцгой байдал зэрэг албадын алба хаагчид 24 цагаар үүрэг гүйцэтгэж байгаа юм байна.
Энэ талаар ЦЕГ-аас тодруулахад “Энэ сарын 26-нд Шижирийн даваагаар Улаанбаатар хот руу нэвтрэхийг завдсан нийт долоон жолоочийг илрүүлж, саатуулсан. Тэдгээрт Зөрчлийн тухай хуулиар хариуцлага тооцохоор материалжуулан шалгаж байна.
Хуульд зааснаар 150 мянган төгрөгөөр торгоно.
Эдгээр жолооч нар бүгд хөдөө орон нутгаас ирсэн хүмүүс. Өмнө нь буюу шинийн 1, 2-нд нийт таван тээврийн хэрэгсэл хулгайн замаар нэвтрэх гэснийг буцаасан. Улаанбаатар хотоос гарах, орох бүх хөдөлгөөнийг хязгаарласан хугацааг сунгасан Улсын онцгой комиссын шийдвэр гарах үед постуудын хөл хөдөлгөөн нэмэгдсэн. Иргэдийн зүгээс “Энэ сарын 27-ны өдрийг хүртэл хөдөлгөөн хаасан биз дээ" гэдэг асуудлыг тавьж, бухимдсан. Энэ үед нийслэл рүү нэвтрэх бүх постын асуулал нэмэгдсэн. Ихэнх иргэдийн хувьд автозамын хөдөлгөөнийг ирэх гуравдугаар сарын 2-ны өдөр хүртэл хаах тухай шийдвэрийг мэдээгүй байсан юм билээ.
Хулгайн замаар нийслэл рүү нэвтрэх гэсэн долоон тээврийн хэрэгслийн жолооч нарын хувьд уг шийдвэрийг бүгдээрээ мэдэж байсан. Тиймдээ ч хулгайн замаар нууцаар нэвтрэх гэж оролдсон байна лээ” гэсэн юм.
Яг одоогийн байдлаар Улаанбаатар хотын эргэн тойронд төв зам дахь найман пост болон хулгайн замуудад холбогдох албанаас хяналт шалгалт хийж байна. Дээр хэлсэнчлэн төв замын постоор хууль, журам зөрчиж нэвтрэх гэсэн оролдлого харьцангуй гайгүй байгаа бол хулгайн замаар нэвтрэх гэсэн, цагдаагийн алба хаагчдыг хараад зугтах гэсэн үйлдэл мэр сэр гарсаар байгаа аж.
Тиймээс хорио цээрийн дэглэм тогтоосон энэ өдрүүдэд Улсын онцгой комиссын шийдвэрийг ухамсарлаж, цагдаагийн алба хаагчдын тавьсан шаардлагыг биелүүлэхийг нийт иргэдэд уриалж байна.
Г.Маргад
Сэтгэгдэл (15)