Кёкүшүзан Д.Батбаярыг ашигт малтмалын тусгай зөвшөөрлийг наймаалцсан гэх мэдээлэл цацагдсан билээ. Уг асуудалтай холбогдуулан түүний өмгөөлөгч н.Оюуболд мэдээлэл хийлээ.

Тэрбээр “Анхаар, АН-ын нөхдүүд ашигт малтмалын тусгай зөвшөөрлийг хятадуудтай нийлж зарлаа” гэсэн гарчигтай бичлэг цацагдсан. Мөн төрийн албаны долоон хүний нэр дурдагдсан 65 минутын бичлэг гэх нэвтрүүлэг цацагдсан. Бидний зүгээс эдгээр бичлэгийг хэн хийж цацсан бэ гэдгийг илчлэх гэсэн юм. Бичлэгийг Цэдэн овогтой Алтанцог гэж хүн хийсэн.

Энэ хүн 1990-ээд онд залилан мэхлэх гэмт хэрэг үйлдэж, 2000 оны үед суллагдсан. 2007-2009 онд дахин залилах гэмт хэрэг хийж, улмаар улсын хилээр гарч явсан. Эргээд 2019 онд Монголд ирэхдээ хуучны танил хүмүүстэй уулзаж, ярилцахдаа бичлэг хийсэн. Үүнд Цэрэндор, Бямбаа, Кёкүшүзан Д.Батбаяр гэсэн хүмүүсийн нэр дурдагддаг. Эдгээр хүмүүстэй 2019 оны гуравдугаар сараас наймдугаар сар хүртэлх хугацаанд 2-3 удаа уулзахдаа хийсэн бичлэгийг эвлүүлж цацсан.

Бичлэгийг хийхдээ ажил төрлийг сонирхож асуух замаар хийсэн. Бичлэг хийсний дараа нэр бүхий сэтгүүлч, телевизэд хандсан. Өөрөөр хэлбэл, бичлэгийг эвлүүлж монтажлаад  Кёкүшүзан Д.Батбаяраас “Нэг тэрбум төгрөг нэхэмжлэе, үүнийхээ 60 хувийг авна. Үлдсэн 40 хувийг та нар ав” гэсэн. Нийтдээ 10-15 хүний дэргэд ярьсан зүйл. Үүнийг гэрчлэх гэрч бий.

Үүнээс гадна өөрийгөө сахарын өвчтэй, хорт хавдартай гэж уулзсан хүмүүстээ хэлэх замаар өрөвдүүлж мөнгө авдаг. Тухайлбал, Цэрэндорж гэдэг иргэнээс 60 төгрөгийн үнэтэй автмашин, Цогоо гэж хүнээс 10 сая төгрөг, 10 мянган ам.доллар, Кёкүшүзан Д.Батбаяраас 1800 ам.доллар болон таван сая төгрөг авсан.

Бичлэгт дурдагдсан тусгай зөвшөөрлийг 32 сая ам.доллараар зарсан гэдэг асуудал нь бодит амьдрал дээр огт болоогүй. Түүнчлэн Кёкүшүзан Д.Батбаярын банкны харилцах данс руу ийм хэмжээний мөнгө битгий хэл нэг ам.доллар ч шилжиж ороогүй. Нотлох баримтаа хуулийн байгууллагад гаргаж өгсөн, шалгаж байна. үүссэн нөхцөл байдалтай холбогдуулан Кёкүшүзан Д.Батбаяр болон Цэрэндоржын зүгээс цагдаагийн байгууллагад гомдол гаргасан. Гомдлыг шалгаж байгаа.

Ц.Алтанцог нь залилах гэмт хэрэгт төгсөрсөн. Бүр “Ангайтал залилдаг Алтанцог” гэдэг номыг нэр бүхий сэтгүүлч бичиж, хэвлүүлж байсан түүх бий.

Өөрөөр хэлбэл, эдгээр бичлэг бол эвлүүлэг. Энгийн ямар ч хүн сонсоод үүнийг анзаарч мэдсэн байх.

Үүний дараа сэтгүүлчдийн асуусан асуултад хариуллаа.

-Бичлэгт нэр дурдагдсан долоон иргэний данс руу мөнгөн шилжүүлэг хийгдээгүй гэдгийг юугаар нотлох юм бэ?

-Бид Хан-Уул дүүргийн цагдаагийн газарт гомдол гаргасан. 20 сая төгрөгөөр дээш гүйлгээг Монголбанк шалгадаг. Дээрх хүмүүсийн данс руу БНХАУ-аас ам.доллар шилжиж ороогүй. Кёкүшүзан Д.Батбаярын банкны дансны хуулгыг авч, цагдаад өгсөн.

-Кёкүшүзан Д.Батбаяр 500 сая төгрөгийн талаар ярьж байгаа нь бичигдсэн байна лээ. Энэ ямар учиртай юм бэ?

-2020 онд сонгууль болно. 2019 оноос манай үйлчлүүлэгчтэй холбоотой сөрөг мэдээлэл гарч эхэлсэн. Ц.Алтанцог гэж хүн биднийг яаж залилсан бэ гэдэг асуудлыг хуулийн байгууллага шалгаж байна. Олон нийтэд цацагдсан бичлэгт 20 сая төгрөгийг сэтгүүлчид өгсөн гэдгийг би сонсоогүй. Өмгөөлөгчийн зүгээс нэг зүйлийг хэлэхэд бичлэг хийгдсэний дараа телевизийн нэр бүхий сэтгүүлчид хандсан гэсэн. Тэр сэтгүүлч ёс суртахуун өндөртэй хүн байсан учир нь энэ хууль бус зүйлээс татгалзсан байдаг. Яг энэ үед Цэрэндорж гэж хүн цагдаагийн байгууллагад хандсан гэсэн. Хэрэг яаж шийдэгдсэнийг мэдэхгүй.

-Бичлэгийг яг хаана, яаж эвлүүлсэн гэж бодож байна вэ. Дуу хоолойг дуурайлгаж эвлүүлдэг программ ашигласан гэж үзэж байна уу?

-Кёкүшүзан Д.Батбаярын хувьд бичлэгт нэр дурдагдсан хүмүүстэй нэг дор хэзээ ч уулзаж байгаагүй. Хамт уулзсан мэтээр эвлүүлсэн байна лээ. Харин Ц.Алтанцог гэж хүнтэй 2019 оны 4-5 сарын хооронд гурван удаа өөрийн ажлын өрөөнд уулзсан. Ц.Алтанцог гэж хүн уулзах хүсэлт тавиад “Хавдартай болчихлоо. Эмчилгээний мөнгө алга. Туслаач” гэж тусламж хүссэн учир уулзсан. Тухайн үед туслах нь 1800 ам.доллар болон таван сая төгрөг өгсөн. Гэрч бий.

- Кёкүшүзан Д.Батбаярын дуу хоолой биш гэж байгаа юм уу?

-Би гэж хэзээ ч хэлээгүй. Олон удаагийн ярьсан зүйлийг өөр хооронд нь хольж эвлүүлсэн зүйл.

-"Хо" гэдэг хүний талаар бичигдсэн байна лээ. Энэ хятад хүн юм уу?

-Кёкүшүзан Д.Батбаярын ажлын хамтрагч Ганхолбоо гэж монгол хүн. Найз нөхөд нь "Хо" гэж дууддаг. 

Г.Маргад