Өнгөрсөн 2018 оны гуравдугаар сард Ховд аймагт алт олборлохоор очсон нэр бүхий таван иргэн бусад руу буугаар буудаж, нэг иргэний амь насыг хохироож, гурван иргэнийг хөнгөн гэмтээсэн хэрэг гарсан билээ. Тэгвэл уг хэргийг тус аймгийн Булган сум дахь сум дундын прокурорын газраас шүүхээр шийдвэрлүүлсэн байна.
Хэргийг Ховд аймгийн Булган сум дахь сум дундын Цагдаагийн хэлтсээс шалган, прокурорын газраас хяналт тавьж Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1, 2.5, 20.16 дугаар зүйлийн 2 дахь хэсгийн 2.1, 24.2 дугаар зүйлийн 1 дэх хэсэгт зааснаар яллах дүгнэлт үйлдэж, Баян-Өлгий аймгийн Эрүүгийн хэргийн анхан шатны шүүхэд шилжүүлжээ.
Шүүх хэргийг энэ сарын 05-ны өдөр хянан хэлэлцээд, шүүгдэгч С-ийг бусдыг онц харгис хэрцгийгээр алсан, бусдын эрүүл мэндэд хүнд хөнгөн хохирол учруулсан гэм буруутайд тооцож 19 жилийн хорих ял оногдуулан, ялыг хаалттай хорих байгууллагад эдлүүлэх, мөн шүүгдэгч С, Б, М, П нарыг нийтийн хэв журмыг зөрчиж, бүлэглэн зэвсгийн чанартай зүйл хэрэглэн бусдад халдсан, эд хөрөнгө устгаж гэмтээсэн гэм буруутайд тооцож 2-3 жилийн хорих ял тус тус оногдуулж, ялыг нээлттэй хорих байгууллагад эдлүүлэхээр шийдвэрлэсэн байна.
Г.Маргад