Баян-Өлгий аймгийн Толбо сумын 5-р баг “Цагаан дов” гэдэг газарт энэ сарын 22-ны 18.30 цагийн үед марк, улсын дугаар тодорхойгүй автомашинтай жолооч мотоцикльтэй явсан 16 настай хүүхдийг мөргөж хүнд гэмтээжээ. Улмаар гэмтсэн хүүхдийг эмнэлэгт хүргэж өгөхдөө “МОТОЦИКЛТОЙГОО ЯВЖ БАЙГААД ОНХОЛДСОН БАЙХААР НЬ АВААД ИРЛЭЭ” гэж хэлээд хэргийн газраас зугтсан байна. Уг хэргийн дагуу цагдаагийн байгууллагаас шалгалт хийхэд сумын төвөөс 70 км- ийн зайд байх гэртээ очиж бөгөөд ослыг нуун дарагдуулах үүднээс автомашины эвдэрсэн гэрэл, дохио сольсон байсныг Баян-Өлгий аймгийн Цагдаагийн газрын алба хаагчид шуурхай илрүүлжээ.
Мотоциклийн жолооч 16 настай, эрэгтэй Т нь сумын эмнэлэгт хүргэгдэн очоод 30 орчим минутын дараа нас барсан байна.
Иймд зам тээврийн осолд холбогдсон жолооч Монгол Улсын замын хөдөлгөөний дүрэмд зааснаар “Хүний амь нас, эрүүл мэнд хохирол учирсан тохиолдолд осол, хэргийн газраас тээврийн хэрэгсэл, нотлох баримт болох эд зүйлсийг хөдөлгөхгүй байх, Цагдаагийн байгууллагад заавал мэдэгдэх” үүргээ биелүүлэх, мөн мотоциклийг “А” ангиллын жолоодох эрхийн үнэмлэхтэй, хамгаалах малгайтай, 18 насанд хүрсэн хүнээр жолоодуулж, мотоциклийнхоо техникийн бүрэн бүтэн байдлыг хангаж хөдөлгөөнд оролцохыг ТЭЭВРИЙН ЦАГДААГИЙН АЛБАНААС анхааруулж байна.
Сэтгэгдэл (3)