Өмгөөлөгч Х.Ялалт тусламж хүссэн иргэдэд хууль зүйн үнэгүй үйлчилгээ үзүүлээд жил гаруй хугацаа өнгөрчээ. Энэ хугацаанд тэрбээр 70 орчим хэрэг шийдвэрлүүлэх байна. Ингээд түүнтэй хэсэг хором ярилцсанаа хүргэе.
-Та өөрийгөө манай уншигчдад товч танилцуулахгүй юу?
-МУИС-ийн Хууль зүйн сургуулийг 2011 онд эрх зүйч мэргэжлээр төгссөн. Сургуулиа төгссөнийхөө дараа “Капитрон” банкинд ахлах хуульчаар долоон жил дадлагажих байдлаар ажилласан. 2019 оноос эхлэн өмгөөлөгчөөр ажиллаж байна.
-Таны хувьд ямар чиглэлээр өмгөлөөллийн туслалцаа үзүүлдэг вэ?
-“Мэргэн хуульч” хуулийн фирмд харьяалагддаг. Үнэ төлбөргүй зөвлөгөөг 2019 оны нэгдүгээр сараас эхлэн өгч байна. Банкны зээл, хувийн эрх зүйн асуудлаар ихэвчлэн зөвлөгөө өгдөг. Одоогоор өмгөөллийн туслалцаа авч байгаа 25-30 орчим хүн байна. Өмгөөлөгч болсноосоо хойш 50-70 хэрэг шийдвэрлүүлсэн гэж хэлж болно. Карантин тогтоосонтой холбогдуулан хүмүүсийг олноор нь цуглуулж болохгүй учраас ажлын өдрүүдэд яаралтай шаардлага гэсэн иргэдийг заавал ирүүлэхгүй эсвэл аль боломжийг нь тааруулж зөвлөгөө өгч туслаж байна.
-Иргэдийн хувьд ихэвчлэн ямар асуудлаар хандаж байна вэ?
-Хүүхдийн тэтгэлэг, тэтгэмж, банкны зээлтэй холбоотой асуудлаар ихэвчлэн ханддаг байсан бол сүүлийн үед банкны зээл, карантинтай холбоотойгоор ажлын байрны цомхотголд орсон хүмүүс олноор хандаж байна.
-Өдөрт хэчнээн хүн үйлчлүүлэх боломжтой вэ?
-Ихэвчлэн 3-4 хүн үйлчлүүлдэг. Үүнээс олон болоод эхлэхээр ажилдаа анхаарах боломжгүй болчихдог. Амралтын өдрүүдээр хоёр цагийн хугацаанд 20 орчим хүн үйлчилгээ авчихдаг.
-Иргэдийн хувьд гол алдаж байгаа зүйл нь юу байна вэ?
-Гэрээний хэлцэл байгуулахдаа гэрээгээ бүрэн уншихгүй байна. Гэрээний заалтад юу тусгагдсан талаар ямар ч ойлголтгүй. Зүгээр ярьж байгаад гэрээ байгуулдаг тийм алдаа их хийж байна. Уг нь гэрээний заалт бүрийг уншиж, ойлгомжгүй байвал хуульчаас асууж, тодруулах ёстой. Тэгээгүйн улмаас асуудалд орсны улмаас 2-3 сая төгрөгөөр өмгөөлөгч авах шаардлага үүсдэг. Тиймээс энэ тал дээр сайн анхаарах хэрэгтэй байна.
-Иргэд гэрээний заалтаа уншилгүй гарын үсэг зурсан үед хэрэг маргааныг нааштай шийдвэрлэгдэх боломж хэр байдаг юм бэ?
-Тухайн нөхцөл байдлаасаа хамаардаг. Залхуурах боломжтой асуудал ч бий. Гэхдээ уншаагүй ч гэсэн гарын үсэг зурна гэдэг цаанаа уншсан гэдэг агуулгыг илэрхийлдэг учраас нотлоход их бэрхшээлтэй. Амаараа ярихдаа өөр зүйл тохирсон гэж байгаа боловч тухайн хүн төөрөгдөлд орж, ухамсарлаагүй гэдгийг нотлох хэрэгтэй болдог. Нийт маргааны 30-40 хувь нь шийдвэрлэгдэх боломжтой байдаг. Хамгийн гол нь хүн бүр гэрээнд гарын үсэг зурчихаад би ойлгоогүй гээд маргаад байвал гэрээ байгуулсны хэрэг байхгүй шүү дээ.
Б.Лхам