УИХ-ын Төрийн байгуулалтын байнгын хорооны энэ сарын 28-ний өдрийн хуралдаанаар Сонгуулийн ерөнхий хорооны орон тооны бус гишүүн Р.Содхүү, Ө.Энхтөр нарыг чөлөөлж,  оронд С.Баатаржав, Б.Баасандорж нарыг томилох асуудлыг хэлэлцсэн юм.

Нэр дэвшигч С.Баатаржав нь Цагдаагийн ерөнхий газрын даргаар ажилладаг. Харин  нэр дэвшигч Б.Баасандоржийн хувьд Улсын бүртгэлийн ерөнхий газрын даргаар ажиллаж байна. Эдгээр хоёр нэр дэвшигчийн хувьд төрийн албаны дадлага туршлагатай, мэргэшсэн төрийн жинхэнэ албан хаагч гэдэг утгаараа гишүүдийн олонхийн дэмжлэгийг хүртсэн. Энэ дагуу нэр дэвшигчдийг томилох асуудлыг УИХ-ын нэгдсэн чуулганд танилцуулах журамтай.

Ташрамд дурдахад, Сонгуулийн төв байгууллагын тухай хуульд Сонгуулийн ерөнхий хорооны гишүүдийн тавыг нь Төрийн байгуулалтын байнгын хороо, хоёрыг нь Монгол Улсын Ерөнхийлөгч, хоёрыг нь Улсын дээд шүүх төрийн жинхэнэ албан хаагчдаас санал болгосноор УИХ-аас зургаан жилийн хугацаатай томилох хуулийн заалттай юм.