“Зүрхний цоорол оноштой дүүд минь туслаач” гэж хуурамч зураг ашиглан, 400-1500 удаагийн үйлдлээр бусдыг залилж, хандив цуглуулсан хэрэг гарчээ. Тодруулбал, өнгөрсөн хоёрдугаар сарын 16-ны өдрөөс гуравдугаар сарын 06-ны өдрийн хооронд Цастболор, Мөнх Учрал гэх цахим хаягаар “Миний дүү зүрхний тосгуур хоорондын цоорол оноштой Солонгос улсад хэвтэн эмчлүүлж байна. Нийт таван сая төгрөг шаардлагатай тул та бүхнээс тусламж хүсэж байна” гэх хандивын аян өрнөсөн юм. Уг мэдээллийг шалгахад 1997 онд төрсөн иргэн М нь худал мэдээлэл оруулж, "Хаан" банкны 5953052540 данс, "Голомт" банкны  1705155705 дугаартай дансаар нийт 400 удаагийн үйлдлээр мөнгө шилжүүлэн авчээ. 

Мөн 2000 онд төрсөн эмэгтэй М гэгч нь 2020 оны гуравдугаар сарын 04-ний өдрөөс гурав дугаар сарын 18-ны өдрийн хооронд Tungalag Tungaa, М.Гантунгалаг, ТЛМН С, гэх цахим хаягаар дээрх утга бүхий хуурамч мэдээллийг оруулж, "Хаан" банкны 5053102834 дансны дугаараар бусдаас 1500 орчим удаагийн үйлдлээр мөнгө шилжүүлэн авч гэмт хэрэг үйлджээ. Уг хэргийг Хан-Уул дүүрэг дэх цагдаагийн газрын нэгдүгээр хэлтсээс шалгаж тогтоон Эрүүгийн хуулийн тусгай ангийн 17.3 дугаар зүйлийн 1 дэх хэсэгт заасны дагуу хэрэг бүртгэлтийн хэрэг нээн холбогдох шалгалтын ажиллагааг явуулж эхэлжээ.

Тиймээс дээрх этгээдүүдэд мөнгө шилжүүлж залилуулсан иргэн, байгууллага тус цагдаагийн хэлтсийн 94945423, 88220055, 99036520 дугаарын утсаар холбогдон мэдээлэл авах, ХУД-ийн цагдаагийн газрын нэгдүгээр хэлтэст өөрийн биеэр ирж уулзах боломжтой юм байна. 

Мөн цаашдаа ямар нэгэн хандив тусламж өгөхдөө мэдээллээ сайн баталгаажуулахыг анхааруулж байна.