Төр, нийгмийн зүтгэлтэн С.Зоригийн амь насыг хөнөөсөн хэргийг төрийн нууцаас гаргах ёстой гэдгийг нэр бүхий өмгөөлөгч нар мэдэгдлээ. Тодруулбал, өмгөөлөгч Б.Мэргэн, Г.Батбаяр нар нь эрүүдэн шүүлтээр шүүхийн хаалга татаад буй Б.Хурц нарын есөн иргэний хууль ёсны төлөөлөл юм.

Энэ талаар өмгөөлөгч Б.Хурц "Төрийн болон албаны нууцын тухай хуулиар тухайн хэргийн хугацаа дууссан бол эсвэл шинээр үүссэн нөхцөл байдал тогтоогдвол ил болгож болно. Нэгэнт түмний дунд ил болсон бол заавал нууцлах шаардлага байхгүй.

Гэхдээ ил болгох гэсэн хүнийг нь биш мэдээллээ алдсан хүнд хариуцлага хүлээлгэдэг хуультай. Төрийн нууцад хамааруулсан нь тодорхой зорилготой. Өөрөөр хэлбэл, 1998 онд үйлдэгдсэн гэмт хэргийг илрүүлэхэд улс төрийн ямар нэг нөлөө орох вий, ямар нэг байдлаар саад учруулах вий гэж нууцалсан. Хэргийн хугацаа дууссан, буруутай этгээдүүдийг олж тогтоож, шүүхээс ял шийтгэсэн юм чинь нууцын зэрэглэлээс гаргах ёстой. Бид ҮАБЗ-д хүсэлт өгсөн. Хариу авч чадаагүй найман сар болж байна. Хэргийн өмгөөлөгч нар нууцын зэрэглэлтэй материалтай танилцаж байна, нууц задруулахгүй гэж гарын үсэг зурж баталгаа гаргаж өгсөн. Гэтэл зарим хүмүүс энэ хэргийн талаар янз бүрээр ярьж байна. Энэ мэдээллийг яаж олж авч үзэж байгаа нь их сонин. Ийм байхаар шүүгч нар хүссэн хүсээгүй олон нийтийн сүлжээний давалгаанд өртөж, хараат бусаар шийдвэр гаргах боломжгүй болж байна.

УИХ-ын гишүүн Ж.Батзандан, Л.Болд нар “Өмгөөлөгч нар шүүгч нарыг дарамталсан, ална гэсэн. Шүүгч нартай хуйвалдсан” гэж худал мэдээлэл цацсан. Даанч дээ.

Аргаа бараад цагдаад өгсөн. Шалгах байлгүй. Ж.Батзандан гэдэг хүн гурван жил эрэн сурвалжлагдаж байна. Уг нь Төрийн ордонд байгаа биз дээ. Юунд нь эрэн сурвалжилдаг байна аа. Ордонд ороод гомдол мэдээллийг танилцуулж болно биз дээ" гэлээ. 

Г.Маргад