Өнгөрсөн 2018 онд Сүхбаатар дүүргийн VII хорооны нутаг дэвсгэрт үйл ажиллагаа явуулдаг “Эко Шинэс” эмийн сангийн үүдэн дэх цахилгааны ил мантожнаас болж есөн настай хүү цаг бусаар амиа алдсан билээ. Уг хэрэгт холбогдуулан “Дэлгэр тур” ХХК захирал С.Энхжаргалд нэг жилийн хорих ял, “Эко Шинэс” эмийн сангийн эрхлэгч Г.Ганпүрэвийг гэм буруугүй гэж шүүхээс үзсэн байдаг. Талийгаач хүүгийн ар гэрийнхэн шүүхийн эл шийдвэрийг хүлээн зөвшөөрөөгүй учир давж заалдах шатны шүүхэд хандсан аж.

Ингээд давж заалдах шатны шүүхээс эмийн санг түрээслэгч Г.Ганпүрэвт 15 сарын хорих ял оноосон бол тухайн барилгын эзэн буюу “Дэлгэр тур” ХХК-ний С.Энхжаргалд нэг жилийн тэнсэн харгалзах ял оноожээ.

Шүүхээс уг шийдвэрийг гаргахдаа Эрчим хүчний газартай гэрээ байгуулсан “Дэлгэр тур” ХХК учир захирал С.Энхжаргал нь гэрээгээр хүлээсэн үүргээ биелүүлээгүй, хүний амь насыг болгоомжгүйгээр хохироосон гэдэг зүйл ангиар нэг жилийн тэнсэн харгалзах ял оногдуулсан байна.

Ташрамд дурдахад, “Итгэлт инвест” газраас талийгаач хүүгийн амь насыг 220 сая төгрөгөөр үнэлсэн байдаг. Гэхдээ шүүхээс 40 сая төгрөгийг гэм хорын хохирол, харин хүүгийн амь насыг 25 сая төгрөг үзсэн юм.