Ерөнхийлөгч Х.Баттулга зарлиг гаргаж, Анхдугаар чуулганыг нээлээ. Чуулганыг нээж, тэрбээр үг хэлэхдээ хэд хэдэн эргэлзээ дагуулсан асуулт үлдээв. Нэгдүгээрт, УИХ-ын сонгуульд нэр дэвшсэн 606 хүнээс 27 нь 31 гэмт хэрэгт холбогдож хуулийн байгууллагаар шалгуулж байгааг дурдлаа. Мөн нэр дэвших эрхээ авсан ч, сонгуулийн сурталчилгаа хийх явцдаа шүүхийн шийдвэрээр цагдан хоригдсон зургаан хүнийг онцлов. Хоёрдугаарт, Сонгуулийн ерөнхий хорооны удирдлага 2009 оноос хойш солигдоогүй нь өнөөдрийн ялзрал, биеэ тоосон хандлага үүсгэснийг ярьсан юм. Эдгээр шалтгаанаас үүдэж Сонгуулийн ерөнхий хорооны удирдлага өргөдлөө өгч, огцрохыг Анхдугаар чуулганы индэрээс тэрбээр шаардав.

Өөрсдийнх нь зөвшөөрөлгүйгээр шүүхийн шийдвэрийг үндэслэж, сурталчилгааны явцад нэр бүхий зургаан хүнийг саатуулсан нь мэдээж Сонгуулийн ерөнхий хорооны буруу.

Тухайн цаг үед нь холбогдох тайлбарыг хийж, хуулиа биелүүлэхийг шаардаагүй нь тэдний алдаа. Үүгээр нь Ерөнхийлөгч Х.Баттулгыг зөвтгөж болох ч түүний хэлсэн зарим үг агуулгынхаа хүрээнд өөрийгөө үгүйсгэсэнтэй агаар нэг цочир туслаа. Учир нь, 2020 оны УИХ-ын сонгуульд нэр дэвшигчдээс 27 нь 31 гэмт хэрэгт холбогдуулж шалгуулж байхад нь үнэмлэх олгосноороо Сонгуулийн ерөнхий хороотой буруутай гэж үзвэл энэ нь Ерөнхийлөгч Х.Баттулгад ч хамаарах нь. Юу гэхээр 2017 оны Ерөнхийлөгчийн сонгуульд Х.Баттулга нэр дэвших эрхээ авахдаа яллагдагчаар татагдсан статус нь хэвээрээ байсан тухай хуулийн байгууллагаас холбогдох тайлбар, одоо ч хэвлэлийн хуудаснаа шарлаагүй байна.

Тухайн үед Ерөнхийлөгчийн сонгуулийн сурталчилгаа эхэлсэн өдөр буюу зургадугаар сарын 6-нд МАН-ын нэр бүхий УИХ-ын гишүүд мэдэгдэл хийж Х.Баттулгатай холбоотой баримтуудыг дэлгэж байсан юм.

Мөн Х.Баттулгыг сэжигтэн үү, яллагдагч уу, шүүгдэгч үү гэсэн статусыг нь тодорхойлох, хэргийг хаасан бол түүнийгээ сонгогчдод хэлж мэдээлэхийг Үндэсний аюулгүй байдлын зөвлөл, АТГ, ТЕГ, УПЕГ, ЦЕГ-аас шаардаж байв. Гэвч Х.Баттулга хуулийн байгууллагаар шалгуулж байгаа эсэх нь тодорхойгүй явсаар эцэстээ тав дахь Төрийн тэргүүнээр сонгогдсон байдаг. Тэгэхээр 2009 оноос хойш удирдлагад нь салхи оруулаагүйгээрээ буруутан болсон Сонгуулийн ерөнхий хорооны алдаатай үйл ажиллагааны нэг илрэл нь Х.Баттулга өөрөө болж таарах нь.

Сонгуулийн ерөнхий хороонд үнэхээр асуудал бий бол түүнийг засч, сайжруулах ажлыг 2017 онд Ерөнхийлөгчөөр сонгогдож, тангараг өргөсөн өдрөөсөө Х.Баттулга дуугарах ёстой байлаа.

Гэвч өнөөдрийг хүртэлх хугацаанд хууль, шүүхийн байгууллага, парламент тойрсон томилгоонд анхаарал хандуулж ирсэн Ерөнхийлөгч Х.Баттулга гэнэт сэрсэн юм шиг дуугарч, шүүмжилсэн нь түүнийг ирэх онд болох сонгуульдаа эртнээс бэлдэхээр бууриа засч байна гэж хардахаас өөр аргагүй. 

Ташрамд өгүүлэхэд Ерөнхийлөгчийн хэлснээр "огцрох" болзлоо хангасан Ч.Содномцэрэн нь АН-ын угшилтай нэгэн.

АН эрх барьсан 1996-2000 онд  Хөдөө аж ахуйн сайд, 2004-2008 онд УИХ-ын гишүүн, Байнгын болон Ёс зүйн дэд хорооны даргаар ажиллаж байгаад 2009-2012 оныг хүртэл Сонгуулийн ерөнхий хорооны нарийн бичгийн даргын албатай явсан хүн. АН Засгийн эрхийг барьж байхдаа буюу 2012 оны аравдугаар сард Ч.Содномцэрэнг Сонгуулийн ерөнхий хорооны даргад нэрийг нь дэвшүүлж, томилоход Х.Баттулга Үйлдвэр, хөдөө аж ахуйн сайдаар ажиллаж байв.

Г.Эрхэс