Монголдоо хамгийн анх түүхэн  киноны хөгжмөөр тоглолт хийх гэж  байгаа хөгжмийн зохиолч, төгөлдөр хуурч Б.Чинбатыг  уншигчидтайгаа уулзуулахаар  “On&Off” продакшнийг зорьсон юм.

-Түүхэн “Арав” киноны хөгжмөөр тоглолт хийх гэж байгаа. Тоглолтынхоо бэлтгэл ажилд ороод байгаа юу?
-Ерөнхийдөө бол энэ тоглолт нь  киноны хөгжмөөр тоглогдох  гэж байгааг хүн болгон мэдэж байгаа байх. “Аравт “ кино ард түмэнд танигдаад нэлээдгүй хугацаа өнгөрчихлөө.  Сэтгэлийн бүтээл, онгод хийморийн бүтээл учраас  энэ хөгжмийг   тоглох  туйлын хүсэл  байлаа.  Энэ тоглолтонд маань Намсрайжавын нэрэмжит 60 хүнтэй симфони оркестр, Монгол улсын дуурь бүжгийн эрдмийн театрын хоор , найрал дуучид, манай Монголын маш чансаа өдөр, гайхамшигтай  ардын хөгжимчид болох  “ятгын хатан хаан” Ч.Мөнх-Эрдэнэ,  Л.Мөрдоржийн нэрэмжит ардын хөгжимчдийн улсын уралдааны гранпри шагналт морин хуурч  Д.Шинэцог,  лимбэчин Адьяа, ёочинчин Шүрэнцэцэг гэсэн ийм хүмүүсээс бүрдсэн сэтгэлийн тоглолт болно.  Одоогоор бэлтгэл ажил сайн явагдаж байна.  Ч.Мөнх-Эрдэнэ,  Д.Шинэцог  хоёр маань Америкаар яг  тоглолт хийгээд явж байгаа.  Гэвч тэд  саяхан тоглолтынхоо ноотыг авсан. Ингээд тоглолтынхоо хажуугаар  бэлдэж эхэлсэн.

-Таны тоглолтыг  аравдугаар сард л гэхээс яг өдөр нь тодорхойгүй мэдээллүүд гараад байгаа.  Одоо бэлтгэлдээ орсон юм чинь өдөр нь мэдээж тодорхой болсон биз дээ?
-Өдөр нь товлогдчихлоо. Ирэх сарын 17, 18,19 гэсэн гурван өдөр Аса циркэд болно. Мөн тоглолтоо “Эзлэн” хэмээн нэрлэсэн. Эзлэх гэсэн үгнээс улбаатай энэхүү санаагаараа их хаан эзэн Чингисийн дэлхийн талыг эзэлж байсан эгэлгүй их гавьяа, үүнээс үүдэн урсан гарсан хөгжмийн яруу эгшиг хурсан олны сэтгэлийг эзэмдэхийг бэлгэдэн өгсөн билээ. Хөгжим бол тэнгэрийн оддыг солбин нисэх, тэнгисийн мандлаар булгин давхих эрх чөлөө минь билээ.

“Ирээд сонс. Таны сэтгэлийг эх түүхийн хөгжим эзэмдэх болно, эзлэх болно. Эх түүхээрээ бахархцгаая” гэж хэлмээр байна даа.

-Өнөөдөр би таны тоглолт гэхээс илүү Сарнай эгчийн талаар, бяцхан охин Мишээлийн талаар яриа өрнүүлэхээр зорьж ирсэн юм. Тоглолтын бэлтгэл гээд Ч.Мишээл охиндоо цаг зав гаргаж чадахгүй л гүйгээд байна уу?
-Ер нь бол аль чадахаараа цаг гаргаж байгаа. Одоохондоо бас цаг агаар дулаан байгаа учраас  аль болох эрүүл  агаарт  гаргачих юм сан гэдэг үүднээс хөдөө их явж байгаа.  Мишээл  ерөөсөө төрсөн цагаасаа л ээж аавыгаа дагаад дандаа л аялж байгаа. Байнга л явж байдаг.  Япон, Солонгос гээд л бас хөдөө орон нутгаар. Тиймээс замын аян даадаг болчихсон. Ажаад байхад өөрөө ч явах дуртай юм шиг байгаа.  Тэгээд бас их нийтэч, хүнээс бишүүрхэдэггүй  хүүхэд юм шиг ээ.  Замдаа таарсан хүмүүс рүү гараа даллаад сайн уу, баяртай л гээд байдаг.

-Ц.Сарнай эгчийн тухай бас яриач. Ханийн хувьд, эх хүний хувьд?
-Эхнэрээ магтддаггүй гэдэг дээ. Тэгвэл би бол эсрэгээр нь харин ч магтдаг. Би бол өөрийгөө маш их азтай хүн гэж боддог. Ямарваа хүний амьдрал чин бас гэр бүлээсээ шалгаалдаг учраас бид хоёр бие биендээ л заяасан  хүн гэж боддог.

-Эмэгтэйчүүдийн ямар ааш зан давамгайлж байвал зүгээр бол оо таны бодлоор?
-Хүн болгон л өөр өөр. Гэхдээ өөрийнхөө хайртай гэргийгээ төлөөлөөд ярьчихад эрэгтэй хүн бол хамгийн нэгдүгээрт хоолонд дуртай. Тиймээс гэрийн эзэгтэй хүн бол маш сайхан хоол хийдэг байвал зүгээр байх. Миний хань бол үнэхээр сайн эхнэр, бас сайн ээж. Хүүхэдтэйгээ маш их тоглодог. Мишээлийг  бас багаас нь юм сургаад оюун ухаан нь их хурдан хөгжиж байгаа юм шиг санагддаг. Энэ бас  ээжийнх нь ач гэж би боддог.

-Эмэгтэй хүн бэлэг авах тэр тусмаа сонирхолтой сюрприз баривал маш их баярладаг юм шигээ. Хамгийн сүүлд Ц.Сарнай эгчийг хэзээ баярлуулав. Бэлэг хэр авч өгдөг вэ?
-Сарнай бол саяхан намайг баярлуулсан.  Өнгөрсөн сард миний төрсөн өдөр болсон юм. Удахгүй бас өөрийнх нь төрсөн өдөр болно. Тоглолт маань ч болоод төрсөн өдөр маань ч болоод давхар давхар баяр болно. Тэр үед ханиа баярлуулна даа. Ер нь бол дандаа баярлуулж байхыг хүсдэг. Ээжийгээ ч тэр, ханиа  ч тэр.

-Чөлөөт цаг таны болон гэр бүлийн чинь хувьд хэрхэн өнгөрдөг вэ?
-Чөлөөт цагаараа бид хоёр уул руу алхах дуртай.  Ууланд гарч алсыг ширтэх дуртай. Аль болох байгаль дэлхийтэйгээ л ойр байхыг хүсдэг. Бас бид хоёр хоёулаа нийлж бильяард тоглодог. Сарнай бол маш  сайн зохидог сайн бильяардчин.

-Хөгжийн зохиолч  болохыг мөрөөддөг энэ чиглэлээр суралцаж байгаа залуустаа хандаж зөвлөгөө өгөхгүй юу?
-Ер нь бол сайн хөгжимчин, сайн хөгжмийн зохиолч гэдэг нэгдүгээрт цаанаасаа төрдөг л юм билээ. Ажиглаад, анзаараад хараад байхад. Бурханаас заяасан төрөлхийн авъяас байдаг байх. Хоёрдугаарт энэ бол уйгагүй хөдөлмөрийн л ач гавьяа. Хэчнээн авьяас байгаад хичээхгүй бол бүтэхгүй. Энэ бүхнийг л урьдаас хараад хөдөлмөрлөх хэрэгтэй. Тэгээд мөрөөдөж явах юм бол биелдэг. Өөрөө бас амьдрал дээр хараад түүгээрээ бахархаж явж байна даа.

 -Хүн болгон л нэг хоббитой, цуглуулгатай байдаг.Таны хувьд?
-Уг нь тэмдэг цуглуулдаг байсан. Хэт их хөгжимд улайрсны хэрэг юм бол уу? Бүр орхигдсон. Харамсалтай нь бас манайх их олон нүүсэн. Тэгээд л нүүдэл дунд алга болсон.  Гэхдээ бас тэрийгээ дахиж сэргээвэл гоё л санагддаг юм. Тэмдэгээ цуглуулж эхэлвэл танай сайтын “хобби” буланд өгөх болно.

-Ярилцлагынхаа хамгийн сүүлийн  хормыг таньд үлдээе?
-Тоглолтоо Монголын чадвартай хүмүүсийг бүрдүүлж тоглож байгаа болохоор сэтгэлд их сайхан байгаа. Хамгийн гол нь хөгжимчид нь өөрсдөө дурлаж тоглож байгаа болохоор аяндаа тэр тоглолт их сайхан болдог. Ерөнхийдөө  энэ тоглолтын онцлог “Аравт” хөгжим бол бөмбөрийн нүсэр тоглолттой.  Энэ дээр бас бөмбөрийн грүпп байгуулсан.  Монголын мэргэжлийн чадвартай, цохиур хөгжимчид тоглоно. Мэдээж “Аравт” киног  хүмүүс үзсэн байх. Тиймээс гол дүрийн жүжигчин Д.Ганцэцэгийг зөвхөн жүжигчин биш дуучин юм аа гэдгийг энэ тоглолтон дээрээс харна.  Д.Ганцэцэг энэ тоглолтонд оролцож шуранхайлна. Сайхан шуранхайлдаг, чадалтай хоолойтой бүсгүй байдаг юм билээ. Энэ бас их сонин байх.