Өвөрхангай аймгийн аравдугаарт тойрогт нэр дэвшсэн нэр дэвшигчдийн маргаан өнгөрсөн мягмар гаригт эцэслэн шийдэгдэж, МАН-аас нэр дэвшсэн Н.Төмөрхүү, С.Чинзориг нарын нэрийг хасаж, АН-аас нэр дэвшсэн Г.Батхүү, Д.Зоригт нарыг нэр дэвшүүлэхээр болсон. Үүнийг МАН-ын эсэргүүцэж, жагсаал зохион байгуулахаа мэдэгдсэн. Ингээд СЕХ-ноос гаргасан шийдвэрийн талаар МАН-ын дарга Ө.Энхтүвшинтэй ярилцлаа.
    Өвөрхангай аймгийн аравдугаарт тойрогт нэр дэвшсэн нэр дэвшигчдийн маргаан өнгөрсөн мягмар гаригт эцэслэн шийдэгдэж, МАН-аас нэр дэвшсэн Н.Төмөрхүү, С.Чинзориг нарын нэрийг хасаж, АН-аас нэр дэвшсэн Г.Батхүү, Д.Зоригт нарыг нэр дэвшүүлэхээр болсон. Үүнийг МАН-ын эсэргүүцэж, жагсаал зохион байгуулахаа мэдэгдсэн. Ингээд СЕХ-ноос гаргасан шийдвэрийн талаар МАН-ын дарга Ө.Энхтүвшинтэй ярилцлаа.

-СЕХ-ноос МАН-ын хоёр гишүүнийг хасч, АН-аас нэр дэвшсэн Г.Батхүү, Д.Зоригт нарыг нэр дэвшүүлэхээр боллоо?

-Тийм. Энэ бол Монгол Улсад ардчилал байхгүй болсны том жишээ. Нэг ёсны сонгогчдын шийдвэрийг уландаа гишгэж байна гэсэн үг. Олонхийг бүрдүүлсэн улс төрийн хүчин өөртөө, өөрсдийнхөө эрх ашигт тааруулж, нийцүүлж, хууль бусад шийдвэрүүдийг гаргадаг хэм хэмжээг тогтоож байна. Шүүх, прокурор, АТГ, цагдаа, Үндсэн хуулийн цэц, СЕХ гээд хууль хүчний бүх байгууллагыг улс төрийн нэг хүчин, өөрийнхөө бүрэн хяналтдаа авч байгаа нь харагдаж байна. СЕХ ч гэсэн гэнэт хуралдаж, шийдвэрээ гаргасан. Уг нь Өвөрхангай аймгаас Г.Батхүү, Д.Зоригт нар бус Н.Төмөрхүү, С.Чинзориг нар УИХ-ын гишүүний тангараг өргөх ёстой байсан.

-С.Чинзориг, Н.Төмөрхүү нарыг түр үнэмлэхээ авахад нь тангарагийг нь өргүүлэх тухай яригдаж байсан уу?

-Тухайн үед СЕХ Хан-Уул дүүргийн шүүхэд Г.Батхүү, Д.Зоригт нар маргаан үүсгэчихсэн байгаа. Шийдвэр гартал хүлээ гэсэн. Тэгээд шүүхийн шийдвэр Г.Батхүү, Д.Зоригт нарын талд гарсан. Тиймээс Н.Төмөрхүү, С.Чинзориг нар Нийслэлийн давж заалдах шатны шүүхэд хандахад Хан-Уул дүүргийн шүүхийн шийдвэрийг хүчингүй болгосон. Уг нь энэ шүүхийн эцсийн шийдвэр байсан. Тиймээс бид “Шүүхийн эцсийн шийдвэр гарлаа. Одоо тангарагийг нь өргүүлэхгүй юу” гэхэд Улсын дээд шүүхэд хянуулахаар болж байгаа юм билээ гээд тангараг өргүүлэхгүй өдий хүрсэн. Гэтэл энэ хооронд Өвөрхангай аймгийн шүүх дээр дахиж хэрэг үүсгүүлээд зохион байгуулаад Сум дундын шүүхийн шийдвэр гарсан байгаа юм. Сум дундын шүүхээс насанд хүрээгүй хоёр хүүхдийг сонгуулийн сурталчилгаанд ашигласан байгаа нь хууль зөрчсөн гээд шийдвэр гаргасан байна лээ. Зөвхөн энэ шийдвэрийг СЕХ үндэс болгоод Д.Зоригт, Г.Батхүү нарыг УИХ-ын гишүүний тангараг өргөх шийдвэрийг гаргачихсан.

-СЕХ-ны хуралд танай намын зүгээс очсон уу?
 
-Очсон. Тэгээд “Та бүхэн ямар асуудал хэлэлцэж байна вэ. Бидэнд ирсэн мэдээллээр Өвөрхангай аймгийн шүүхийн шийдвэрийг үндэслээд нэг талыг барьсан шийдвэр гаргаж байгаа гэсэн. Энэ үнэн үү” гэж бид СЕХ-ны гишүүдээс асуусан. Гэтэл “Бид ярьж байна. Гишүүдэд материал тараасан байгаа” гэж байсан. Гэтэл удаа ч үгүй Г.Батхүү, Д.Зоригт нарын талд гаргачихсан. Тэгээд бид хурал дуусахаар СЕХ-ны гишүүдтэй уулзана гээд хаалганы гадаа дуустал хүлээхэд СЕХ-ны гишүүд нууц хаалгаараа гараад гарааш руу ороод Төрийн ордонд ирсэн байна лээ. Тэгээд 20.00 цагийн үед УИХ-ын даргад бичгээ өргөн барьсан байгаа юм. Ил тод биш нууц байдлаар хийж байна. СЕХ, шүүх аль алиных нь шийдвэр насанд хүрээгүй хоёр хүүхдийг сонгуулийн сурталчилгаанд ашигласан гэсэн зүйл л байна.

-Насанд хүрээгүй гэх хоёр хүүхэд нэр дэвшигчидтэй гэрээ байгуулсан юм уу. Яаж яваад энэ хэрэгт холбогдчихсон юм бол?

-Энэ хоёр хүүхэд ямар нэгэн штаб, нэр дэвшигчидтэй гэрээ байгуулаагүй. Нэг нь тэнд явж байсан гэдэг. Гэтэл зургийг нь аваад насанд хүрээгүй хоёр хүүхэд сонгуулийн сурталчилгаа хийгээд явж байна шүүхэд гомдол мэдүүлсэн байгаа юм. Тэрийг нь шүүх зориуд захиалгаар шийдчихэж байна.

-Тэгээд ажиллаагүй байхад нь ажилласан гээд гүтгэж байна гэсэн үг үү?

-Сонгуулийн сурталчилгаанд ажиллаагүй гээд байхад нь ажилласан гээд байгаа болохоор тэр насанд хүрээгүй хоёр хүүхэд шүүхэд хандчихсан байгаа.

-Ер нь санал хураалтаар МАН-ын гишүүд ялалт байгуулсан биз дээ?

-Тийм. С.Чинзориг Г.Батхүүгээс 3554 санал, С.Чинзориг Д.Зоригтоос 6698 санал, Н.Төмөрхүү Г.Батхүүгээс 1328 санал, Н.Төмөрхүү Д.Зоригтоос 4472 саналаар илүү байгаа. Тэгэхээр сонгогчид саналаа ингэж өгчихөөд байхад хамгийн өндөр санал авсан хоёр хүнийг нь биш, АН-аас нэр дэвшсэн хоёр хүний талд шийдвэр гаргалаа. Тиймээс Өвөрхангай аймгийн сонгогчдоос манай нам руу хандсан. Маш их бухимдаж байна. Тэд “Өвөрхангай аймгийн сонгогчид шийдсэн асуудал. Үндсэн хуулийн заалттай. Бид асуудлаа шийдчихээд байхад бидний саналыг авч хэлэлцэхгүйгээр шүүх цагдаа нь шийдээд явдаг дэглэм тогтож байна уу” гэж байна. Цаашид ийм байвал МУ-д сонгууль явуулах хэрэг алга. Олонх болсон улс төрийн хүчний захиалгаар ажиллаад яваг. Тиймээс бид энэ бүгдийг эсэргүүцэж байна. Энэ бол хуулийг уландаа гишгэж, ардчилал байхгүй болж байгаагийн илрэл.

-Танай намын зүгээс мөн Д.Зоригт, Г.Батхүү нарыг шүүхэд өгсөн байгаа гэсэн?

-Бид Өвөрхангай аймгийн сонгуулийн хорооноос гаргасан шийдвэр, мөн Д.Зоригт, Г.Батхүүтэй холбоотой эд, мөнгө тараасан гэх асуудлаар шүүхэд хандсан байгаа. Гэтэл энэ бүхний хариу гараагүй байхад яаран сандран улс төрийн олонхийг бүрдүүлсэн хүчний захиалгаар СЕХ шийдвэр гаргасан.

-АН-ын хоёр гишүүн өнөөдөр тангарагаа өргөнө биз дээ?

-Бидний зүгээс шүүхээр асуудал бүрэн шийдэгдтэл тангараг өргүүлэх ёсгүй, хүлээ гэсэн шаардлагыг тавьж байна. Хамгийн сонирхолтой нь өнгөрсөн мягмар гаригт хуралдсан СЕХ-ны хурал дуусаагүй байхад УИХ-ын даргаас УИХ-ын Тамгын газарт Г.Батхүү, Д.Зориг нар пүрэв гаригт тангараг өргөнө бэлтгэлийг нь хангаж бай гэсэн үүрэг чиглэл өгсөн байгаа юм. Үүнээс харахад энэ бүхэн ерөөсөө цаанаасаа зохион байгуулсан, маш нарийн бодсон, УИХ-д олонх бүрдүүлж байгаа хүчний тоог нэмэх гэсэн, сөрөг хүчний тоог багасгах гэсэн улс төрийн бодлоготой, зорилготой ажиллагаа гэж үзэж байна.