Есөн сар гарсаар барилгын ослоор амиа алдсан хэрэг цөөнгүй гарсан. Түүний нэг нь өнгөрсөн есдүгээр сард ээжтэйгээ хөтлөлцөн зам гарч явсан Есүгэн охин юм. Барилгад петон зуурмаг шахаж байсан кран осолдсоноос 12 настай охин дарагдаж амиа алдсан юм. Тиймээс охинд зориулж, Есүгэн сан байгуулагдаж байгаа юм байна. Ингээд охины аав Д.Батсайхантай ярилцлаа.

-Юуны өмнө танд гүн эмгэнэл илэрхийлье?
-Баярлалаа.

-Охиныхоо талаар товчхон мэдээлэл өгөхгүй юу?
-Миний охин 11 дүгээр сарын 14-нд төрсөн. 12 настай. “Радуга” сургуулийн 8б ангид сурдаг байсан. Өөрөө бол урлаг спорт гээд л өөрийн насны хүүхдүүд оролцох бүх л зүйлд авьяастай, шүлэг дуу бичдэг. Мөн дуулдаг, бүжиглэдэг, бас эх орон, эх хотоо цэвэр цэмцгэр байлгах чин хүсэлтэй нялх эх оронч байсан юм.

-Охиныхоо нэрээр сан байгуулж байгаа гэж сонссон. Яг ямар чиглэлээр үйл ажиллагаа явуулдаг сан бэ?
-Есүгэн сан байгуулсан. Гэхдээ үйл ажиллагаа нь эхлээгүй л байна. Охины маань 49 хоног дөнгөж саяхан дууссан болохоор одоо л зөвшөөрлийг нь авахаар хөөцөлдөж байна.

-Мэргэжлийн байгууллагын дүгнэлт одоо гарсан байх?
-МХЕГ-аас үнэхээр харамсалтай дүгнэлт гаргасан байна лээ. Ерөнхийдөө каск өмсөөгүй явж байсан нь миний охины буруу мэтийн дүгнэлт гаргасан байгаа юм. Зүв зүгээр ээж, дүү хоёртойгоо хөтлөлцөөд зам гараад явж байсан охины минь аминд хүрчихээд байхад ийм дүгнэлт гаргасанд харамсаж байна. Үнэндээ өнөөдөр бид зул, зураг хоёроор л голоо зогоож байна. Эгчийгээ алдсан дүү, охиноо алдсан эцэг, эхийн сэтгэл ямар байхав. Та бүхэн бодоод үзээрэй.

-Ерөнхийлөгчид шаардлага хүргүүлж байгаа талаар?
-МУ-ын Ерөнхийлөгч бол 2 сая гаруй иргэний аав. Тиймээс би эцэг хүний хувьд Ерөнхийлөгчийг миний зовлонг ойлгох байх гэдэг үүднээс хандсан. Түүний зүрхэнд нь хүргэх гэсэн юм. Би бол өрх гэрийн аав, харин Ерөнхийлөгч бол Монгол өрх гэрийн аав. Тиймээс хуулиар олгогдсон эрхийнхээ дагуу Монголын мянга мянган хүүхдүүдийн эрүүл аюулгүй орчин, нийгэмд амьдрах нөхцөлийг бүрдүүлж өгөхийг шаардсан.

-Захианыхаа талаар тодруулбал?
-Ерөнхийдөө “Өөрийн гэр бүлд учирсан тэр хар өдрийнх шиг зүрх зүсэгдэм, элэг эмтрэм, сэтгэл урагдам аймшигт дүр зургийг  дахин бүү давтагдаасай гэсэн утгатай захидал байгаа.

-Хэрэг ер нь одоо ямар шатандаа явна вэ?
-Хуульд заасны дагуу  эрүүгийн хэрэг үүсгэгдээд Баянгол дүүргийн цагдаагийн хэлтэст шалгагдаж байгаа. Мөрдөн байцаалтын шатанд яваа учир тодорхой мэдээлэл алга. Прокурорын байгууллагад шилжих тэр үед хавтаст хэрэгтэй танилцана. Гэхдээ иргэн хүний хувьд, эцэг хүний хувьд хэргийг эрэн сурвалжлаад явж байна.  Энэ хугацаанд “Өнөөдөр бид нар ийм нөхцөлд амьдрах, ийм байдалд хүрэх болсонд төр засагт буруутай” гэж дүгнэлээ. Учир нь нийгэм өөрөө авилга, хүнд суртал,  үүнээс үүдэлтэй ёс суртахуун үзэл бодлыг доройтуулах болсон. Ийм хэмжээнд авчрах, энэхүү нөхцөл байдал бий болсон нь үе үеийн Засгийн газар, төр засагтай холбож ойлгож байна.

-Тэгэхээр та төр засгийг буруутгаж байна. Ер нь охиныхоо хэрэгт хариуцлага хүлээх ёстой байгууллагуудаас нөхөн төлбөр авсан уу. Ер нь уулзсан уу?
-Уулзая гэж хамаатнуудаар дамжуулсан байна лээ. Надад уулзах хүсэл алга. Надад миний хүүхэд, миний охин маш үнэтэй.  Юунаас ч илүү.  Монгол Улс иргэнээ яаж үнэлдгийг хэлж мэдэхгүй байна. Тэрийг мэдэхийг хүсч байгаа. Одоогийн байдлаар миний охины хэрэгт хариуцлага хүлээх ёстой нэг ч компаниас би мөнгөн төлбөр аваагүй, тусламж авсан юм байхгүй.