Энэ бяцхан охиныг Х.Дэлгэрийн Цолмон гэдэг. Охин одоо долоо сартай. Цолмон охин зургаан сартайгаасаа хүнд өвчнөөр өвдөж Монголд шинжилгээ хийлгэхэд онош нь тодорхойгүй гарчээ. Охины өвчнийг Японд шинжлүүлэхэд ТУНГАЛАГ ЭСИЙН ХОРТ ХАВДАРТАЙ гэсэн онош гарсан байна. Энэ төрлийн хорт хавдар нь биеийн бусад эрхтэндээ маш хурдан халдварладаг бөгөөд охины бөөр, элэг, уушиг, чөмөгний яс гэх мэт бүхий л эрхтэнд халдварласан нь шинжилгээгээр тогтоогдсон аж. Охины цусны улаан, цагаан эд эсийн нь тоо багассан гэсэн үзүүлэлтээс үндэслэн цус сэлбэн хийж байгаа бөгөөд охин 40 хэм хүртэл халуурч байгаа юм байна. Одоо Цолмон чанга дуугарч уйлж ч чадахаа байсан. Япон эмч нарын зүгээс охиныг эрүүл болгох боломжтой гэсэн хариу хэлжээ. Охиныг Японд хэвтэн эмчлүүлэх шаардлагтай  бөгөөд эмчилгээний зардал гэж маш их мөнгө хэрэгтэй болсон учир охины эцэг эх элэг нэгт монголчуудаасаа тусламж ирж байна. Эмч нарын гаргасан ерөнхий тооцоогоор охинд 2 жил 3 сар орчим эмчилгээ хийнэ. Энэ хугацааны эмчилгээний нийт зардал 33 сая иен буюу 500 сая төгрөг.  Гэхдээ Япон улсын эрүүл мэндийн даатгалд хамрагдаж чадвал хамрагдсан өдрөөсөө эхлээд эмчилгээний зардлыг японы төр засгаас даана. Эрүүл мэндийн даатгалд хамрагдахын тулд охин болон охины эцэг, эх визээ сунгуулж түр оршин суух үнэмлэх авах хэрэгтэй байгаа юм. Энэ үнэмлэх гарах хугацаа нь дор хаяж 2 сар бөгөөд энэ хугацаан дах төлбөрөө бол заавал төлөх шаардлагатай, энэ нь дор хаяж 100 сая төгрөг болно. Тус мөнгийг төлөхөд монголчууд та бүхэн тусалж хандивийн гараа сунгахийг хүсч байна. Таны хандивласан 1 төгрөг ч охинд тус нэмэр болох болно. Бяцхан охиныг хамтдаа аваръя.

Голомт банк 1205027801 ээж Б.Мөнгөнтуяа. Та бүхэн энд дарж охины Facebook хаяг руу орно руу. Холбоо барих утас: Эмээ 99377885, Ээж 98460339, Аав 07065231157


24tsag.mn Цолмон охины ээж Б.Мөнгөнтуяатай онлайнаар ярилцлаа.

-    Охины тань бие ямар байна вэ?

Одоо бие нь их зовиуртай байгаа, байнга л уйлагнаж байна. Хааяа 40 хэм хүртэл халуурч байна. Биенд нь хүрэхээр уурлаад, юм л бол гулгиад байгаа. Өмнө нь өвөр дээрээ зогсоохоор хөөрхөн дэвхцэж үсрээд тоглоод байдаг байсан, одоо хөл дээрээ ч тогтож чадахгүй, толгойгоо ч бараг даахгүй байгаа. Бас толгойных нь хамаг үс нь унаад дууссан.

-    Хэзээнээс  өвдөж эхэлсэн бэ?

Анх 9 сарын эхээр ханиад хүрсэн юм. Өрхийн эмчид үзүүлээд бичиж өгсөн эмийг нь уусан ч эдгэрэхгүй байсаар хатгаа тусч гээд 9 сарын 16-нд Хүүхдийн 2-р эмнэлэгт хэвтсэн. Гэвч биеийн байдал нь улам дордох болсноос “Гурван гал” эмнэлэгт очоод Цолмон гэж эмчид үзүүлтэл цээжний зургаа авахуулахыг зөвлөсөн. Өмнө нь 2-р эмнэлэгт байхдаа цээжний зураг авхуулсан хэдий ч хатгаа биш байна, ханиад нь л жоохон хүндэрч гэж хэлж байсан юм. Гурван гал дээр зургаа авхуултал эмч нь ч өөрөө гайхсан. Ингэж анх цээжин дотор нь маш том хэмжээтэй нэгэн зүйл байгааг нь бид мэдсэн. Дараа нь компьютер томографийн зураг авахуулж шинжлүүлэхэд хавдар байх магадлал маш өндөр байна гэсэн. Цолмон эмч биднийг эх нялхсын эмнэлгийн цусны тасгийн эрхлэгч Чимгээ эмчтэй уулзуулж тэр дороо охиныг маань эрчимт эмчилгээний тасагт хэвтүүлсэн, учир нь маш их цэртэй, цэрэндээ бараг тагларчих шахаад байсан юм. Энд 2 хоног хэвтэж яах талаар эмч нарын зөвлөгөөн болж хавдрыг багасгах гармон эмчилгээ хийхээр болж хавдрын тасагт хэвтэн 10 гаран хоног эмчлүүлсэн ч хавдар нь ямар ч өөрчлөлтгүй,  дахин зураг авч үзэхэд яг л хэвэндээ байсан. Эмч нар нь энд бид нарт оношлох найдвар бага, дээж авч байж оношийг нь тодруулна, гэвч энэ нь цээжийг нээж байж хийгддэг учраас амь насанд нь аюултай гэж хэлсэн. Ингээд л яаж ийж байгаад л гадаад руу явахгүй бол болохгүй юм байна гэж шийдээд нилээд хөөцалдсөний эцэст одоо япон улсад ирээд оношоо тодруулаад эмчилгээгээ хийлгээд байж байна. Олон шинжилгээ хийж үзээд  онош нь тунгалаг эсийн хорт хавдар гэж гарсан. Тэр дундаа “Т” эсийн хүнд хэлбэрийн хавдар, өөр эд эрхтгүүддээ ч халдварласан байна гэсэн. Эмчилгээ яг одоо л хийж эхлэхгүй бол оройтно, эмчилгээ хийлгэхгүй бол ер нь энэ оныг давахгүй гэсэн. Тэгээд энд тусгай ариутгагдсан тасагт хэвтэж химийн эмчилгээ хийгдэж байгаа. Одоогоор дуслаар өдөр шөнөгүй л эм хийж байна.

-    Ийм жаахнаасаа хорт хавдартай болсон нь юутай холбоотой гэж байна вэ? Гадны нөлөө байдаг юм болов уу. Жишээ нь утаа, хоол хүнс?

    Япон эмч энэ талаар тодорхой хариулт өгөөгүй. Учир нь энэ өвчний гарал үүсэл, шалтгааныг одоо хир нь шинжлэх ухааны үүднээс бүрэн судлаагүй байгаа гэсэн. Удмынх бол биш байх гэж хэлсэн, тиймээс хоол хүнс, хотын утаа зэрэг зүйлсээс болсон байхыг үгүйсгэхгүй.

-    Хэдий хэр хугацаанд эмчилгээ хийх бол?

     Эмчилгээ нь ойролцоогоор 2 жил 3 сарын хугацаанд хийгдэнэ.

-    Японы талаас эрүүл саруул болгоно гэж 100 хувь итгэлтэй хэлж байна уу?

    Эмч нь эдгэрэх магадлал 70-80 хувьтай гэсэн. Үлдсэн хувь нь эмчилгээний явцад биеийн дархлаа гэж бараг байхгүй болох учраас ямар нэгэн гадны нөлөө буюу нян халдвар халдах зэргээс болж эндэх аюултай гэсэн. Энгийн ханиад хүрэхэд л тэр нь амь насанд нь хүрч болно гэсэн.

-    Охины зан аашинд өөрчлөлт орж байна уу?

-   Охин маань хүн болгон руу харж инээдэг, байнгын инээмсэглэл тодруулсан, хир барагтаа л уйлдаггүй, хүн болгон л яасан сайхан ааштай нүүрний баясгалантай охин бэ, уйлдаггүй сайн хүүхэд вэ гэдэг байсан. Харин эмчилгээ эхэлснээс хойш 4-5 хоноод огт инээхээ больсон, байнга л уйлж, байнга л тэврүүлж  байх гээд байдаг болсон., маш их зовиуртай хэцүү л байх шиг байна даа муу охинд минь.

-    Хэрвээ мөнгө бүрэлдэж чадахгүй бол ямар арга хэмжээ авъя гэж бодож байна вэ?

    Хэрвээ мөнгө олж чадахгүй бол үнэхээр том асуудал болох байх. Гэхдээ цаашдаа юу болохыг урдаас таамаглаж хэлж мэдэхгүй учраас ямартай ч бүтнэ гэж итгээд  бурхандаа залбираад л байж байна даа.

-    Охины эмчилгээний зардалд хэр их мөнгө хэрэгтэй байгаа вэ?

    Ерөнхий дүн нь ойролцоогоор 400-500 сая төгрөг болно гэсэн. Гэхдээ Япон улсын эрүүл мэндийн даатгалд хамрагдаж чадвал хамрагдсан өдрөөсөө эхлээд эмчилгээний зардлыг японы төр засгаас даана. Эрүүл мэндийн даатгалд хамрагдахын тулд визээ сунгуулж түр оршин суух үнэмлэх авах хэрэгтэй байгаа юм. Энэ үнэмлэх гарах хугацаа нь дор хаяж 2 сар бөгөөд энэ хугацаан дах төлбөрөө бол заавал төлөх шаардлагатай, энэ нь дор хаяж 100 сая төгрөг болно гэсэн. 10 сарын 17-нд шалгуулахад төлбөр нь 1,500,000 иен буюу 27 сая төгрөг болсон байсан.

-   Монголчууддаа хандаж юу гэж хэлмээр байна?

-  Тэнхлүүн явахад тэмээгээр тусалснаас тэвдэж явахад тэвнээр тусла гэж эртний сайхан үг байдаг. Ийм хэцүү үед элэг нэгт монгол ахан дүүс та бүхэн охины минь төлөө зүрх сэтгэлээрээ хамтдаа байж тусалж дэмжиж байгаад үнэхээр их баяртай байна.
Охиноо эмчлүүлчихээд хурдхан 3-уулаа цуг эх орондоо очихыг хамгаас ихээр хүсэн хүлээж байна даа. Олон түмний минь сайхан сэтгэлийн ачаар охин маань эдгэрэх болно гэдэгт бат итгэлтэй байна. Баярлалаа...