“Би эмэгтэй хүн” кино өчигдөр “Өргөө” кино театрт нээлтээ хийлээ. Шинэ кино, шинэ дүрийн талаар жүжигчин Б.Навчаатай ярилцлаа.

- “Би эмэгтэй хүн” киног үзэгчид Б.Навчаа гэдэг жүжигчнээр төсөөлж байна. Бүтээсэн дүрээ танилцуулна уу?
-    Б.Навчаа гэдэг эмэгтэйн зураг, реклам цацагдаж байгаа нь энэ киноны промошион байлаа. Бид сурталчилгаагаа арай өвөрмөцөөр хийх гэж үзэж байна. Гадуур явж байгаа киноны рекламд Навчаа ганцаараа гол дүр юм шиг санагдах байх. Гэхдээ надаас өөр олон гол дүрийн жүжигчид байгаа. Бусад дүрүүдээ нууцалсан нь ч учиртай. Миний дүрийн хувьд бол ганцаармдал, хэн нэгнийг хайрлаж, хэнээс ч хайртай гэдэг үг сонсож байгаагүй эмэгтэйн дүр. Энд зогсож байгаа Навчааг бодвол маш их мэдрэмжтэй, хайр гэдгийг гүн сэтгэлээсээ мэдэрсэн, тэр мэдрэмжийг бид нараас илүү төсөөлдөг эмэгтэй.

-  Энэ кино ямар сэдвийг хөндсөн бэ?
- Ерөөсөө гоо сайхан, гадаад үзэмжийн талаар эргэцүүлээсэй гэж хүсч байна. Өнөөдөр мэс заслыг дэмждэг, дэмждэггүй гээд янз бүрийн үзэл бодолтой хүмүүс байна. Дэмждэггүй гэж яриад байгаа мөртлөө мэс засал хийлгэсэн хүмүүс ч байдаг. Энэ сэдэв өнөөдөр Монголд үгүйлэгдэж байгаа учраас хөндсөн. Гадаад үзэмж нь уруу дорой байгаа эмэгтэй нийгмээсээ яаж тусгаарлагддаг, хайр дурлалынхаа төлөө яаж тэмцэж байгаа талаар өгүүлнэ.

- Таны өмнө бүтээж байсан дүрээдээс нэлээн өөр дүр юм?
- Тийм ээ. Миний бүтэээсэн Нараа гэдэг эмэгтэйн дүр бол дотогшоогоо дүр. Харин би бол гадагшаа хүн. Би аливаа сэтгэл хөдлөлөө шууд л харуулж, нээлттэй байж чаддаг эмэгтэй. Гэтэл энэ Нараа гэдэг эмэгтэй тийм биш. Их дотогшоо, гуньсан эмэгтэй. Жүжигчин хүн ямар ч дүрд тоглох ёстой.  Жүжигчин хүнд хамгийн чухал нь ажиглалт байдаг. Миний 2004 онд ажигласан хүний ертөнц энэ дүрд явж байна. Нэг эмэгтэйтэй би заримдаа тааралддаг байсан. Эхлээд гадаад үзэмжийг ажигладаг байлаа, дараа нь үг өдөж ч үзлээ. Үг яриа, бусадтай харьцаж байгаагаас нь энэ ямар хүн бэ гэдэг нь мэдэгддэг шүү дээ. Энэ хүнийг ажиглаж үлдсэн юм өнөөдөр надад хэрэг болж л байна. Ерөнхийдөө эерэг дүр. Би өмнө нь бусдыг захирдаг тийм дүрүүдэд тоглож байсан бол энэ удаа эсрэгээрээ.

- Зураг авалт маш хурдан өнгөрсөн. Хоёр ертөнцийн буудал жүжгийн үеэр таарсан болохоор өглөө эрт очиж зургаа авахуулчихаад л жүжиг рүүгээ явдаг байсан. Жүжигт хүн маш их бэлдэх хэрэгтэй болдог. Киноны багийнхан давхар ажилтай байхад ойлгоод миний цаг завд тохируулж ажилласанд уучлаарай, бас баярлалаа гэж хэлье. “Би эмэгтэй хүн” кинонд олны танил болсон жүжигчид тоглосон. Ерөнхийдөө найзууд нөхдийн хүрээнд хйисэн кино болохоор энэ уран бүтээлээс дотно уур амьсгал мэдрэгдэх байх.  Сэтгэл сайтай хүмүүстэй нэгдэж баг болж байгай учраас сайн кино болох нь тодорхой. Кино жүжиг хоёр ялгаатай. Жүжиг бүтэн сар хичээллэдэг бол кинонд тийм боломж байдаггүй. Дахиад л хөрөнгө мөнгөний асуудал босч ирдэг. Өнөөдөр мөнгө бүтлээ гэхэд маргааш нь жүжигчдэд зохиолоо өгдөг. Дүр дээр ажиллах хугацаа маш бага байдаг гэдгийг үзэгчид ойлгоосой. Яагаад дээр үеийн кинонууд сайн байсан, орчин үеинй кинонууд яагаад ийм тааруухан байна гэдэг үүнтэй холбоотой.

- Киног үзээд үзэгчид юу мэдрээсэй гэж хүсч байна?
- Энэ киног үзээд хажуудах эмэгтэйгээ энэ хэн гэгч эмэгтэй вэ гэдгийг тогтож хараасай гэж хүсч байна. Өнгөцхөн хараад дүгнэх биш, дотоод ертөнцийг нь, мөн чанарыг нь олж хараасай. Бид мэс залыг буруутгасангүй, зөвтгөсөнгүй. Хүн төрөлхтөн байгаа цагт гоо сайхан байх хүслийг хориод нэмэр байхгүй. Ийм хүсэл байна, хориод байх хэрэггүй.

- Эмэгтэй хүн гэж таны бодлоор...?
- Эмэгтэй хүн бол энэ дэлхийн эхлэл.

- Ярилцсанд баярлалаа.