“Петровис” компани шатахууны үнээ нэмнэ гэдгээ өнгөрсөн долоо хоногт мэдэгдсэн. Харин тус компанийг мэдэгдэлгүйгээр үнээ нэмбэл хариуцлага тооцно гэдгээ ШӨХТГ-ын дарга О.Магнай мэдэгдсэн юм. Ингээд шатахууны үнийн талаар “Петровис” компанийн гүйцэтгэх захирал М.Халиунбаттай ярилцлаа.
    “Петровис” компани шатахууны үнээ нэмнэ гэдгээ өнгөрсөн долоо хоногт мэдэгдсэн. Харин тус компанийг мэдэгдэлгүйгээр үнээ нэмбэл хариуцлага тооцно гэдгээ ШӨХТГ-ын дарга О.Магнай мэдэгдсэн юм. Ингээд шатахууны үнийн талаар “Петровис” компанийн гүйцэтгэх захирал М.Халиунбаттай ярилцлаа.

-Шатахууны үнэ нэмэгдэх талаар танай компани ямар байр суурьтай байна?
-Өнгөрсөн есдүгээр сараас эхлэн ОХУ-аас нийлүүлж байгаа шатахууны үнэ нэлээн өссөн. Гэхдээ өнөөдрийг хүртэл бид ямар нэгэн байдлаар борлуулж буй үнээ хөдөлгөөгүй байна. Гэвч одоо хөдөлгөхгүй бол болохгүй байна. Манай компанийн хувьд 11.3 хувь алдагдалтай ажиллаж байна. Энэ байдал удаан үргэлжлэх нь сөрөг үр дагавартай.

-Гурван талын гэрээнд гарын үсэг зурсан уу. Оролцсон уу?

-Ямар нэгэн гэрээ хэлэлцээрт албан ёсоор гарын үсэг зураагүй байгаа. МУ-ын Засгийн газрыг нефтийн салбарыг тодорхой хэмжээгээр дэмжих гэж байгаа гэж ойлгож байгаа. Тухайлбал, тодорхой хэмжээний хөнгөлөлттэй хүүтэй зээл олгож байгаа, мөн вальютийн ханшийг тогтворжуулах арга хэмжээ авч байгаа гэж ойлгож байна. Гэхдээ өнөөдрийн байдлаар энэ арга хэмжээнүүд бодит байдал болоогүй байгаа.

-Бусад компаниуд үнээ нэмнэ гэнэ. Үүнийг судалж үзсэн үү?

-Мэдэхгүй.

-Ер нь багцаагаар хэдэн төгрөгөөр нэмэгдэх вэ?

-Өөрсдийн компанийн тухайд ярихад бид дор хаяж 200-230 төгрөгөөр нэмнэ.

-Тэгэхээр А-92, дизель гэх мэт бүгдэд нь ижил үү?

-Ер нь бол дунджаар тэгэж л өснө.

-Бензиний үнэ нэмэгдэхээр дагаад бараа бүтээгдэхүүний үнэ нэмэгдээд байдаг?

-Ер нь бол тийм. Гэхдээ би нэг зүйлийг гайхдаг. Бензиний үнэ 60 70 төгрөгөөр нэмэгдэхэд нөгөө бараа бүтээгдэхүүний үнэ нь 100 төгрөгөөр нэмэгдээд байдаг. Уг нь 100 хувь бензинээр хийсэн талх, мах гэж баймааргүй юм. Гэтэл бензин нэмэгдэхэд яг ижил үнээр өсөөд байдаг.

-Хэзээнээс нэмж эхлэх вэ?

-Болдог бол өнөө маргаашгүй нэмчихмээр байна. Даанч харамсалтай нь янз бүрийн шахалт дарамт зөндөө ирж байна.

-ШӨХТГ-аас компаниуд үнийн саналаа ирүүлээгүй байгаа гэсэн?

-Ер нь хуулиараа бол ШӨХТГ-аас ямар нэгэн зөвшөөрөл аваад байх шаардлага байхгүй. Үүнийг ард иргэд ойлгох хэрэгтэй. Тэд үнэ хянадаг газар биш. Энэ газар бол ерөнхийдөө шударга өрсөлдөж байна уу, өрсөлдөөн хязгаарлах алхам хийгдэж байна уу гэдгийг л хуулиар хамгаалах ёстой газар. Түүнээс биш бид ШӨХТГ-аас үнээ нэмэх үү, яах уу гэдэг зөвшөөрөл авах шаардлагагүй.