- УИХ-ын гишүүн Б.Чойжилсүрэн та хоёрыг УИХ-ын гишүүнээс эргүүлэн татах тухай нэхэмжлэл АН-ын зүгээс гаргасан. Энэ асуудал яаж шийдэгдэв?
- 2012 оны УИХ-ын 15 дугаар тойргийн хороонд гарсан маргаантай холбоотойгоор Увс аймгийн АН, сонгуулийн 15-р тойргийн хороо Увс аймгийн Захиргааны хэргийн шүүхэд нэхэмжлэл өгсөн байсан. Ингээд захиргааны хэргийн шүүх хурал өнгөрсөн пүрэв гараг буюу 11-р сарын 22-ны өдөр Увс аймагт болж өнгөрлөө. Өглөө 10 цагт эхэлсэн хурал орой Увсын цагаар 23.30 минут, Улаанбаатар хотын цагаар 00.30 минутад дууссан.

- Увс аймгийн АН шүүхэд яг ямар нэхэмжлэл гаргасан юм бэ?
- Хоёр нэхэмжлэл гаргасан. Нэгт, бид хоёрыг нэр дэвшигчийн жагсаалтаас хасах, хоёрт, УИХ-ын гишүүнээр сонгогдсонд тооцсон тухай сонгуулийн тойргийн хорооны шийдвэрийг хүчингүй болгох нэхэмжлэл гаргасан.

- Шүүх хурлаас ямар шийдвэр гарсан бэ?
- Увс аймгийн шүүх бараг 14 цаг энэ асуудлыг хэлэлцсэн. Энэ шүүх хурлаас АН-аас гаргасан нэхэмжлэлийг хоёуланг нь хүчингүй болгосон шийдвэрийг гаргасан. Харамсалтай нь шөнийн нэг цагт хурал дуусаад өглөө 7 цагийн үед сайтуудаар бид хоёрын эсрэг шийдвэр гарсан мэтээр бичсэн байна лээ. Шүүхийн гаргасан шийдвэрийг хүртэл өөрсдийнх нь талд гарсан мэтээр тайлбарлаж чаддаг хүмүүс энд байна. Ийм ч учраас сүүлийн гурван сард Б.Чойжилсүрэн бид хоёрын тухай төрөл бүрийн гүтгэлэг доромжлол тарааж байгаа. Одоо бүр шүүхийн гаргасан бодитой шийдвэрийг өөрсөддөө ашигтай гарсан мэтээр мэдээлэл тарааж байна. Гаргасан шийдвэрийг гаргаагүй мэтээр, гаргаагүй шийдвэрийг гаргасан мэтээр ярьж байгаад харамсч байна. Бодит үнэн бол АН-ын гаргасан тэр хоёр нэхэмжлэлийг хоёуланг нь Увс аймгийн шүүх хүчингүй болгосон.

- Шүүхийн шийдвэрийг давж заалдах боломжтой юу?
- Тэрийг сайн мэдэхгүй байна. Ямар ч байсан энэ хоёр чихээрээ Увс аймгийн АН-ын нэхэмжлэлийг хэрэгсэхгүй болголоо гэсэн шийдвэрийг сонслоо. Хуулиараа нээлттэй бол түүгээрээ явах байх.

- Та бас нэр төрөө сэргээлгэхээр нэг сониныг шүүхэд өгсөн. Асуудал шийдэгдсэн үү?
- Тийм ээ. “Өглөөний сонин”-той шүүхдэлцсэн. 2012 оны 6-р сарын эхний 5 дугаар дамжуулж намайг элдэв бусаар хэлсэн. Яг сонгууль эхэлж байхад тендерчинл гэнэ, ер нь янз бүрийн юмтай холбож бичээд байгаа. Тендер гэдэг юманд чинь Сангийн яамны төрийн нарийн бичгийн ажлаас гарснаас хойш сүүлийн 6 жил оролцохгүй байгаа. Хариуцаж байсан ажлын хувьд томоохон тендер орж ирсэн нь үнэн. Гэтэл сүүлийн 5, 6 жил ийм юманд оролцоогүй. Үүнтэй холбоотойгоор олон удаа миний нэр төрд халдсан нийтлэл гаргасан. Би хоёр шатны шүүхээр ялалт байгуулаад байгаа. Давж заалдах хугацаа нь аль хэдийн өнгөрсөн. Өөрөөр хэлбэл эцсийн байдлаар маргаан нэг талдаа гарсан. Мөн л Увс аймагт нэр дэвшихтэй холбоотойгоор “Өглөөний сонин”-д намайг гүтгэсэн нийтлэлээ “Увсын мэдээ” сонинд гаргаж миний нэр төрд халдсан. Тэр нь сонгуулийн үеэр Увс аймгийн өрх болгонд тардаг байсан. Сонгуулийн үеэр тэр худлаа зүйлд тайлбар хийх бас л хэцүү юм билээ. Би бол нэр төрөө сэргээлгэсэн гэж үзэж байгаа. Сониныхон өөрсдөө уучлалт гуйх байлгүй дээ. Тэрийг нь хүлээгээд л сууж байна. 

- Таны туслахыг бас шүүж байгаа биз дээ?
- Би УИХ-ын  гишүүний хувьд гурван туслахтай. Нэг нь Увс аймгийн Улаангом хотод байдаг Чимэддорж гэдэг залуу, нөгөө нь Өмнөговь сумд байдаг Батцогт гэдэг хүн бий.  Гурав дахь нь хотод байдаг. Энэ гурван туслахтай маань холбоотой ямар ч асуудал байхгүй. Бас л гаргачихсан шийдвэрийг өөр болгоод ярьж байгаа хүмүүсийн хийж байгаа ажил. Хэн гэдгийг тааж ядаад байх зүйлгүй. Харин би хэн ингэж бичүүлээд байгаа вэ гэдгийг огтхон  мөшгөж хөөцөлдөхгүй байгаа. Үнэн юм үнэнээрээ шийдэгдэж, нэг өдөр цэг тавина гэдэгт эргэлзэхгүй байна.

- Өвөрхангайн тойрогт нэр дэвшсэн Г.Батхүү, Д.Зоригт нар УИХ-ын гишүүний тангараг өргөхөөр боллоо. Энэ хэрэг эцэслэн шийдэгдсэн юм уу?
- Дээд шүүхийн эцсийн шийдвэр гараагүй  болохоор Өвөрхангай аймгийн асуудал дуусаагүй байгаа. Тэгэхээр тангараг өргүүлнэ гэдэг юу л бол. Яахав хуульгүй гэж үзэж байвал болох байх. Гэхдээ хуультай юм чинь болохгүй шүү дээ. Ард түмний сонголтыг тэгээд яах болж байна? Үндсэн хуулиараа ард түмний сонголтыг дээдлэх ёстой гэсэн зарчим үйлчилж байгаа. Эрх баригчдад үйлчилдэг хууль Зимбабве, Хойд Солонгос, Куб зэрэг улсуудад байна. Яагаад гэхээр эрх баригчид нь хууль хяналтын байгууллагуудаа барьдаг учраас хүчтэйхэн өрсөлдөгч орж ирвэл нэрийг нь дэвшүүлэхгүй гэдэг. Нэр дэвшсэн хойно нь янз бүрийн шалтаг, шалтгаан хэлээд хасчихдаг шүү дээ.

- Б.Чойжилсүрэн гишүүн та хоёрыг эргүүлэн татах асуудал нааштайгаар шийдэгдсэнд намын гишүүд тань ямар байр суурьтай байна вэ?
- Амжилт хүсч баяр хүргэж байна. Ард түмний саналыг баталгаажулсан шийдвэр гаргасан байна гэсэн байдлаар манай бүлгийн гишүүд хандаж байна. Үнэн юм нь худлаа болчихдог, худлаа юм нь үнэн болчихдог цаг үед анхны ялалт  авчирч байгаад гишүүд баяртай байгаа.

- Ярилцсанд баярлалаа.