Оксфам байгууллагаас ням гарагт гаргасан тэгш бус байдлын жилийн тайланд дурдсанаар, одоогийн чиг хандлага хэвээр байвал ирэх арван жилд дор хаяж таван хүн нэг их наяд ам.долларын хөрөнгөтэй болох төлөвтэй байна. Одоогийн байдлаар 430 тэрбум ам.долларын хөрөнгөтэй дэлхийн хамгийн баян хүн болоод байгаа Tesla болон SpaceX компанийн гүйцэтгэх захирал Илон Маск тав хүрэхгүй жилийн дотор энэ хязгаарыг давах боломжтой.
Удалгүй түүнтэй Амазоны үүсгэн байгуулагч Жефф Безос, Oracle-ийн үүсгэн байгуулагч Ларри Эллисон, Мета компанийн гүйцэтгэх захирал Марк Зукерберг, LVMH-ийн гүйцэтгэх захирал Бернард Арно нар нэгдэх төлөвтэй байна.
"Форбес" сэтгүүлээс гаргасан мэдээлэлд тулгуурласан Оксфам тайлан Швейцарийн Давос хотноо жил бүр зохион байгуулдаг Дэлхийн эдийн засгийн форумын эхлэлтэй давхцаж байгаагаараа онцлогтой. Уг форум нь дэлхийн хамгийн баян хүмүүс болон дэлхийн удирдагчдын дээд хэмжээний уулзалт юм. Мөн тэрбумтан, ерөнхийлөгчөөр сонгогдсон Доналд Трампын тангараг өргөх ёслолын өмнөх өдөр уг тайлан олонд ил болж буй.
2024 он бол дэлхийн хамгийн чинээлэг хувь хүмүүс болон гэр бүлүүдийн хувьд маш их "ашиг орлого"-той жил байсан. Энэ нь АНУ-ын хөрөнгийн зах зээлийн өсөлтөд нөлөөлсөн гэж Оксфам үзэж байна. Тэдний хөрөнгө маш хурдан өссөн тул Оксфам өнгөрсөн жилийн тооцоог шинэчлэн гаргаж, ойрын арван жилд зөвхөн их наядтангууд тодорно гэсэн тооцоог гаргажээ.
Америкийн Оксфам байгууллагын бодлогын ахлах ахлагч Ребекка Ридделл нэг их наяд долларын тухай "Энэ бол төсөөлшгүй их мөнгө. Энэ туйлын тэгш бус байдал нь тэмдэглэх зүйл биш юм" гэж хэлэв.
Өнгөрсөн жил тэрбумтнуудын эгнээ 200 гаруйгаар нэмэгдэж, өнөөдөр 2770 хүн дэлхий дээр тэрбум ам.долларын хөрөнгө эзэмшиж байна. Тэдний нийт хөрөнгө өмнөх жилийнхээс гурав дахин хурдан буюу 2.1 их наяд доллараар нэмэгдэж, нийт 15 их наяд доллар болжээ. 816 тэрбумтан амьдардаг АНУ-д л гэхэд нийт хөрөнгө 1.4 их наяд доллараар нэмэгджээ. Үүний зэрэгцээ, ядуу амьдарч буй хүмүүсийн тоо 1990 оныхтой ойролцоо байна гэж Дэлхийн банкны мэдээллээс иш татан тайланд дурджээ.
Л.Баяр
