ОХУ-ын Ерөнхийлөгч Владимир Путин тавдугаар сарын 9-нд болох “Ялалтын баярын өдөр” цэргийн жагсаалд бэлтгэлийг чамбай байлгах үүрэг өгчээ. Уг өдөр байх түүний зочдын жагсаалтын хамгийн эхэнд Хятадын удирдагч Ши Жиньпин байгаа нь тодорхой болов.
Хятадын удирдагч Москвад дөрөв хоногийн төрийн айлчлал хийхээр лхагва гарагт хүрэлцэн ирж, Путинтэй “харилцан итгэлцлээ” гүнзгийрүүлж, холбоотнууд дэлхийн хоёрдугаар дайнд нацист Германыг ялсны 80 жилийн ойн арга хэмжээнд оролцох гэж байна.
АНУ-ын Ерөнхийлөгч Доналд Трампын “Америкийг нэгдүгээрт” дипломат бодлого нь дэлхийн эвслийг ганхуулж, Вашингтон болон хоёр гүрний харилцааг өөр түвшинд хүргэж байгаа энэ үед Ши Жиньпин оролцсон нь хоёр автократ улс болон тэдний үндэстнүүдийн эв нэгдлийн хүчтэй илрэл юм. Өнгөрсөн сард Путин хэлсэн үгэндээ Ши Жиньпинийг “гол зочин” гэж тодорхойлсон.
Баярын арга хэмжээнд Бразилын Ерөнхийлөгч Луиз Инасио Лула да Силва, Вьетнамын Ерөнхийлөгч То Лам, Беларусийн удирдагч Александр Лукашенко нар оролцох төлөвтэй байна. Мөн Монгол улсын ерөнхийлөгч У.Хүрэлсүх тэнд байх болно. В.Путины Украинд хийсэн дайралтын сүүдэрт болж буй уг парадад Хятадын Ардын чөлөөлөх армийн хүндэт харуулын бие бүрэлдэхүүн ч оролцох юм.
Путин Киевтэй гурван өдрийн турш гал зогсоох санал тавьсан нь зарим шинжээчдийн үзэж байгаагаар Оросын цэргийн сүр хүчийг гадаадын нэр хүндтэй хүмүүсийн өмнө тасралтгүй харуулах гэсэн хүсэл эрмэлзлээс үүдэлтэй гэж үздэг. Украины Ерөнхийлөгч Владимир Зеленский уг саналыг няцааж, "театрын тоглолт" гэж нэрлээд, 30 хоногийн хугацаанд гал зогсоох тухай АНУ-ын өмнө гаргасан саналыг дэмжиж байгаагаа дахин илэрхийлэв.
Л.Баяр
Сэтгэгдэл (2)