Украины Ерөнхийлөгч Владимир Зеленский "Туркийн нийслэл Анкарад очиж, тус улсын Ерөнхийлөгч Режеп Тайип Эрдогантай уулзана, пүрэв гарагт Истанбулд Оросын Ерөнхийлөгч Владимир Путинтэй шууд хэлэлцээ хийх боломжтой" гэж мэдэгдлээ. "Бид энэ уулзалтыг бүтээхийн тулд бүх зүйлийг хийх болно" гэж тэр Киевт зохион байгуулсан хэвлэлийн хурлынхаа үеэр мэдэгдэв.

Оросын тал Истанбул руу хэн нисэхийг хараахан хэлээгүй байгаа бөгөөд зөвхөн “Путинг очих шаардлагатай гэж үзсэн даруйд нь мэдэгдэх болно” гэжээ. Путин, Зеленский нар 2019 оны арванхоёрдугаар сараас хойш уулзаагүй. Хоёр улсын шууд яриа хэлэлцээ хамгийн сүүлд 2022 оны гуравдугаар сард Истанбул хотод Орос Украинд бүрэн хэмжээнд цөмрөн орсон эхний долоо хоногт болсон юм.

Путин Туркийн хамгийн том хотод "урьдчилсан нөхцөлгүйгээр" шууд яриа хэлэлцээ хийхийг эхэндээ уриалж байсан бөгөөд Зеленский өөрийн биеэр очно гэдгээ мэдэгдэж, Оросын ерөнхийлөгчийг мөн айлчлал хийнэ гэж найдаж байсан. АНУ мөн тйиш нь өндөр түвшний төлөөлөгчдөө илгээх төлөвтэй байна. Эх сурвалжийн мэдээгээр Путин ч ялгаагүй энхийн хэлэлцээрт нааштай байгаа сурагтай. 

Мягмар гарагт хийсэн хэвлэлийн бага хурал дээр Зеленский Туркт хийсэн айлчлалаа баталгаажуулснаар Орост хариу өгөх шахалтаа эрчимжүүлэхийг зорьсон нь тодорхой. Москвад дарамт шахалт үзүүлэх нь ашиггүй бөгөөд хэт өндөр хүлээлт тавих хэрэггүйг Кремль аль хэдийн анхааруулсан.

Украины удирдагч Путинтэй Истанбулд уулзахаар бэлтгэж байх зуураа 30 хоногийн хугацаанд гал зогсоох саналыг нэн тэргүүнд тавьж байгаа бөгөөд Украины бүх холбоотнууд, тэр дундаа АНУ үүнийг нь дэмжиж байна.

Л.Баяр