Австралийн Хөлбөмбөгийн Лигийн тоглогч асан, дасгалжуулагч Роберт Уоллс "сайн дураараа үхэх" хуулийг ашиглан 74 насандаа таалал төгсөв. Уоллс бол Австралийн хөлбөмбөгийн клубийн домогт "Карлтон" багийнхаа хамтаар гурван удаа тоглогч, нэг дасгалжуулагчийн хувиар аваргалж, дараа нь хэвлэл мэдээллийн ажилтан, шинжээчийг нь хүртэл хийж явсан зүтгэлтэн билээ.

Тэрээр 2023 онд цусны хорт хавдрын ховор, түрэмгий хэлбэр болох цочмог лимфобластын лейкеми өвчтэй гэж оношлогджээ. Түүний ар гэрийнхэн нь орон нутгийн хэвлэлд мэдээлснээр, тэрээр хүүхдүүдээрээ хүрээлүүлэн, Мельбурн хот дахь байрандаа нас баржээ.

Австралийн Виктория муж 2019 онд сайн дураараа нас барах хуулийг нэвтрүүлсэн бөгөөд энэ нь өвчний сүүлийн шатанд орсон хүнд туслах зорилготой, эмчийн зөвшөөрлөөр эм хэрэглэж амьдралаа дуусгах боломжийг олгодог.

Уоллсын ар гэрийнхэн мэдэгдэлдээ, "14 жил лигт тоглогч, 16 жил дасгалжуулагч, 25 жил тайлбарлагч, насан туршдаа энэ спортын төлөө амьдарсан тэр пүрэв гаргийн өглөө нас барсан. Хоёр жил гаруйн хугацаанд хорт хавдартай тэмцсэн Роберт сүүлийн хоёр жилийн хугацаанд эмнэлэгт 250 гаруй шөнийг өнгөрөөсө. Тэр тэмцлээ дуусгахаар шийдсэн" гэжээ.

Уоллс Карлтон клубийнхээ төлөө 200 гаруй тоглолт хийж, 1968, 1970, 1972 онуудад аваргалсан. Түүний дасгалжуулагчийн карьер нь 1987 онд эхэлсэн бөгөөд өөрийн багаас гадна "Брисбэн Лион", "Ричмонд Тайгерс" багийг удирдаж байсан. Тэрээр 1997 онд зодог тайлж, алдартай тайлбарлагч болжээ. Эхнэр Эрин нь 2006 онд хорт хавдраар нас барсан бөгөөд гурван хүүхдийн эцэг байв. 

Л.Баяр