Энэ сарын 4-5-нд шилжих шөнө долоон настай хүүгээ сэхээнд ортол зодсон хэрэг гарсан. Тухайн үед хүү ГССҮТ-д хүргэгдэн, сэхээн амьдруулах тасагт хэвтэн эмчилгээ хийлгэсэн юм. Ингээд хүүгийн талаар Хүүхдийн төлөө үндэсний газрын Хүүхэд хамгааллын төвийн газрын дарга Б.Жавзанхүүтэй ярилцлаа.
    Энэ сарын 4-5-нд шилжих шөнө долоон настай хүүгээ сэхээнд ортол зодсон хэрэг гарсан. Тухайн үед хүү ГССҮТ-д хүргэгдэн, сэхээн амьдруулах тасагт хэвтэн эмчилгээ хийлгэсэн юм. Ингээд хүүгийн талаар Хүүхдийн төлөө үндэсний газрын Хүүхэд хамгааллын төвийн газрын дарга Б.Жавзанхүүтэй ярилцлаа.

-Хүүхдийн биеийн байдал хэр байна?

-Гэр бүлийн жижиг маргаанаас болоод хүүхэддээ бие махбодийн шийтгэл өгч байна гээд аймшигтай, хэрцгийгээр зодсон хэрэг гарсан. Хүүхэд анх ГГСҮТ-ийн сэхээн амьдруулах тасагт хүргэгдэн эмчлэгдэж байсан ч одоо сайжирч байгаа. Томограф хийлгэж үзсэн. Тархины хүнд гэмтэл бага. Харин доргилт байгаа. Мөн зөөлөн эдийн гэмтлүүд маш их. Ер нь хүнд шархууд нь эдгэж байна. Хүүхдийг тайвшруулахаар манай сэтгэл зүйчид хүүхэдтэй өдөр бүр тулж ажиллаж байна.

-Мөнгөнөөс болж зодсон гэсэн үү?

-Тийм. Энэ мэдээллийг манай байгууллага энэ сарын 6-нд иргэний мэдээллээр хүлээж авсан. Маргааны эх үүсвэр нь хүүхэд 1500 төгрөгний бүтээгдэхүүнийг гэрийнхээ ойролцоо байдаг Түргэн үйлчилгээний цэгээс зээлээр авснаас үүдсэн байна лээ. Гэр бүлийн хүрээнд хүүхэд өөрийн насны онцлог, сэтгэхүй, хөгжлийн онцлогоос шалтгаалж янз бүрийн үйлдэл хийдэг. Гэхдээ хийсэн алхам нь зөв байхыг эцэг эх асран хамгаалагчид хянаж байх ёстой.

-Танай байгууллагаас хүүхдийн асуудалд хэрхэн ажиллаж байна?

-Хүүхдийн төлөө үндэсний газрын /ХТҮГ/ даргын тушаалаар ажлын хэсэг байгуулагдан, хүүхэд хамгааллын үйлчилгээ үзүүлэхээр ажиллаж байна. Өнөөдрийг хүртэл ХТҮГ-ын зургаан мэргэжилтэн хүүхдийн хэвтэж байгаа эмнэлэгт ажиллаж байна. Хүүгийн биеийн байдал одоо дээрдсэн. Манай байгууллагын ажилтнууд хүүхдийн сэтгэл санааны дэмжлэг үзүүлэн ажиллаж байна. Ажиллах хугацаанд багагүй бэрхшээл гарч байсан.

-Ямар бэрхшээл, тодруулбал?

-Хүүхдийн эх, хамаатан садан нь бид асрах ёстой. Бидний хэрэг. Та нар боль гэж биднийг болиулах хандлага үзүүлж байсан. Энэ нь ажиллагаанд асуудал үүсгэж байсан.

-Тэгэхээр ээжтэй нь уулзаж үзсэн үү. Юу гэж байх юм?

-Уулзсан. Анх их цочролд орчихсон байсан. Одоо харин гайгүй байгаа. Манай байгууллагын зүгээс ээжтэй нь ч мөн тулж ажиллаж байна. Би хүүхдээ хамгаалж чадаагүй гэж их гэмшиж байсан.

-Хүүхэд эмнэлгээс гараад хаана очих вэ?

-Хүүхдийг цаашид хаана байлгах уу гэдэг талаар бид судалгаа явуулж байна. Энэ гэр бүл ах дүүгээрээ хуралдаж шийднэ гэсэн. Тэр шийдвэрийг хүлээж байна.

-Эцэг эх байх эрхийг нь хасч болохгүй юу?

-Энэ бол хойд эцэг нь. Ээжтэй нь албан ёсоор гэр бүл болоогүй. Хойд эцэг нь байлаа ч албан ёсоор гэр бүл болчихсон бол арга хэмжээ авч, эцэг байх эрхийг нь хасуулж болно. Гэтэл энэ хүн эцэг нь биш. Зүгээр хамтран амьдрагч нь байсан учраас энэ хүнд цагдаагийн байгууллагаас арга хэмжээ авч байна.

-Ер нь хүүхдийг өмнө нь зодож байсан болов уу. Энэ талаар мэдсэн үү?

-Энэ хүүхдийн хувьд манай байгууллагаас яаралтай тусламж үзүүлэх ёстой гэж үзэж байгаа. Учир нь энэ хүүхдийн хувьд гэр бүлийн хүчирхийлэл давтагдсан байсан. Энэ байдлаараа байвал хүүхдийн амь насанд аюул учрах нь ээ гэж бодож байгаа. Тиймээс яаралтай тусламж үзүүлэн ажиллаж байна.

-Цаашид энэ мэт хүүхдийн хүчирхийллийн эсрэг танай байгууллага ямар арга хэмжээ авч ажиллаж гэж байна?

-Энэ сарын 14-15-нд ХТҮГ, Хүн амын хөгжил, нийгмийн хамгааллын яамтай хамтран “Хүүхэд гэр бүлийн, хөгжил хамгааллыг шинэчлье. Шинэчлэлд хамтдаа байя” үндэсний чуулганыг зохион байгуулах гэж байна. Хүүхдийн эсрэг гарч байгаа дарамт хүчирхийлэл, бие махбодийн, сэтгэл санааны дарамтыг ч тооцож байна. Энэ тохиолдол нэг биш байгаа юм. Хамгийн гол нь бид үүнд эмзэглэж байна. Хүүхдийг эцэг эх нь л зодож байна. Гэр бүлийн хүрээнд хүчирхийлэл өндөр байна. Одоо бол хүүхдийг зодож хүмүүжүүлдэг үе өнгөрсөн. Тиймээс үүнийг зогсоогооч гэсэн хатуу байр суурьтай байна.