“TV9” телевизийн 40 гаран ажилчин нэгэн зэрэг ажлаасаа гарсан талаарх мэдээлэл өнгөрсөн долоо хоногийн халуухан мэдээлэл байлаа. Ажлаасаа гарсан 40 ажилтан хоёр хоногийн өмнө хэвлэлийн хурал хийж олны дунд таамаг төдий яригдаад байсан цуурхалд өөрсдийн зүгээс хариу өгсөн билээ. Тэдний хэлж буйгаар Н.Долгор гэх хүн дарга болонгуутаа араваад уран бүтээлчийг ор үндэсгүйгээр ажлаас нь халж, үлдсэн уран бүтээлчдийг нь шахаж дарамталсан аж. Иймд тус телевизийнхэн Н.Долгортой цаашид хамтран ажиллах боломжгүй гэж үзэн өргөдлөө өгч ажлаасаа гарчээ. Бид мэдээллийг тэнцвэртэй хүргэх үүднээс үүсээд байгаа нөхцөл байдлын талаар Н.Долгор захирлын байр суурийг сонссон юм.

-    Үүсээд буй нөхцөл байдлын талаар та өөрийн байр сууриа илэрхийлнэ үү? Ажлаасаа халагдах өргөдлөө өгсөн уран бүтээлчдийн яриад байгаа зүйл хэр бодитой мэдээлэл вэ?

-    Аль ч байгууллагын удирдлага хуулийн хүрээнд л ажилладаг. Тэгэхээр үндэслэлгүй, хуулиас гадуур дур мэдэж ажилтнаа халаагүй нь ойлгомжтой. Энэ байгууллага өөрийн гэсэн хууль дүрэм дотоод журам болон ажлын байрны тодорхойлолттой. Сэтгүүлчид нь ажил олгогчийнхоо өмнө хүлээсэн үүрэгтэй. Эрх үүргийн тухай ярих юм бол маш их цаг орно. Товчхондоо хэлэхэд эхлээд 60 ажилчин ажлаасаа гарсан гэж байсан. Сүүлдээ 40 хүн болсон. Одоо 30 гаруй уран бүтээлч гэсэн зүйлийг яриад байгаа. Яг өнөөдрийн байдлаар албан ёсоор захирлын тушаал гараад ажлаас чөлөөлөгдсөн нийт 19 хүн байна. Нийт хүн гэж тодруулаад байгаагийн учир нь яг уран бүтээлчид хэд юм.  Хөлсөөр ажиллах гэрээтэй байсан хэдэн жолооч байгаа юм. Ажил гүйцэтгэлийн гэрээтэй байсан гэрээт уран бүтээлчид хэд юм гэхээр шал өөр асуудал яригдана. Тэдний хийсэн хэвлэлийн бага хурлыг тухайн үед нь би үзэж чадаагүй. Орой нь хэд хэдэн телевизээр харлаа. Захирлын тушаал гараагүй ажлын байр нь хэвээрээ өглөө нь нэвтрүүлгээ өгчихөөд үдээш хойш нь очоод зогсчихсон хүн харагдаж байсан. Намайг ажлаа авахаас өмнө тушаалаар солигдсон хүн ч байж байх шиг. Өмнө нь “TV9” телевизэд ажиллаж байгаад өөр телевизэд ажил гүйцэтгэж байгаа хүн ч харагдаж байсан. Ажлын байрны дарамт гэж тэд хэлээд байгаа.  Тэр их өөр ойлголт.   Ажлын байрны дарамт гэж хэвлэлийн бага хурал дээр яриад зүйлийг нь мэргэжлийн сэтгүүлч нар сонсоод анализ хийсэн байх. Уран сайхны зөвлөл байгуулаад нэвтрүүлгүүдийг түүгээр оруулаад шүүмжлээд хасдаг гэж тэд ярьж байна лээ. Үүнийг би дарамт гэж үзэхгүй байгаа юм. Хэвлэлийн бага хурал дээр надтай  холбоотой яригдсан асуудалд албан ёсны харуилт өгөхөөс гадна байгууллагын бодлого барьж байгаа гүйцэтгэх удидлагын хувьд байр сууриа илэрхийлэх нь зүйтэй. Яагаад гэвэл аль ч телевиз, уран бүтээлийн газарт дотоод журмынхаа дагуу уран сайхны зөвлөл ажилладаг. Эфирт ямар мэдээ мэдээлэл, нэвтрүүлэг гарах вэ? Техникийн шаардлага хангасан уу?. Уран сайхны шаардлага хангасан уу?. Мэргэжлийн ёс зүйг эрхэмлэсэн үү? гэдэгт цензур тогтоож, зөвлөгөө өгч, уран бүтээлээ мэргэшүүлэх хөгжүүлэх зорилгоор бид уран сайхны зөвлөлийг ажиллуулсан. Энэ бол аль ч телевиз, радио, хэвлэл мэдээллийн байгууллагад ажилладаг түгээмэл үзэгдэл.

- Танай уран сайхны зөвлөлд ямар хүмүүс байна вэ?

- Манай уран сайхны зөвлөлд УГЗ О.Соёлт найруулагч, зураглаач УГЗ, Донров гуай, сэтгүүлчдээс Төрбат бас нэг санхүүгийн хүн байна. Хардаж сэрдээд дарамт үзүүлээд байгаадаа гол нь биш тухайн 20 минутын нэвтрүүлэг маань ямархуу өртөг зардлаар бүтэх юм. Сайн бүтээлд 50 мянгаас 3 сая төгрөгийн шагнал олгох журам баталсан. Үнэхээр сайн бүтээлд нь өгье. Хийхгүй байгаад нь больё гэдэг зарчим шүү дээ. Тэр утгаар нь төсөв мөнгөтэй холбоотой нэвтрүүлэгүүд байдаг учраас санхүүгийн албанаасаа олон жил ажилласан нягтлан бодогчоо оролцуулсан. Орон тооны бус хоёр зөвлөхөөр нь нэрт найруулагч Ч.Жумдаан, СГЗ, СНЭ-ийн дарга байсан Б.Баасансүрэн гуайг оролцуулсан. Би өөрөө 20 гаран жил энэ салбарт ажиллаж байгаа мэргэжлийн найруулагчийн хувьд орон тооны бус найруулагч Жумдаан гуайг олох хүртлээ хоёр ч удаа уран сайхны зөвлөлийн хуралд оролцсон. Тэгэхдээ би нэг ч удаа эфирт үүнийг битгий гарга гэж хасаагүй. Мэргэжлийн зөвлөгөө өгсөн. Би 20 гаран жил ажиллахдаа 13 жилд нь СУИС-д мэргэжлийн багш хийсэн хүн. Үүнийг би ажлын байрны дарамт гэж үзэхгүй байгаа. Хоёрдугаарт томилолтын асуудал дээр сэтгүүлч нар гомдолтой байх шиг байна лээ. Цаг үеийн шуурхай зүйлд томилолтыг нь өгөөд явж байгаа. М.Бүжин сэтгүүлчийн томилолтын талаар Б.Отгон сэтгүүлч яриад байсан. Өмнөговийн асуудлыг ярьж байна лээ. Тухайн үед би өөрөө дөнгөж удирдлага авсан байсан. Байгууллага хоёр хоног асуудлыг шийдэж чадахгүй зүйл байсан. Яагаад гэвэл дотооддоо үйл явдал нилээн өрнөсөн байдалтай байсан. Орон нутгийн сонгууль эхэлж байсан учраас зураглаач нар “Засаг даргын нэг өдөр” гэсэн захиалгат нэвтрүүлэг хийх гээд гарсан байсан. Инфо сүлжээгээр дамжаад “Нутгийн өнгө” гэсэн нэвтрүүлгийг 10 хэдэн аймагт очиж хийх ажилтай байсан учраас гурван зэрэг томилолт гарсан байсан. Өөрсдөдөө яг үнэн бодит байдал дээр үүнийг маш сайн мэдэж байгаа. Отгон ч өөрөө тэр үед томилолттой явж байсан байх. Тэгээд л хоёр хоногийн дараа томилолтыг л өгөөд явуулсан. Тэр нэвтрүүлэг нь гарсан шүү дээ. Гэхдээ М.Бүжин томилолтоо аваад явсан. “Эзэнгүй төрийн эмгэнэл” гэсэн маш сайн нэвтрүүлэг хийсэн. Тухайн үед М.Бүжингийн нэвтрүүлэг үзэгч ихтэй байлаа. Эфирт үзэгчдийн хүсэлтээр дахин давтсан.  М.Бүжин хоёр цуврал нэвтрүүлэг хийсэн. Тэр нь давталттайгаар гурван өдөр гарсан. Иймэрхүү бодитой баримт  байна. Ер нь энд нэг л зүйл ажиглагдаж байгаа юм. Ажилчин, ажил олгогч үүрэг хүлээдэг. Тэр агуулгаараа хөдөлмөрийн гэрээгээр хүлээсэн үүргээ биелүүлэх ёстой. Тушаал гараагүй байгаа хүмүүс ч гэсэн тэнд байж болохгүй. Гэхдээ хамгийн гол нь өөрсдөө үүргээ яаж биелүүлсэн бэ? Мэргэжлийн ёс зүй, сэтгүүл зүйн ёс зүй, ажилтаны өөрийнх нь хувь хүний ёс зүй гэж байна. Ажил олгогч үүсгэн байгуулагчийн өмнө хүлээсэн үүрэг гэж байдаг шүү дээ.  Есөн давхар байшинтай зүйрлэх юм бол хөшиг нь хаалттай цонх нь сараалжсан тортой гэж хэлсэн нь их эмзэглэмээр юм. Ажилтан өөрөө есөн жил энд ажиллахдаа ажлын байраа сонгох боломж байсан. Есөн жил зүгээр ажиллаж байхад нь гэнэтхэн хоёр сарын дотор давхар бүрийнх нь цонхийг хааж, тор хадсан, хөшиг татсан гэдэг бол эргэлзээтэй асуудал.

- Хэвлэлийн хурал дээр программын албаны дарга Баярсайхан, маркетингийн албаны дарга Ариунболд нартай холбоотой санал гомдлоо таньд тавьж байсан гэсэн. Та тэр хүсэлтийг яаж хүлээж авсан бэ?

- Нэвтрүүлгийн албаны дарга Баярсайхан, маркетингийн албаны дарга Ариунболд гэсэн нэр яригдаж байна лээ. Хуулиараа олгогдсон байгууллагын нэр хүнд гэж байдаг шүү дээ. Хувь хүмүүсийн нэрийг нь дурдаад их ёс зүйгүй зүйл ярьж байгаа нь харамсалтай байна. Манай сэтгүүлч нар өөрсдөө үүнийг эрхэмлэх ёстой. Нэрээ дуудуулсан Баярсайхан энэ телевизэд 8 жил ажилласан мэргэжлийн сайн найруулагч. Сүүлийн нэг жил нэвтрүүлгийн албаны дарга хийж байгаа. Эд нар өөрсдөө мөр зэрэгцээд хамт бүтээл туурвиж байсан хүмүүс. Хамтарч нэвтрүүлэг төрүүлдэг байсан хүмүүс. Тэр хүн сэтгүүлчийг “Тэгэж хэлдэг ингэдэг” гэсэн бүдүүлэг үг хэллэг хэрэглэж байна лээ. Тэр бол хүмүүсийн хоорондын ёс зүй болоод харилцааны соёлын асуудал шүү дээ. Үүнийг байгууллагын хямрал гэж би хэлэхгүй байгаа юм. Байгууллагын боловсон хүчнээс мэргэжлийн мэргэшсэн таван мэдээний сэтгүүлч гарсан нь харамсалтай. Гэхдээ спортын албанд албаны дарга нь ажлаа хийгээд явж байгаа. Ажилчдын цай уудаг өрөө байр тасалгаа байдгаараа байж л байгаа.

-    Тэгвэл сэтгүүлчид асуудлыг дэвэргээд байна гэсэн үг үү?

-    Чи харж байгаа байх. Албаны дарга нь ажлаа хийж байна. Спортын гадаад, дотоод мэдээ явж байна. Спортын алба зургаан хүнтэй. Найруулагч нь өвчтэй эмнэлэгт эмчлүүлж байгаа. Ганзул сэтгүүлч ажлаас гарсан байна. Редактор Батзаяа хэвлэлийн хурал дээр байж байна лээ. Залуу хүмүүс алдаа хийжээ гээд буцаад гэмшээд хүрээд ирэхэд “TV9” телевиз уран бүтээлчдээ буцааж авахад бэлэн байна. Залуу насны огцом түргэн шийдвэр гаргахыг үгүй гэх газаргүй.

-    Нэг өдөр 28 хүний тушаалыг гаргасан гэдэг үнэн үү?

-    Бүх хүмүүсийн ажлаас чөлөөлж өгнө үү гэсэн өргөдөл нь байгаа. Ажилтан өөрсдөө энд ажиллахгүй гээд явж байгаа юм чинь хүчээр ажилла гэх юм бол жинхэнэ дарамт шахалт болно шүү дээ. Цаг хугацаа харуулна. Нэг л өглөө телевиз дээр ирэнгүүтээ манай мэдээний алба гарлаа гэсэн. Сэтгүүлч зураглаач хоёрыг зөөж байгаа машины жолоочид нэвтрүүлгийн албаны дарга яаж ажлын байрны дарамт үзүүлэх юм бэ? Бараг л харьцдаггүй алба шүү дээ. Зарим нэг хүмүүс маань эргээд ирж байна. Би тушаал гаргаад буцаагаад хүмүүсээ ажилд нь авч байна. Цэвэрлэгч нар маань бид юун дээр гарын үсэг зурчихваа гэж байсан. Өрөө цэвэрлэхэд яаж ажлын байрны дарамт үзүүлэх юм бэ? Цэвэрлэгчтэйгээ, жолоочтойгоо харьцах нь битгий хэл өөр хоорондоо бие биентэйгээ уулзаж учрахгүй явж байна шүү дээ. 24 цагийн эфиртэй телевиз гэдэг бол хүнээс зай засваргүй цаг шаардаж байдаг.

-    Энэ асуудал хаанаас эхтэй юунаас болоод үүсчих вээ?

-   Бид хэний ч шахалтаар биш өөрсдөө эвлэлдэн нэгдээд гарын үсгээ зурсан гэж байна лээ. Тэр эвлэлдэн нэгдсэн хүмүүс л албан ёсны хариултыг өгөх байх. Би бол шалтгааныг ойлгох гэж их хичээж байгаа. Хамт уран бүтээл хийж байсан уран бүтээлчийн хувьд одоо удирдлага барьж байгаа хүний хувьд алдаа оноо байсан байж магадгүй гээд өөрсдийнхөө ажилд дүгнэлт хийн харж байна. Ер нь бол алдаа оноо байсан байх. Дотооддоо бид нар үл ойлголцлын асуудал харьцааны соёл дээр анхаарах юм байсан байх. Эцсийн бүлэгт хэний эрх ашгийг хэн хөндсөн бэ? гэдэг нь асуултын тэмдэг болоод л үлдэж байгаа юм. Үүнд эрүүл саруул ухаанаар залуус маань дүгнэлт хийж байгаа байх. Нээрээ би чинь яг цэвэр өөрийнхөө эрх ашгийн төлөө энэ сонголтыг хийсэн үү үгүй юу. Би ямар сонголт хийчихвээ гэдгээ эргэж бодож байх шиг байна. Ер нь алдаа шинэ алхам, шинэ сургамж, ажил сайжруулах бас нэг боломж байдаг. Есөн жил болсон телевиз маань тодорхой цаг хугацаанд дотроосоо цагийн шалгуураар уран бүтээлч нөхөд байгууллага болон өөр өөрийнхөө эрх ашиг, мэргэжлийг хүндэтгэдэг хүмүүсийн цаг хугацааны шалгуур байсан юм болов уу гэсэн нэг өнцгийн дүгнэлт байна. Гуравдугаарт манай телевизийн мэдээний алба явчихаар “TV9” телевизийн мэдээ яах вэ гэсэн хүлээлт үзэгчдэд байсан. Гэхдээ “TV9” телевиз өнөөдрийг хүртэл эфирээ явуулж байна. Мэдээллийн хөтөлбөр нь явж байна. Мэдээний албанаас төрдөг байсан шууд нэвтрүүлгүүд нь явж байна. Ажилтан ажил олгогч хоёр талаасаа үүрэг хүлээхээс гадна бид үзэгчдийн өмнө асар их үүрэг хүлээсэн хүмүүс. Үзэгч мэдээлэл авах эрхтэй. Ажилтан, ажил олгогч хоёрын үл ойлголцлоос болоод тэр хүний мэдээлэл авах эрхийг нь бид хааж болохгүй. Бид үзэгчдээ хүндлээд телевизийн үйл ажиллагаагаа хэвийн явуулж байна. Үүнд мэргэжлийн туслалцаа үзүүлсэн бусад хэвлэл мэдээллийн байгууллага, хувь сэтгүүлч, зураглаач, жолооч нарт баярлалаа гэж хэлмээр байна. Энэ бол зайлшгүй хэлэх ёстой зүйл. Мөн манай залуус үүнээс хойш байгууллагад ажил хийхдээ хөдөлмөр эрхлэх, ажилд орох, ажлаас гарах эрх ашгийг хувь хүнд тавьж болно. Түүнээс биш хоёрдогч, гуравдагч хүний өмнөөс тэрийг энэ телевизэд ажиллуулвал ажиллана гэж болохгүй. Тэр хүн чинь хөдөлмөр эрхлэх эрхтэй. Манай спортын албаныхан нэг зүйл яриад байгаа юм. Долгор захиралд спортын албаны дарга Гандөшийн асуудлыг тавихад шийдэж өгөөгүй. Сэтгүүлч Ганзул өөрөө телевизэд ажиллахгүй байх эрхтэй. Ажлаас гарах, орох эрхтэй. Спортын албаны дарга Гандөшийг “TV9” телевизэд ажиллуулахын бол манай алба ажиллахгүй гэсэн ийм шаардлагыг бичгээр өгсөн. Би үүнийг ойлгоогүй. Гандөш гэдэг хувь уран бүтээлч энэ телевизэд ажил хөдөлмөр эрхлэх эрхтэй хүн шүү дээ. Хуулиар олгогдсон эрхээ эдэлж байна. Байгууллагын дотоод журмын дагуу ямар нэгэн зөрчил гаргаагүй байна. Шат дараалсан сахилгын шийтгэл юм уу захиргааны арга хэмжээ авагдаагүй байна. Ажлаа хэвийн хийж байгаа хүнийг ямар үндэслэлээр би халах юм. Цаашлаад Гандөш, Баярсайхан, Ариунболдын эрхийг хөндөөд байгаагийн цаана гүйцэтгэх удирдлага болох миний ажилд үүрэгт нөлөөлж байна. Гүйцэтгэх удирдлага ямар тушаал гаргахыг тэр хүмүүс бичгээр шаардаж байна шүү дээ. Аж ахуй нэгжийн хуулиараа ч ухамсартай хандаасай. Бие биенийхээ ажил үүргийг хүндэлж хуулийн хүрээнд соёлтой харилцан биенээ ойлгож ажиллаасай гэж хэлмээр байна. Энэ залуучууд багаараа бөөнөөрөө ажилд орно гэсэн мэдэгдэл хийж байна лээ. Тэгэхээр бие биенээ хүндэлж ажиллаасай.

-    Б.Отгон гэдэг хүн уриалаад гарчихлаа гэж хэвлэлээр бичээд байсан?

-    Би Б.Отгон гэдэг хүн уриаллаа гэж хэлж чадахгүй. Яг нөхцөл байдлыг ярихад тэд өөрсдөө нэр усаа бичээд гарын үсгээ зураад ТУЗ-д хүсэлт тавьсан. Бид гарын үсэг зурсан хүмүүстэй ойлголцохын тулд ТУЗ болон миний бие тухайлсан албууд хувь уран бүтээлчтэй нь уулзсан. Бүх нийтийн ажилчдын зааланд орж хуралдсан. Ерөөсөө харилцааны соёлын л асуудал яриад байна лээ. Түүнтэй холбоотойгоор ойлголцъё гэсэн. Ер нь анх тушаал гарахдаа Б.Отгон гэдэг хүн толгойллоо гээд тэр хүн дээр тушаал гаргаагүй. ТУЗ болон бид хамтын шийдвэрээ гаргаад дөрвөн хүний тушаалыг гаргасан. Дөрвөн хүний тушаалыг гаргахад тэнд байж байгаа жолооч гэх бусад хүмүүс бүгдээрээ ажлаас гаръя гээд өргөдөл өгч байна лээ.  Хэний эрх ашиг ард нь хөндөгдсөнийг би ойлгоогүй. Үүнийг цаг хугацаа харуулах байх. Ажлын байр гэдэг бол ажил л хийх газар. Түүнээс биш “TV9” телевизийн ажлын байран дээр дотоод журмаар хүлээсэн үүргээ зөрчөөд “Чи үүн дээр гарын үсгээ зурчих аа” гээд цаас аялуулаад гарын үсэг цуглуулаад явж болохгүй. Гарын үсэг зурсан хүмүүс нь “Өө мэдэхгүй мэдэхгүй. Яг ажлаа хийгээд сууж байсан чинь нэг цаас авч ирсан. Юу гэсэн чинь ажилчдын гарын үсэг цуглуулж байна гэхээр нь зурсан” гэж ярьж байна. Мөн зарим нэг хүн нь “Үнэхээр манай зарим нэг хүмүүсийн харилцааны соёлын асуудал их бүдүүлэг байна. Үүнийг ойлголцъё гэхээр нь би зурсан” гэж байна. Гарын үсэг зурсан, зуруулсан хоёр талаасаа л тайлбар өгөх байх даа. Би бол гарын үсэг зуруулсаныг ч мэдээгүй. Захирлын тушаал гарахаас өмнө тэд бүгдээрээ гарын үсгээ өгөөд хоёр өдөр ажил хийхгүй энд байлаа шүү дээ. Бид хоёр хоногт нь тухайн хүмүүсийг ажил тасаллаа гэсэн зүйл яриагүй. Ойлголцъё, ширээний ард сууя, та нар ямар ч байсан ажил төрлөө хий гэсэн. Тушаал  гараагүй байхад л доод талын цайны газар бөөгнөрөөд л орж гараад л байсан. Байгууллага ийм байж болохгүй шүү дээ. Бид аль болох хүлээцтэй хандсан. Өөр аж ахуй нэгж хувийн байгууллага байсан бол нилээн хатуу ширүүн арга хэмжээ авах байсан байх. Залуус маань алдаагаа ойлгоод  эргээд ирэх байх гээд их хүлээцтэй хандаж байна. Ер нь эхнээсээ ойлгож байх шиг байна. Тодорхой цаг хугацааны дараа алдаа оноо хаана байсан. Миний санаатай санамсаргүй хийсэн үйлдэл хэн нэгэн хүний эрх ашгийг хөндөж нөлөөлсөн биш юм байгаа гэж эрүүл саруул ухаанаар дүгнэлт хийх байх. Бүгд шаналдаг зүрх сэтгэлтэй учраас нэг найз нь өөрийнх нь хийсэн үйлдлээс  болоод ажилгүй байж байхад санаа зовох л асуудал шүү дээ. Бүгд л ажилтай байсан хүмүүс шүү дээ. Манай цалин хөлс асуудалгүй. Хамгийн өндөр цалин хөлстэй байдаг. Өнөөдөр энэ телевиз алдаатай буруу бодлого гаргасан гэж үзсэн бол ажилд орох гэж ирсэн энэ олон уран бүтээлч алдаатай шийдвэр гаргасан удирдлагад хувь заяагаа даатгахаар ирэхгүй байх аа л гэж бодож байна.

-    Дөрвөн хүнийг ямар үндэслэлээр ажлаас нь чөлөөлсөн юм бэ?

-    Хөдөлмөрийн гэрээгээр хүлээсэн үүрэг нь байгаа. Тэр хүн бол ажлаа хийх ёстой. Хоёрдугаарт дотоод журмаар хүлээсэн үүрэг нь байгаа. Дотоод журман дээр тодорхой бичсэн заалтууд байж байгаа. Хэвлэл мэдээллийн байгууллага улс төржих газар биш. Дотоод журамтай, засаг захиргаатай, албан нэгжийн даргатай, албан нэгжийн дарга нь хэлтэсдээ хамаарагдаад байж байтал юу ч мэдэгдэлгүйгээр өөрсдөө эвлэлдэн нэгдсэн гэдэг нэрийн дор үйл ажиллагаа явуулаад байна. Ямар санаа зорилготойг нь мэдэхгүй байна. Тэгээд гарын үсэг зуруулаад. Бусад нь ажил төрлөө хийж байхад энд гарын үсэг зур зур гэдэг. Тэр нь өөрөө ямар үр дагавартай юм бэ гэвэл “Би ажил хийх юм бол чи битгий энд ажилла. Тэрийг халаад өгчих, солиод өгчих” гэдэг. Иймэрхүү л үндэслэлээр холбогдох хүмүүст нь тушаал гарсан. Тэгсэн тушаал гарсан хүмүүстэй бид нэгдэнэ гээд бусад нь ажлаас гарсан. Нэг л шалтгаантай яг ижил төрлийн өргөдлүүд байсан. Баярсайхан, Ариунболд, Гандөш нарынгаа өмөөрдөг гэж намайг буруутгасан. Би гүйцэтгэх захирлын албан тушаалыг авснаас хойш Гандөшийг албаны даргаар томилоогүй. Өмнөх захирлын тушаалаар албаны дарга болсон. Баярсайхан өмнө нь найман жил ажилласан. Бас өмнөх даргын тушаалаар программын албаны дарга болсон. Ариунболд ч гэсэн адилхан. Тэгэхээр энд би амбицлаад гурван хүнийг албаны даргаар тавьсан зүйл байхгүй.

-    Яг одоо “TV9” телевизийн ажил хэр явагдаж байна вэ?

-    Ажил хэвийн явж байна. Уран бүтээл, мэдээ мэдээллүүд, нэвтрүүлэгүүд явж байна. Би өмнөх залуучуудынхаа ажил мэргэжлийг үгүйсгэхгүй. Өмнө нь ажиллаж байсан сайн сэтгүүлч, зураглаач нарын тус дэмжлэгтэйгээр энэ телевиз их нэр хүндтэй болсон. Тэд нарын маань хөлс хүч, сэтгэл шингэсэн нэр хүндийн буянаар дараагийн орон зайг эзэлсэн шинэ залуу уран бүтээлчид ажилд орох хүсэлтээ бариад ирж байна. Зарим нэг хүмүүстэй түр хугацааны гэрээ хийгээд явж байна. Залуус маань эргээд ирэх байх гээд хүлээлттэй байна. Тэдний ажлын байр нь хадгалаастай байна.

-    Өмнөх захирал Энхбат энэ үйл ажиллагаанд нөлөөлсөн үү?

-   Үгүй. Би Энхбат захиралтай найман жил хамтарч ажилласан хүн. Энхбат энэ байгууллагыг найман жил удирдаж авч явсан захирал хүн өөрийнхөө хөлс хүч хөдөлмөрөөр босгосон зүйлээ нураахгүй шүү дээ.