АНУ-ын ерөнхийлөгч Д.Трамп болон ОХУ-ын удирдагч Владимир Путин нар өнгөрсөн баасан гарагт Аляскад хийсэн дээд хэмжээний уулзалтын үр дүнд АНУ-ын ерөнхийлөгч гал зогсоох хүсэлтээ цуцалж, оронд нь байнгын энхийн хэлэлцээр байгуулахыг уриалсан билээ. Улмаар Д.Трамп даваа гарагт В.Зеленский болон Европын томоохон удирдагчдыг Цагаан ордонд хүлээн авна. 

Тэднийг хүлээн авах бэлтгэл ажил хангагдаж буй энэ үед Доналд Трамп "Хэрэв хүсвэл Украины ерөнхийлөгч Оросын дайныг зогсоож чадна, гэхдээ энхийн хэлэлцээрийн хүрээнд "Украин НАТО-д орохгүй" гэж мэдэгджээ. АНУ-ын төлөөлөгч ням гарагт хэлэхдээ, Путин Украинд НАТО-той адил аюулгүй байдлын гэрээ байгуулахыг зөвшөөрсөн гэв.

ОХУ-ын ерөнхийлөгч Украиныг цэргийн эвсэлд нэгдэх санааг байнга эсэргүүцсээр ирсэн. Ням гаргийн орой "Truth Social" платформ дээрээ Трамп хэлэхдээ "Украины ерөнхийлөгч Зеленский хэрэв хүсвэл Оростой хийсэн дайныг бараг тэр даруй зогсоож чадна, эсвэл үргэлжлүүлэн тэмцэж болно. Энэ хэрхэн эхэлснийг санаарай. Обамад Крымийг буцааж өгөх боломжгүй. УКРАИН НАТО-д ОРОХГҮЙ. Зарим зүйл хэзээ ч өөрчлөгддөггүй!!!" гэжээ.

Нэгдүгээр сард Трампыг засгийн эрхэнд эргэн ирэхээс өмнө НАТО-гийн орнууд Киевийг тус эвсэлд элсэх "эргэшгүй зам"-ын талаар тохиролцсон байдаг. НАТО-гийн Ерөнхий нарийн бичгийн дарга Марк Рютте, Их Британийн Ерөнхий сайд Кейр Стармер зэрэг Европын удирдагчдын хамт даваа гарагт Вашингтонд Зеленскийтэй нэгдэж, Украины ирээдүйн талаар хэлэлцээ хийнэ.

Мөн Францын Ерөнхийлөгч Эммануэль Макрон, Италийн Ерөнхий сайд Жоржиа Мелони, Германы канцлер Фридрих Мерц, Финландын Ерөнхийлөгч Александр Стубб, Европын Комиссын Ерөнхийлөгч Урсула фон дер Лейен нар оролцох төлөвтэй байгаа. Гэхдээ тэдний хэд нь Цагаан ордонд очих нь тодорхойгүй байна.

Трамп дараа нь "Маргааш Цагаан ордонд том өдөр болно. Хэзээ ч ийм олон Европын удирдагчид нэг дор байгаагүй. Тэднийг хүлээн авч байгаа нь миний хувьд нэр төрийн хэрэг!!!" гэжээ.

Л.Баяр