Одоогоос гурван жилийн өмнө 2022 оны долоодугаар сард Японы Ерөнхий сайд асан Шинзо Абэ олон нийтийг хамарсан улс төрийн арга хэмжээнийхээ үеэр бусдын гарт амь эрсэдсэн билээ. Түүнийг хөнөөсөн этгээд гэрийн нөхцөлд хийсэн галт зэвсэг ашиглан хоёр удаа буудсан байдаг. 

Тэгвэл уг этгээдийн шүүх хурал Нара хотын анхан шатны шүүхэд 2025 оны 10 дугаар сарын 28-ны өдөр эхлэх тов гарчээ. Анхан шатны шүүх 18 удаа хуралдахаар төлөвлөж байгаа. Мөн шүүхийн шийдвэр 2026 оны нэгдүгээр сард гарах төлөвтэй байгаа гэнэ. 

Сэжигтний гэр бүлийн гишүүд "Unification Church" шашны байгууллагад их хэмжээний хандив өгч эдийн засгийн хүнд байдалд орсон нь уг хэрэг гарах гол шалтгаан болсон гэж олон нийт ярьдаг. Учир нь Шинзо Абэг уг сүмийг санхүүжүүлж, тэтгэдэг гэсэн бодол нь түүнийг хөнөөх сэдлийг төрүүлсэн гэж хэрэгтэн баригдсаныхаа дараа мэдүүлсэн. 

               Энэхүү хэрэг нь Японы түүхэн дэх хамгийн том улс төрийн аллага гэгдэж буй. Түүнчлэн тус улсад галт зэвсгийн гэмт хэрэг маш ховор байдгийн хувьд бүх нийтийг цочирдуулсан явдал болсон төдийгүй шүүхийн шийдвэрт улс орон даяар анхаарал хандуулж байгаа билээ. 

Л.Баяр