Газын зурваст ХАМАС бүлэглэлийн барьцаанд амьд байгаа гэж үзсэн Израилын 20 иргэнийг өнөөдөр суллах гэж байна. Мөн АНУ-ын зуучлалаар байгуулсан гал зогсоох хэлэлцээрийн эхний чухал үе шат болох Израил дахь Палестины 2000 орчим хоригдлыг суллах юм. Тэгвэл барьцаалагдсан хүмүүсийг суллах үйл явц хэрхэн өрнөх талаар Израилын засгийн газар төлөвлөгөөгөө гаргажээ.

Энэ бол хоригдлуудын анхны солилцоо биш юм. Энэ удаагийн сололцоогоор Газад барьцаалагдсан 20 изриалын иргэнийг Улаан загалмайн нийгэмлэгт хүлээлгэн өгч, 6-8 тээврийн хэрэгслээр зөөх ажээ.

Барьцаалагдсан хүмүүсийг эмнэлэгт эмчлүүлэхээс өмнө ар гэрийнхэнтэй нь уулзуулна гэж Израилын засгийн газар мэдэгдэв. Амиа алдсан хүмүүсийг буцааж өгөх ёслол болох бөгөөд олон улсын ажлын хэсэг ХАМАС бүлэглэлийн барьцаанд амь үрэгдсэн хүмүүсийн цогцсыг зөөх ажиллагаанд оролцож байгаа гэнэ. 

Барьцаалагдсан хүмүүсийг Израилын нутаг дэвсгэрт аюулгүй шилжүүлсний дараа тохиролцсон Палестины хоригдлуудыг Израилын тал суллах ёстой. Израил бүх насаар нь хорих ял авсан 250 Палестин хоригдол, мөн 2023 оны 10 дугаар сарын 7-ны өдрөөс хойш баривчлагдсан 1700 Палестин иргэнийг суллах ажээ. 

Израилын шоронгийн албаны хэвлэлийн төлөөлөгчийн хэлснээр, суллагдах ёстой бүх насаар хорих ял эдэлж буй хоригдлуудыг өнгөрсөн бямба гарагт Израилын өмнөд хэсэгт орших Офер болон Кетциот шорон дахь албадан гаргах цогцолборт хүргэсэн байна. Эдгээр хоригдлуудын 142-ыг нь албадан гаргах аж. Үлдсэн хэсэг нь эзлэгдсэн Баруун эрэг эсвэл Зүүн Иерусалим руу буцна.

Л.Баяр