Өмнөд Солонгосын шүүх найман настай охиныг хутгалж амь насыг нь хөнөөсөн багшид бүх насаар нь хорих ял оноолоо. 48 настай Мён Жэ Ван өнгөрсөн хоёрдугаар сард Ким Хэ Неулийг төв Дэжон хотын сургуульд охиныг уруу татан ангид нь оруулж амийг нь хөнөөсөн юм.

Прокурорууд болон хохирогчийн ар гэрийнхэн Мёнд цаазын ял оноохыг хүссэн. Гэвч шүүх "Дахин гэмт хэрэг үйлдэх эрсдэл өндөр байгаа ч Мёныг цаазлах нь зохимжгүй. Үхэхийн оронд тэр насан туршдаа алдаагаа ухамсарлах хэрэгтэй" гэж мэдэгджээ. 

Прокурорууд Мёнг хэрэг мөрдөн байцаалтын явцад огт гэмшиж байгаагүй гэж мэдэгджээ. Гэвч Мён гэмшиж буйгаа илэрхийлсэн олон арван захидал шүүхэд өгсөн байна. 

Мён өмнө нь сэтгэл гутралд орсон гэх шалтгаанаар зургаан сарын чөлөө авах хүсэлт гаргасан ч сургууль нь түүнд 20 хоногийн чөлөө олгосон байдаг. Тэрбээр хэрэг үйлдэхээсээ өмнө бусдад таагүй хандах, өөр багшийн биед гар хүрэх зэрэг буруу хандлагууд үзүүлж байсныг гэрчүүд хэлсэн. 

Хэргийн хохирогч найман настай Кимийн хувьд сургуулийн автобусны жолооч тухайн өдөр түүнийг харихаар унаандаа суугаагүй гэж мэдэгдсэн. Ар гэрийнхэн нь хайсан ч түүнийг нас барсан байдалтай сургуулиас нь олсон юм. Мён ч мөн хүзүүндээ шархтай байсан бөгөөд энэ шархыг өөрөө өөртөө учруулсан гэж үзэж байгаа. 

Л.Баяр