Шинэ ажиглалтын судалгаагаар өдөр бүр алхах, алхалтынхаа тоог нэмэгдүүлэх нь Альцгеймерийн өвчний эхэн үеийн биологийн шинж тэмдэг илэрсэн өндөр настай хүмүүсийн танин мэдэхүйн бууралтыг удаашруулж болзошгүй гэж үзэж байна.

         Бета амилоид ба тау уураг нь Альцгеймерийн шинж тэмдэг юм. Амилоид нь 30 наснаас эхлэн мэдрэлийн эсүүдийн хоорондох зайд хуримтлагдаж эхэлдэг бөгөөд энэ нь тархины эс хоорондын харилцаа холбоонд нөлөөлдөг байна. Амилоид ихсэх тусам тархины эс дотор орооцолдсон хэвийн бус тау уураг хурдан тархаж, улмаар үхэлд хүргэдэг.

Бостон дахь Массачусетсийн нэгдсэн эмнэлгийн мэдрэл судлаач, ой санамжийн эмгэгийн эмч, эрдэмтэн доктор Вай-Йинг Вэнди Яу, "Биеийн тамирын дасгал нь ой санамж алдагдахтай хамгийн нягт холбоотой уураг болох "tau"-ийн хуримтлалыг удаашруулж, Альцгеймерийн эхэн үед өвчилсөн хүмүүсийн танин мэдэхүйн бууралтыг удаашруулж чадна" гэж хэлжээ.

Өдөрт 3000-5000 алхдаг хүмүүсийн танин мэдэхүйн бууралт дунджаар гурван жилээр, өдөрт 5000-7500 алхам алхдаг хүмүүсийн хувьд долоон жилээр хойшилсон гэж Яу мэдэгджээ.

Судалгаа нь мэдээлэл сайтай хэдий ч Альцгеймерээс урьдчилан сэргийлэхийн тулд өдөрт тодорхой тооны алхмуудыг хийх нь хэтэрхий энгийн зүйл гэж Флорида дахь Мэдрэлийн доройтлын өвчний хүрээлэнгийн судалгааны захирал, мэдрэлийн эмч, доктор Ричард Исааксон хэлэв. Өөрөөр хэлбэл тэр Яугийн судалгааг үгүйсгэж байгаа юм. Тэрбээр "Би 5000 эсвэл 7000 алхам алхах гэх мэт анхаарал татахуйц тоонуудад маш болгоомжтой ханддаг" гэжээ.

Яугийн судалгаанд цөөн буюу 50-90 насны ердөө 296 хүн оролцсон ч судлаачид бодит хэмжүүр ашигласан нь Даваа гарагт "Nature Medicine" сэтгүүлд нийтлэгдсэн 14 жилийн судалгааны найдвартай байдлыг илтгэж байгаа тухай хэвлэлүүд мэдээлэв. Өдөрт 7500 алхам алхдаг хүмүүсийн хувьд таугийн хуримтлал 3-7 жилээр удааширч байсан бол хөдөлгөөн багатай хүмүүс тау уураг их хэмжээгээр хуримтлуулж, танин мэдэхүйн болон өдөр тутмын үйл ажиллагаа нь хурдан буурдаг болохыг судалгаагаар тогтоосон юм.

Л.Баяр