Эмнэлгийн салбарын эмч, ажилчид энэ сарын 13-наас эхлэн ажил хаялт зарлаж байгаагаа мэдэгдээд байна. Тэгвэл бид та бүхэнд эмчдээ өндөр цалин өгдөг 10 улсыг онцолж байна. 

Швейцарь

Энэ улсад эмч нарын дундаж цалин дэлхийд хамгийн өндөр буюу жилд дунджаар 264,055 ам.доллар байна. Энд нэг эмч дунджаар цагт 127 ам.доллар буюу монгол мөнгөөр 450 мянга гаруй төгрөг авдаг гэсэн үг. 2022 оны судалгаагаар тус улсын ДНБ-ий хэмжээ $841.69 тэрбум, Нэг хүнд ноогдох $92,434 байна. Цалин өндөр газар эмнэлгийн чанар, хүртээмж дээд зэрэглэлийнх байх нь гарцаагүй. 

АНУ

Дэлхийн эдийн засгийн гол гүрэн болох АНУ энэ жагсаалтын хоёрдугаар бичигдэж байна. Энд эмч нар жилд дунджаар 261,226 ам.доллараар цалинжиж байгаа гэх тооцоо гарчээ. Цагт дунджаар 126 ам.долларын цалин авдаг. Гэвч АНУ-ын эрүүл мэндийн даатгалын систем алдаатай, татвар нь хэтэрхий өндөр байдаг гэлцдэг. 2022 оны судалгаагаар тус улсын ДНБ-ий хэмжээ $25.03 их наяд, нэг хүнд ноогдох $75,179 байна.

Люксембург

700 мянга хүрэхгүй хүн амтай уг улсад эмч нар жилд дунджаар 241,761 ам.долларын цалин авдаг. Өөрөөр хэлбэл энд нэг эмч цагт дунджаар 116 ам.долларын цалинтай юм. Жижигхэн газар нутагтай ч тус улсын ДНБ-ий хэмжээ $86.898 тэрбум, нэг хүнд ноогдох нь $135,046 байна.

Бермуд

Британийн хилийн чанад дахь нутаг дэвсгэр болох уг харьяа улсад эмч нар жилд дунджаар 232,467 ам.долларын цалинтай. Цагт дунджаар 112 ам.долларын цалин авдаг гэсэн үг. 70 мянга гаруй хүнэ амтай эл улсын ДНБ-ий хэмжээ 7.484 тэрбум ам.доллар, нэг хүнд ногдох нь 117,097 ам.доллар байна.

Бермуд нь Хойд Атлантын далай дахь Британийн хилийн чанад дахь нутаг дэвсгэр юм. Нутаг дэвсгэрээс гадна хамгийн ойр газар нь АНУ- ын Хойд Каролина мужид баруун хойд зүгт 1035 км оршдог. Олон арлаас бүрдсэн, өндөр хөгжилтэй ардчилсан улс билээ.

Австрали

Энд эмчийн жилийн дундаж цалин 201,744 ам.доллар байдаг. Цагт дунджаар 97 ам.долларыг авдаг гэсэн үг юм. Дэлхийн зургаа дахь том улсын хувьд ДНБ-ий хэмжээ $1.708 их наяд, нэг хүнд ноогдох нь $64,964 байна. Австрали буюу албан ёсоор Австралийн Хамтын Нөхөрлөлийн Улс Австралийн эх газрыг болон үүнийг тойрон орших жижиг арлуудаас бүрдэх тусгаар улс юм.

Исланд

Бүгд Найрамдах Исланд Улс нь эх газрын Европ ба Гренландын хооронд Умард Атлантын далайд орших арал улс юм. Хүн ам нь 320 мянга орчим бөгөөд нийт 103,000 км² газар нутагтай. Гэвч энэ улсад эмчийн жилийн дундаж цалин нь 192,373 ам.доллар байдаг. Цагт дунджаар 92 ам.доллар авдаг байх нь. Тус улсын ДНБ-ий хэмжээ 2022 оны судалгаагаар $27.702 тэрбум, нэг хүнд ноогдох нь $73,981 байна.

Дани

Данийн Хант Улс нь Балтын тэнгис, Хойд тэнгисийн хооронд байрлах Ютландын хойг ба ойр орчмын арлууд дээр орших Хойд Европын улс юм. Нийслэл нь Зеланд арал дээр орших Копенхаген хот. Хойд талаараа тэнгисээр Скандинавын орнууд, өмнө талаараа хуурай газраар Герман улстай хиллэдэг. Гренланд, Фарерын арлууд нь тус орны харьяанд өөртөө засан тохинох эрхтэй.

Тэгвэл энэ улсад эмч нарын жилийн дундаж цалин 189,770 ам.доллартай дүйж байна. Цагт дунджаар 91 ам.доллар авдаг. Тус улсын ДНБ-ий хэмжээ 2022 оны байдлаар $390.677 тэрбум, нэг хүнд ноогдох нь $66,516 байна.

АНЭУ

Дэлхийн чинээлэг орнуудын нэг уг улсад эмчийн жилийн дундаж цалин 182,012 ам.доллар, цагт дунджаар 87 ам.доллар авдаг байна. Арабын Нэгдсэн Эмират Улс нь Ойрх Дорнод буюу Баруун Азид орших Арабын хойг дахь 7 орны холбоо улс юм. 10 сая орчим хүн амтай уг улсад ДБН-ий хэмжээ $501.354 тэрбум, нэг хүнд ноогдох нь $50,349 байна.

Канад

Канадад эмчийн жилийн дундаж цалин 174,087 ам.доллар байдаг. Цагт дунджаар 84 ам.доллар авдаг ажээ. Хойд Америкийн хойд хэсгийн ихэнх нутаг дэвсгэрийг эзлэн оршдог тус улсад ДБН-ий хэмжээ $2.090 их наяд, нэг хүнд ноогдох нь $52,722 байна.

Финланд

Жагсаалтын аравдугаар байрт Финланд улс оржээ. Бүгд Найрамдах Финланд Улс нь хойд Европын Фенноскандиа бүсэд орших Скандинавын орон юм. Баруун талаараа Швед улстай, зүүн талаараа Оросын Холбооны Улстай, хойд талаараа Норвеги улстай, өмнөд талаараа Финийн булангаар Эстони улстай тус тус хиллэдэг.

Энд эмчийн жилийн дундаж цалин 173,507 доллар байдаг. Финландтай бараг л ижил цалин өгдөг улсууд байна. Тодруулбал, Хонг Конг, Ирланд, Их Британи, Бельги, Шинэ Зеланд, Сингапур, Норвеги, Багамын арлуудад 160-170 гаруй мянган ам.долларын цалин өгдөг ажээ. 

Л.Баяр