Хонконгийн орон сууцны хороололд өнгөрсөн долоо хоногт олон барилгыг хамарсан түймэр болсон билээ. Уг гамшигт амь үрэгдсэн хүмүүсийн заримынх нь шарилыг хэзээ ч гаргаж чадахгүй байж магадгүй гэж албаны хүн Даваа гарагт мэдэгджээ.

Ван Фукийн ордны долоон өндөр цамхгийг нураасан сүүлийн хэдэн арван жилд тохиолдсон хамгийн том уг түймрийн дараа амиа алдагсдын тоо 151 болж, наад зах нь 30 хүн сураггүй алга болсон гэж албаныхан мэдэгдэв. Засварын ажил хийгдэж байсан тус орон сууцны хороололд 4000 гаруй хүн амьдардаг бөгөөд тэдний ихэнх нь өндөр настнууд байсныг мөн онцлов.

Даваа гарагт болсон хэвлэлийн бага хурлын үеэр мөрдөн байцаах албаны ахлах ахлагч Карен Цанг "Зарим цогцос үнс нурам болсон тул бид сураггүй болсон зарим хүмүүсийг шарилыг нурангиас гаргаж чадахгүй байх" гэжээ. Түүнчлэн галын улмаас баривчлагдсан хүмүүсийн тоо 14-д хүрч, энэ тоо нэмэгдэж магадгүй гэж хэлээд, эрх баригчид барилгын компаниудыг галын аюулгүй байдлыг хангаагүй материал худалдан авч ашигласан хэмээн буруутгаж байна.

Баривчлагдсан хүмүүсийн дийлэнх нь барилгын ажилтай холбоотой зөвлөх, гүйцэтгэгч, туслан гүйцэтгэгч байсан бөгөөд тэдний 13-ыг нь “Онцгой болгоомжгүйгээс хүний ​​амь нас хохироосон” байж болзошгүй хэмээн сэжиглэн шалгаж байгаа талаар албаныхан мэдээллээ.

Баасан гарагт галыг унтрааснаас хойш 600 орчим гамшигт нэрвэгдэгсдийг тодорхойлох мэргэжилтэн орон сууц бүрийг цэвэрлэхээр ажиллаж байгаа аж.

Л.Баяр