ОХУ-тай хийж буй дайныг зогсоох энхийн хэлэлцээнд Киев талын тэргүүлэх чиглэл бол Украины бүрэн эрхт байдлыг хадгалах, аюулгүй байдлын бат бөх баталгааг хангах явдал гэж тус улсын Ерөнхийлөгч Зеленский мэдэгдлээ.

Орос Украиныг өөрийн эзэмшилд байгаа Донбассын зүүн бүс нутгуудаас татгалзахыг шаардсаар байгаа. Гэвч "Киев үүнийг хэзээ ч хийхгүй. Нутаг дэвсгэийн асуудал хамгийн хэцүү" гэж Зеленский гэж мэдэгдэв.

Тэрбээр Францын Ерөнхийлөгч Эммануэль Макронтой Парист уулзсаныхаа дараа Их Британи, Герман, Польш, Итали зэрэг Европын удирдагчидтай хийсэн уриалгад нэгдсэнийхээ ард ийн хэлжээ.

Энэ хооронд Украин, АНУ-ын хэлэлцээчид Флоридад хоёр өдрийн уулзалтаа дуусгаж, Орост ашигтай гэж үзсэн энхийн төлөвлөгөөг шинэчлэхээр ажиллаж байна.

     Даваа гарагт Цагаан ордон хэлэлцээнд эерэг хандсан бөгөөд хэвлэлийн нарийн бичгийн дарга Каролин Левитт засгийн газар дайныг зогсоох хэлэлцээрт "маш өөдрөг байна" гэж мэдэгдэв.

Зеленский илүү болгоомжтой хандаж, яриа хэлэлцээ "маш бүтээмжтэй" байсан ч "харилцаж шийдвэрлэх шаардлагатай зарим нэг хэцүү асуудлууд байгаа" гэж X хуудсанд нийтэлжээ.

Украины төлөөлөгчидтэй хийсэн хэлэлцээнд оролцсон АНУ-ын тусгай элч Стив Виткофф Орос руу явж, ОХУ-ын Ерөнхийлөгч Владимир Путинтэй мягмар гарагт уулзана. Тэдэнтэй хамт ерөнхийлөгч Трампын хүргэн, зөвлөх Жаред Кушнер оролцох юм.

Виткофф Зеленский, Макрон, Украины хэлэлцээрийн ахлах төлөөлөгч Рустем Умеров, Их Британийн Ерөнхий сайд Кейр Стармер нартай ярилцсан бөгөөд хэлэлцээний үр дүнг Путинд уламжлах төлөвтэй байна.

Өнгөрсөн долоо хоногт Путин энх тайвны төлөвлөгөөний төслийг америкчууд Орост үзүүлсэн бөгөөд энэ нь дайныг зогсоох ирээдүйн хэлэлцээрийн "үндэс" болж магадгүй гэж мэдэгджээ.

Л.Баяр