Өнгөрсөн 11 дүгээр сарын сүүлээр Укрианы албаны хүмүүс АНУ-ын албаныхантай уулзаж дайныг зогсоох ерөнхий төлөвлөгөөг баталсан. Улмаар АНУ-ын тусгай элч Стив Виткофф уг төлөвлөгөөг ОХУ-ын Ерөнхийлөгч В.Путинд танилцуулахаар ОХУ-д ирээд буй. Тэдний яриа хэлэлцээ "бүтээмжтэй" байсан ч "илүү их ажил хийх шаардлагатай" болсон тухай хэвлэлүүд мэдээлэв.

ОХУ-ын Гадаад бодлогын зөвлөх Юрий Ушаковын хэлснээр ОХУ-ын тал Украины газар нутгийн концессын асуудалд буулт хийсэнгүй гэж мэдэгдэв.

Владимир Путин, АНУ-ын төлөөлөгч Стив Виткофф, Трампын хүргэн, зөвлөх Жаред Кушнер нарын Москвад хийсэн уулзалт таван цаг орчим үргэлжилжээ. Путин өмнө нь Европын энхийн хэлэлцээрийн шаардлагыг "хүлээн авах боломжгүй" гэж хэлээд "Бид Европтой тулалдахгүй, гэхдээ Европ бидэнтэй тулалдахыг хүсвэл бид одоо ч бэлэн байна" гэж хэлсэн билээ. Уг байр сууриндаа бат зогсож байгаа бололтой. 

         Энэ бүхэн хоёр долоо хоногийн өмнөөс хэлэлцсэн энх тайвны төлөвлөгөөнөөс эхэлсэн бөгөөд үүнд АНУ Орос, Украины хооронд тогтвортой энх тайвныг тогтооход тустай гэж үзсэн 28 заалтыг тусгасан. Баримт бичигт анхлан тусгасан саналуудаас онцолбол:

• АНУ болон бусад улс Крым болон Донецк, Луганск мужуудыг Оросынх гэж хүлээн зөвшөөрсөн.
• Украины тусгаар тогтнолыг баталгаажуулах байсан ч Киев Донецк, Луганск дахь өөрийн эзэмшиж буй үлдсэн газар нутгаа өгөх ёстой.
• Украиныг НАТО-д гишүүнээр элсүүлэхгүй, харин ЕХ-ны гишүүн болох боломж, "Асуудлыг шалгаж байх хооронд Европын зах зээлд богино хугацаанд зах зээлд нэвтрэх давуу эрх"
• Украины Зэвсэгт хүчний гишүүдийн хязгаарыг 600 мянга гэж тооцно.
• Орос улс дэлхийн эдийн засагт дахин нэгдэх болно.

Төлөвлөгөө нь Москвад ашигтай гэж үзсэн бөгөөд АНУ, Украин болон түүний Европын холбоотнууд хоорондын яриа хэлэлцээг өдөөсөн юм. Өнгөрсөн долоо хоногт Женевт Вашингтон, Киев энэ саналын шинэ хувилбарыг зөвшөөрөв - энэ нь олон нийтэд нээлттэй биш боловч зарим боломжит өөрчлөлтүүдийг тусгасан.

• Украин эзлэгдсэн бүрэн эрхт газар нутгаа цэргийн аргаар бус, харин хэлэлцээрээр эргүүлэн авах үүрэг хүлээлээ.
• Украины Зэвсэгт хүчний тоог 800 мянган хүнээр хязгаарлана.
• Украины НАТО-д элсэх эсэх нь тус холбооны гишүүдийн зөвшилцлөөс шалтгаална. Одоогоор тийм зүйл байхгүй гэж тэд үзэж байна.
• НАТО мөн Украинд цэргээ байрлуулахгүй байхыг зөвшөөрч байна. 
• Украинд НАТО-гийн гэрээний 5-р зүйлд нийцсэн аюулгүй байдлын баталгаа олгоно - энэ нь Украинд хийсэн халдлагыг эвслийн гишүүдийн эсрэг халдлага гэж үзнэ гэсэн үг юм.

Гэсэн хэдий ч энэ долоо хоногт АНУ, Украины дараагийн хэлэлцээ Флорида мужид болсон бөгөөд Виткофф, Кушнер нарын Путинтэй хэлэлцсэн саналын дэлгэрэнгүй мэдээлэл тодорхойгүй хэвээр байна.

Л.Баяр