Швейцарийн өмнөд хэсэгт байрлах алдарт Кранс-Монтана цанын баазад Шинэ жилийн эхний шөнө гарсан томоохон галын улмаас олон арван хүн амиа алдаж, 100 гаруй хүн хүнд гэмтсэн талаар албаныхан мэдээллээ. Гал 1 дүгээр сарын 1-ний шөнө 01:30 цагийн орчимд “Le Constellation” нэртэй уушийн газарт гарсан бөгөөд цагдаа нар уг осолд хэд хэдэн улсын иргэд өртсөн байх магадлалтайг онцолсон байна. Бүс нутгийн ерөнхий прокурорын мэдэгдсэнээр уг явдлыг энгийн галын осол гэж үзэж байгаа бөгөөд санаатай тавьсан гал гэх ямар ч үндэслэл байхгүй аж. 

Пүрэв гарагт болсон хэвлэлийн бага хурлын үеэр цагдаагийн зүгээс “олон арван хүн нас барсан гэж таамаглаж байна” хэмээн мэдэгдсэн ч яг тодорхой тоо хэлэхэд эрт байна гэв. Италийн Гадаад хэргийн яам Швейцарийн цагдаагийн эх сурвалжаас иш татан, ойролцоогоор 40 хүн амь үрэгдсэн байж болзошгүй гэж мэдээлжээ. Одоогоор 100 орчим хүн түлэгдэлтийн хүнд гэмтэлтэйгээр эмнэлэгт хүргэгдсэн бөгөөд эрчимт эмчилгээний тасаг дүүрсэн талаар орон нутгийн удирдлагууд мэдээлсэн байна. Зэргэлдээ орших Итали улс Милан хот дахь түлэгдэлтийн тусгай тасгийг мөн ашиглах боломжтой болгоод байна. 

Хохирогчдыг таних ажиллагаа үргэлжилж байгаа бөгөөд ихэнх шарх маш хүнд тул энэ үйл явц олон хоног үргэлжилж болзошгүйг Италийн Элчин сайд анхааруулжээ. Одоогоор Францын хоёр иргэн гэмтсэн нь батлагдсан бөгөөд Францын Ерөнхийлөгч Эммануэль Макрон Швейцарьт бүрэн дэмжлэг үзүүлэхээ илэрхийлсэн байна. Их Британийн ЭСЯ нөхцөл байдлыг ажиглаж байгаа ч одоогоор тусламж хүссэн иргэн бүртгэгдээгүй ч консулын ажилтнууд бэлэн байдалд орсон гэж мэдээлжээ.

Анх дэлбэрэлт болсон гэх мэдээлэл гарсан ч бүс нутгийн аюулгүй байдлын албаны төлөөлөгчийн тайлбарласнаар тэсрэх бодис бус, гал тархсанаас үүдэн дотоод дэлбэрэлт, бүхэл барилга шатах нөхцөл бүрдсэн аж. Тухайн үед уушийн газарт байсан хоёр франц эмэгтэй төрсөн өдрийн лааг оргилуун дарсны шилэн дээр асаах үед тааз шатаж эхэлсэн гэж Францын хэвлэл мэдээлжээ. Барилга бүхэлдээ модон хийцтэй байсан бөгөөд хэдхэн секундын дотор гал асар хурдтай тархсан байна. Мөн гарц маш нарийн, шат нь давчуу байсан тул хүмүүсийг нүүлгэн шилжүүлэхэд онцгой хүндрэлтэй байсныг тэд онцолсон юм.

“Le Constellation” баар нь олон жилийн түүхтэй, 300 хүртэл хүн хүлээн авах багтаамжтай томоохон газар бөгөөд шинэ жил, зул сарын баярын үеэр хамгийн их ачаалалтай байдаг. Иймээс осол гарах үед тус газарт Швейцарийн иргэд болон жуулчид олноороо цугларч, 2026 оныг угтаж байсан байх магадлал өндөр байна.

Эх Сурвалж: BBC