Украины Ерөнхийлөгч Владимир Зеленский Шинэ жилийн мэндчилгээндээ ОХУ-тай дайныг дуусгах энхийн хэлэлцээр “90 хувь бэлэн болсон” хэмээн мэдэгдлээ.
Түүний хэлснээр үлдсэн 10 хувь нь “энхийн хувь заяа, Украин болон Европын ирээдүйг тодорхойлох” хамгийн чухал хэсэг аж. Зеленский энэхүү мэндчилгээндээ Москвагийн бүрэн хэмжээний түрэмгийлэлд Украин хэрхэн эсэргүүцэж ирснийг онцлон ярьж, “бид энх тайвныг ямар ч үнээр хамаагүй авч ирж, дайныг дуусгахыг хүсэж байна” хэмээн онцолжээ. Харин Оросын Ерөнхийлөгч Владимир Путин өөрийн богино хэмжээний шинэ жилийн үгэндээ цэргүүддээ хандан “та нарт итгэж байна, бид ялна” гэж хэлсэн байна.
Энхийн хэлэлцээний хамгийн том саад нь Донбассын бүс нутгийн асуудал хэвээр байгааг Зеленский илэрхийлсэн юм. Одоогоор ОХУ Донецк мужийн ойролцоогоор 75 хувь, хөрш Луганскийн бараг 99 хувийг хяналтдаа байлгаж байгаа бөгөөд эдгээрийг бүрэн эзэмших шаардлагаа тууштай тавьсаар иржээ. Зеленский Донбассаас ухрах нь “бүх зүйл дуусна” гэсэн үг хэмээн анхааруулж, баталгаагүй, сул гэрээ нь харин ч дайныг улам өдөөх аюултайг онцолсон байна. Тэрбээр АНУ Украины аюулгүй байдлыг 15 жилийн хугацаанд баталгаажуулах санал тавьсныг дурдсан ч энэ амлалт яг хэзээнээс хэрэгжих нь тодорхойгүй хэвээр байгааг хүлээн зөвшөөрчээ.
Үүний зэрэгцээ ОХУ-ын талаас Украин дроноороо Оросын баруун хойд хэсэгт орших Валдай нуурын ойролцоох Путинтэй холбоотой хувийн байшинг онилсон гэх баримт дэлгэсэн ч Украин улс уг мэдэгдлийг эрс няцааж байна. ОХУ энэ хэрэг явдлын улмаас энхийн хэлэлцээний талаарх байр сууриа дахин авч үзнэ гэж мэдэгдсэн бол Европын Холбооны гадаад бодлогын тэргүүн Кая Каллас үүнийг энхийн үйл явцыг зориуд саатуулах оролдлого хэмээн тодорхойлжээ.
Зеленский энэ сард АНУ болон Европын орнуудын оролцоотойгоор энхийн яриа хэлэлцээг эрчимжүүлэх хүсэлтэй байгаагаа илэрхийлсэн бөгөөд Францын Ерөнхийлөгч Эммануэль Макрон 1 дүгээр сарын 6-нд Парист болох уулзалтаар Украиныг хамгаалж, шударга, урт хугацааны энх тайвныг хангах бодит амлалтууд хийгдэнэ гэж мэдэгдсэн байна. Гэсэн ч аливаа тохиролцоонд ОХУ-ын зөвшөөрөл зайлшгүй шаардлагатай бөгөөд одоогоор ийм бэлэн байдал харагдахгүй хэвээр байна.
Эх сурвалж:BBC
